Ke Alaula, Volume III, Number 9, 1 December 1868 — Page 36

36 KE ALAULA.

ALA, ALA.
WON'T YOU VOLUNTEER?—Happy Voices.

1. A-la, a-la, a-la ka-ma-lii, Pau ka wa e mo-e ai, a-la a-wi-wi;  Pa-le, pa-le i ka mo-lo-wa, A-la me ka nau-we ae, nau-we a ma-ma. HUI. Pa-io, pa-io, mai ma-kau ou-kou, Pa-io, pa-io, Nau-we o-li pu, Pa-io, pa-io no ka na-au-ao, Pa-io, pa-io no ke o-la mau.
2. Ala, ala, hoomakaukau e
No na hana e hana'i ma ka Sabati,
Pule, pule a hoopaanaau
I na ui kamalii, me na mele pu.
HUI.- Paio, paio, mai makau oukou, &c.
3. Ala, ala, e hoolohe ae
I ka leo paipai e no ka bele mai,
Wiki, wiki, mai lolohi e.
Holo me ke mele pu i ke kula nei.
HUI.- Paio, paio, mai makau oukou, &c.
4. Ala, ala, la hoano nei.
La hoomaha, hoomaikai no na kamalii;
Kula, kula, kula a pau ae
Hele i ka halawai, hele pono nae,
HUI.- Paio, paio, mai makau oukou, &c.
5. Ala, ala, kiai a kuoo,
U'ala no na enemi, ko ke ao a pau.
Pale, pale a paio aku no.
I makau a hee lakou me ka hoka mau.
HUI.- Pale, pale, mai makau oukou, &c.
WAIKOLOA.

KULA POKII.

SABATI I.
NO KE KEA.—LUKA XXVIII: 26 - 34.

1. I ka ae ana aku o Pilato, heaha ka na enemi i hana aku ai ia Iesu?
Hana lakou i ke a a kau aku maluna o Iesu nana e halihali.
2. Hiki anei iaia e amo ia laau nui?
Aole no i hiki, no ka nawaliwali, a hounauna lakou i kekahi kanaka e kaikai pu.
3. Pehea aku o Iesu i na wahine e ukali ana iaia me ka uwe?
Olelo kela, "Mai uwe oukou no'u, e uwe oukou no ka hoopai i ili mai ana maluna o keia poe."
4. A hiki lakou i kekahi puu nui, heaha ka lakou i hana ai?
Hoomoe lakou ia Iesu ilalo maluna o ke ke-a, a kakia i kui ma kona mau lima, a me na wawae, a makia akui ka laau.
5. Heaha hou?
Eli lakou i lua ma ka lepo, a kukulu aku i ke ke-a me Iesu e kau ana.
6. Pehea aku lakou i ka Iesu mau kapa?
Lawe na koa i na kapa a mahele no lakou iho.
7. Huhu anei o Iesu?
Aole: Pule aku oia i kona Makua e kala mai i ko lakou hewa.

SABATI II.
NO KE KEA.—LUKA XXIII: 35 - 43.

1. Owai na Iudaio?
O na mamo lakou a Aberehama; ka lahui a ke Akua i koho ai nona.
2. Heaha ka Pilato i kakau ai maluna o ke ke-a i kaulia'i o Iesu?
"O ke Alii keia o na Iudaio."
3. Pehea ka olelo a kona mau enemi?
"Ina o oe ke keiki a ke Akua, e iho mai oe mai ke ke-a mai."
4. He mea hiki anei ia Iesu e iho mai, mai ke ke-a mai?
He hiki no, aka manao oia e make no i hoola no ka poe hewa.
5. Owai ka i kaulia pu ia me Iesu ma ke ke-a?
He mau kanaka powa elua.
6. Pehea la ka pane ana o kekahi o laua iaia?
E ka Haku, e hoomanao mai oe ia'u, a e hoola mai ia'u.
7. Pehea i pane aku ai o Iesu iaia?
I keia la o oe pu kekahi me a'u iloko o ka paredaiso.

