Ke Alaula, Volume III, Number 12, 1 Malaki 1869 — Page 48
48 KE ALAULA.
HO SANA KAMALII.
Leo: YOUNG PILGRIMS.--Golden Censer.
1. I ke-la wa ka-hi-ko, I he-le mai Ie-su E la-we i Zi-o-na I o-la no ke ao. HUI. Ku mai la a ho-sa-na Na ka-ma-lii mai-kai. A-o-le ona i-nai-na, Ua o-lu-o-lu mai. Ku mai la a ho-sa-na Na ka-ma-lii mai-kai, A-o-le ona i-nai-na, Ua o-lu-o-lu mai.
2. Ua mau no kona aloha,
I kamalii ano,
I kona alii ana
Ma ko Ziona puu.
HUI.--E ku ma kona malu,
Hosana nui ae I ko Davida mamo,
I ko lakou alii.
3. Ina hoole aku
E mele ia Iesu,
E ku mai na pohaku
A hosana e lakou.
HUI.--E wiki e hoonani
Na leo, na naau,
'Ka haku o ka lani,
Ka inoa maikai mau.
KULA POKII.
SABATI I.
1. Pehea la i kauoha mai ai o Iesu i na haumana?
E hele lakou ma kahi kuaaina e halawai pu me ia.
2. Nolaila haalele na haumana ia Ierusalema a hele aku i hea?
Hele lakou i ka loko wai o Galilaia, oia o Tiberia.
3. Heaha ka Petero olelo i kekahi po?
"E hele ana au i ka lawaia."
4. Kuu lakou i na waa, aole nae i loaa ka ia, a i ke kakahiaka owai ka i ku mai ma kapa kahakai?
Ku mai kekahi kanaka a ninau mai, "E na pokii, aole a oukou wahi ia?" Hoole lakou aole.
5. Pehea hou kana pane ana?
"E kuu iho i ka upena ma ka aoao akau o ka moku."
6. Kuu iho lakou, a heaha ka i loaa?
Ua puni na ia nui hookahi haneri me kanalima-kumamakolu.
SABATI II.
KA AI PU ANA.--IOANE XXI:1-19.
1. Owai ka i ike mua aku o ka Haku kela ma kahakai?
O Ioane. Pane ae kela ia Petero, "O ka Haku kela."
2. Heaha ka Petero i hana koke iho ai?
Lele aku kela i ke kai a au koke aku iuka.
3. A pae aku lakou a pau iuka, heaha ka lakou i ike ai?
He nanahu ahi, a me ka ia i kauia maluna, a me ka berena.
4. Huki lakou i ka upena iuka a helu i na ia; ehia ka nui o na ia i hei?
Hookahi haneri me kanalima-kumamakolu ia nui.
5. Pehea aku o Iesu ia lakou?
Olelo kela e hele mai e ai, a noho iho lakou e ai.
6. Pehea o Iesu?
Lawe oia i kekahi berena a hoomaikai iho.
7. Heaha ka na haumana i hoomaopopo loa ai?
Hoomaopopo lakou o Iesu kela.
SABATI III.
1. A pau ka ai ana, pehea i ninau aku ai o Iesu ia Petero?
Penei, Aloha anei oe ia'u?
2. Pehea la i pane ai o Petero?
"Ae, e ka Haku; ua ike no oe ua aloha au ia oe."
3. Pehea aku o Iesu?
E hanai oe i na keiki hipa.
4. Ehia ninau ana o Iesu ia Petero, Aloha anei oe ia'u?
Ekolu ninau ana.
5. No keaha i ninau aku ekolu ninau ana?
No ka ekolu paha o ko Petero hoole ana i ka Haku.
6. Heaha keia hana o ka hanai i na keiki hipa a Iesu?
Oia no ke ao ana ia lakou i na mea e pili ana ia Kristo.
SABATI IV.
NO KO IESU PII ANA I KA LANI.--MAT. XXVIII:16; LUKA XXIV:46; OIHANA I:4-15.
1. Mahope o ko Iesu ala hou ana ua launa pinepine mai anei ia me na haumana?
Ae, ua launa pinepine mai no, aole nae i noho paa me lakou.
2. Heaha kana kauoha ia lakou?
Aia a hoi aku au i ka lani, e ao aku oukou i na kanaka no'u, a e hoouna mai au i kuu Uhane Hemolele a e hana oukou i na hana mana.
3. Heaha kana olelo hoolana?
Mai makau oukou i na kanaka ino, e noho mau no wau me oukou ma ko'u Uhane: a mahope e hoi hou mai au ia oukou.
4. I ka ninau pono o na haumana iaia, ua hoi aku anei oia i ka wa e hoi hou mai ai oia?
Aole; ua huna oia i ka wa e hoi mai ai.
5. I kekahi la alakai aku o Iesu i kona mau haumana i hea?
Alakai aku kela ia lakou a maluna o kekahi mauna, a hapai i kona mau lima a hoomaikai mai ia lakou.
6. I kona hoomaikai ana, heaha la ka lakou mea i ike ai?
Laweia aku o Iesu iluna i kona Makua, a na ke ao i apo mai iaia a nalo aku oia mai o lakou aku.
7. E ku ana na haumana e nana ana iluna i ka lani i kahi a Iesu i nalo aku ai, a owai ka i kamailio mai ia lakou?
He mau anela elua.
8. Pehea ka pane ana mai o na anela?
No keaha la e nana aku oukou iluna?
Mahope e hoi mai o Iesu.
9. Pehea na haumana?
Hoi lakou i Ierusalema me ka olioli.
HANAI I NA MISIONARI.
Ua hapai ke kula nui o Waialua i misionari na lakou, a ia lakou ka malama ana o ke ola o Leleo laua o Loe, na misionari i holo aku maluna o "Hoku Ao," a i noho aku ma ka mokupuni o Fabiteuea, ma ka pae aina o Kilipati. Hookahi haneri a me kanahiku-kumamalima dala ka uku makahiki o ka ohana misionari hookahi ma ia pae aina, a ua manao na kaikamahine o ke kula nui e lawa ana ia lakou wale no e hookaa ia uku makahiki. A ua lilo ia lakou ka malama ana i ke ola o ko lakou kaikuaana, i hele mai ia kula aku a i na aina naaupo e lawe i ka lama-ku o ke ola.
I na kamalii lawe ALAULA, ke hoi mai nei na paka ua o ka hooilo maluna o ka aina, a me he mea la e lealea ana paha oukou i ka holoholo ua. O ka makou ia e papa ikaika nei, mai punihei aku ma ia lealea hoanuanu kino; eia wale no ka pono ia kakou, e malama mai i ko kakou mau kino kamalii mai na mea hoanuanu mai, o loaa mai auanei i ke anu a me ke koekoe.
I keia mau la iho nei, ua lawe aku ka make i kekahi keiki kamaaina o Honolulu nei, nona na makahiki he kanakolu a oi, oia o S. P. Nohea. I na la pokole hope loa o kona ola ana, ua hilinai kela ma ko ka Haku aoao. Nolaila, ke paipai aku nei makou, mai kaukai a na la hope alaila huli i ka Haku, no ka mea, ke olelo mai nei ka buke nui, "E ao aku oukou i na kamalii i ko lakou wa opio, a elemakule oia, aole ia e huli mai laila ae."
E ao o hoopunipuniia oukou; o ka launa aku i ka hewa ka mea e ino ai ka nohp pono ana.—Paulo.
KE ALAULA.
He Nupepa Hoikeike Kii.
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.
25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ke ope hookahi, ME KA HOOKAA MUA IA MAI.
O. H. KULIKA, Luna Hoopuka.