Ke Alaula, Volume III, Number 11, 1 February 1869 — Page 41

KE ALAULA.
BUKE III. HONOLULU, FEBERUARI, 1869. HELU 11.

PEPEHI ANA I NA ELEPANI-KAI.

                He holoholona kino nui keia e noho ana maluna o ka hau o na kai anu o ka moana anu akau. He noho no i ke kai a he pii mai hoi i ka maloo. I ka wa ia puka mai lakou a kau mauka e olala ia lakou iho i ka la.
                O na niho palaoa o keia holoholona ua like me ko ka elepani, a ua hiki aku ka loa o na niho i ka ekolu kapuai o na mea nui. Na keia mau niho i kokua ia lakou i ka pii ana i na pali pahee i ka hau. Hou iho lakou i na niho ilalo i ka hau a paa, a huki mai na wawae a loaa kahi e koo pono ai. O kona mau wawae ua ano like me ko ka honu, a me ko ka ilio-holo-i-ka-uaua. Me ia e au ai i ka wai a e hele ai i ka maloo. He holoholona noho malie ke waiho malieia, aka, ina e hana ino ia aku, aole o kana mai kona huhu me ka hana ino mai. Holo aku na moku mai ka akau aku o Europa a i ka moku o Sepiseberena, ma ka akau o Norewai, e pepehi i na elepani-kai, a loaa mai na niho palaoa a me ka aila.
                Ma keia kii ke ike la kakou i kekahi waapa o ka poe imi i ke elepani-kai. Ua komo lakou i kekahi kai-kuono ua puni mai i na moku hau, a ua hoopuniia lakou e kekahi lehulehu elepani-kai i alualu mai i ka waapa. Ke pepehi aku nei keia poe kahu moku ia lakou me na koi a me na mea o ia. Hopu hoi ka kekahi e ki-pu ana i keia holoholona. Ma ka hooikaika nui e pakele paha ke ola p keia poe kahu moku, a e pomaikai lakou i ka nui o na holoholona e make ana ia lakou.
                He ai nui ia ka io o keia holoholona e na Ekimo, na kanaka o Ainaomaomao. I kekahi manawa pilikia lakou i ka po loihi o ka hooilo i ka ai ole. A olioli lakou i ka hoomaka ana i ka wehe ana o kei ao, a hoomaka ka ikeia'ku o na elepani-kai, a loaa kahi io ai no lakou.
                Hai mai o Kauka Kaina i kekahi moolelo i loaa iaia i ka noho ana me na Ekimo i kona holo ana i ka akau. No ka pololi, haalele elua Ekimo i ko laua hale mamua o ka pau poo o ka hooilo, a hele e imi i elepani-kai. Make ia laua kekahi o keia holoholona nui, a e hoi ana me ka hauoli a loaa koke iho he makani ikaika mai ka akau mai, a moku mai ka apana hau ma ke kahakai kahi i loaa ia laua ua elepani-kai nei. Ua kaawale mai ka hau mai ka aina- aole wahi e hiki aku ai, aole wahi e pakele ai. Nolaila hoihoi laua i ko laua mau ilio a maluna o kahi ahua o ka apana hau paa, a huki aku hoi laua i ke kino o ka elepani-kai i make ia laua a maluna o ia ahua. Nou mai ka makani ikaika a popoi mai na nalu maluna o laua. Nolaila nee hou laua a luna loa aku o ke ahua o ka puu hau. Lilo loa aku laua i ka moana. O ka io maka o keia elepani-kai oia wale no ko laua ai a hala hookahi malama. Ua malama aloha ia laua e ka Makua Nui. I ka pau ana o ka malama, pili aku ua moku hau nei i ka aina a hoi hou laua i ko laua home. Hauoli loa na makamaka no laua nei: ua make, eia ka, ua ola hou mai nei!

KE KEIKI I NA NALOWALE.
HE KAAO OIAIO.
Helu 2.
HILINAI O BENI I KONA IKAIKA IHO.

                Ala kakahiaka nui mai o Beni, a hui aku ke kani ana o kona leo me ko na manu leo lea o ka ulu-laau. E kahi aku ana kona makuahine i kona lauoho, a hoomanao o Beni i kona pule ole ana i kona wa e hiamoe aku ai i ke ahiahi, a pane kolohe mai ia i kona makuahine, "Lealea maoli kuu hiamoe ana i ka po nei." E kaena ana kela no kona pule ole i ka wa i hiamoe aku ai.
                Pane mai kona makuahine, "Aole anei i makau oe i ka hele wale e paani me ka nonoi ole aku i ka Haku e hoopakele mai ia oe i ka hoowalewaleia mai?
                Noonoo iki iho o ua o Beni, a pane mai, "Pehea la e hookuu mai ai ke Akua ia kakou i ka hoowalewale? Ina he makemake ia e noho pono kakou, no keaha la e hookuu mai ai oia ia kakou e hana i ka hewa?"
                "E Beni, aole o ke Akua e alakai aku ia kakou i ka hoowalewale, aka, waiho mai oia ia ka-