Ke Alaula, Volume III, Number 12, 1 March 1869 — Page 45

KE ALAULA.
BUKE III. HONOLULU, MARAKI, 1869. HELU 12.

NA MANU HAU.
(SNOW BIRDS.)

                Ma na aina anu o Amerika a me Europa i ka manawa i paa ai ka aina i ka hau i ke anu o ka hooilo, puka mai na wahi manu liilii e like me na mea i hoikeia ma ke kii maluna ae nei; ua kapaia lakou na manu hau, no ka lele mai maluna o ka hau. He pipili loa mai no keia mau manu, a i ka wa e hanaiia'ku ai na moa, lele mai lakou nei a ai pu me na moa. No hea mai ka ai e maona ai keia mau manu liilii i ka wa i paa ai ka honoa i ka hau, a ua helelei na lau o na laau, a he hua ole mai na mahinaai? No hea hoi. He mea pohihihi ia; eia nae, na ka mea hookahi no i hanai i na liona opio i ko lakou wa e uwo ai no ka pololi, nana no i hanai i na manu liilii; aole hoi hookahi o lakou i haule i ka honua me kona ike ole.
                Ke ike la kakou ma ke kii maluna ae nei he keikikane e kauo ana i kona wahi kaikuahine pokii maluna o ke kaa holo honua e pahee ana maluna o ka hau. Owai o laua nei ka i oi o ka pomaikai—o ke kaikunane e kauo ana i kona wahi pokii, o kahi kaikuahine paha e kau wale ana a e holo lealea ana maluna o kona holo papa, e ike nei i na manu liilii e lelele mai nei?
                E olelo mai paha kekahi o oukou o ke kaikuahine ka mea pomaikai, no ka mea he luhi ole ia, a he luhi ke kaikunane i ke kauo ana ia mea kaumaha.
                He okoa nae ka makou manao. Eia ia: ua oi aku ka pomaikai o ke kaikunane, no ka mea ua olelo ka Haku, "Ua oi aku ka pomaikai o ka haawi ana aku mamua o ka loaa ana mai."

O KA HUA NA KA UHANE.

                Oia ke aloha, ka olioli, ke kuikahi, ke ahonui, ka lokomaikai, ka maikai, ka manaoio, ke akahai, ka pakiko.—Paulo.

KO KE AKUA MALAMA ANA I KONA POE KANAKA.

                I na la o ka hooponopono hou ana o ka Ekalesia ma Europa, e noho ana kekahi kanaka pono a naauao ma Geremania, o Berenetio o Wutemebuka kona inoa. No kona ikaika ma ka pono ua ala mai kona poe enemi, a hoouna mai lakou i puali koa e hopu iaia i kona wa e noho nanea ana. Komo mai na koa ma ke kaona; lohe e o Berenetio a holo, aole nae me ko lakou ike ole iaia, a hahai lakou iaia ma kekahi mau alanui. Mama iki ia i ka holo wawae, a huli ma kahi huina alanui, a holo ma kahi ala haiki, a loaa kekahi alapii. Pii no ia malaila, a ike aku i kekahi alapii ano kahiko a luliluli e hiki ai i kahi i waihoia ai ka mauu maloo. Awiwi loa kona pii ana a pee iloko o ka mauu, a moe malie loa. Huli na koa i o a ia nei ma ke alanui, a hiki i keia wahi alapii, pii no lakou a hou aku mawaena o na apana laau o ka papa-hele o luna me ka welau o na pu, me ka manao ina e ku kona kino, oni ae ia. Aole oni o Berenetio, aka, makau loa ia o eha i na ihe ma na welau o na pu o na koa. Hele ae lakou no ka manao aole mea ma ia wah. Ae, he wahi pee maikai no keia, aka, pehea la e ola kona kino ina hoomau maanei, no ka mea aole wahi ai ma ia wahi. O ka Haku nana i alakai i kana kauwa ma keia wahi e pee ai; nana no i hoouna mai i ai, no ka mea, i kela la i keia la hele mai kekahi moa i kona punana i hanaia ma ia keena waiho mauu, a o ka hua i hanau i kela la, keia la, oia ka ai o keia haipule no na la he umi-kumamaha. Oia wale no kana ai no ia mau la i mau kona ola kino. A hala ia mau la aole hele hou mai keia moa, a nele ia i kahi ai. No ia pau ana manao iho la o Berenetio e kahea ana kona Haku iaia e haalele i keia wahi malu a hoi hou i kana mau makamaka. Iho ia ilalo i ke alanui, a lohe ia akahi no a haalele na koa enemi i ke kaona. Imi kona mau hoa aloha i wahi e pakele ai oia i na lima o na enemi a noho me ka maluhia.
                E ike auanei kakou ma keia hana i ka mana o ke Akua e malama i kona poe kanaka a hala na ino i hope.
                                Na ke Akua mana no
                                E malama i ke ao, ka po,
                                A eha ole no kakou. F. M.

                Hoowahawaha ka mea lapuwale i ke aoia mai e kona makua; o ka mea hoolohe i ke aoia, oia ka mea naauao, a e loaa auanei iaia kekahi haawina maikai ma keia hope aku.