SABATI III.
NO KE KEA.—IOA. XIX: 32 - 37. MAT. XXVII: 45 - 54.

1. Oiai e kau ana o Iesu ma ke ke-a, pehea kona pane ana ia Ioane?
Olelo kela, e lilo ko'u makuahine i makuahine nou.
2. Pehea hoi kana pane ana i kona makuahine?
E lilo o Ioane i keiki nau.
3. Pehea ka Ioane hana ana ia hope iho?
Malama aku oia i ko Iesu mahuahine me he makuahine ponoi la oia nona.
4. I ka Iesu pane ana, ua make wai au, heaha ka lakou i hana ai?
Hoopiha lakou i kekahi huakai i ka winika, a kau aku ma kekahi laau, a haawi aku iaia e inu.
5. Alaila aha?
I mai la o Iesu, "Pau aku la!' a make iho la.
6. O ka hora ehia la ia?
O ka hora ekolu o ka auina la.
7. Heaha na mea kupaianaha i hanaia ia manawa?
Pouli loa iho la ka la, a olai ka honua.

SABATI IV.
NO NA KOA.—IOANE XIX: 32 - 37.

1. O ka wai mau wawae ka na koa i uhai ae?
O ko na powa.
2. No ke aha i uhai ole ai lakou i ko Iesu mau wawae?
No ka mea, ua make e aku ia.
3. Heaha la ka lakou i hana aku ai ia Iesu?
Hou aku kekahi i ka ihe nui ma kona aoao.
4. Heaha ka i kahe mai?
O ke koko a me ka wai.
5. He mea aha la ka waina ma ka ahaaina a ka Haku?
He hoailona ia no ko Iesu koko i hookahe ia.
6. Ehia la puka i hou ia ma ko Iesu kino?
Elima: Ma na lima elua, ma na wawa elua, a ma kona aoao.
7. No ke aha la i ae aku ai o Iesu i keia hoomainoino ia ana?
I hiki i ke Akua e kala mai i ko kakou mau hewa.

E AHO KA PULE, AOLE O KA AIHUE.

                Ua noho kekahi mau ohana ilihune ma kekahi kulanakauhale ma ka aina anu, ma kahi kokoke i ka uapo paila wahie. Ma kekahi hale uuku, e noho ana he ohana ilihune loa. He ona pinepine ko lakou makuakane i ka rama. I kona wa e ona ai, pilikia loa kona ohana; lilo kana dala i ka hale kuai rama, a nele ka ohana keiki. No kekahi ona ana ona, loohia oia i ka mai, a komo ke anu ma kona pupupu hale. Ua koe hookahi wale no wahi pauku wahie e hoopumehana ai i ka hale, a e hoomoa i ka ai a na keiki.
                I ka po, hea aku oia i kana keiki makahiapo o Ioane, e hele mai i ka aoao o kona wahi moe a hawanawana aku iaia. Hoole leo nui o Ioane, "aole loa e hiki ia'u." "No ke aha hoi?" wahi a Ioane, "ua ao ia mai au ma ke Kula Sabati, "mai aihue oe." "Aole anei i ao ia hoi oe e e hoolohe i kou mau makua?" "Ae, ua ao ia no au pela." "Ina pela, e hoolohe mai oe ia'u, a e hana aku."
                He hiki ole ia Ioane e kue maoli aku i kona makuakane, no ka mea ua kauoha mai kela iaia e hele ia po i ka uwapo, a e aihue mai i mau pauku laau. Eia ka Ioane i pane aku ai i kona makuakane; "he pono ia'u e pule akui ke Akua, e kokua mai oia i wahie no kakou; e aho ia mamua o ka aihue." Hoi aku ua keiki nei i kona wahi moe, a ma ia wahi mehameha, hookokoke aku ia i kona Akua ma ka pule. Pule aku oia i ka pule a ka Haku. Iloko o ia pule, he nonoi me keia; "E haawi mai ia makou i keia la i ai na makou no nei la." Nonoi aku hoi o Ioane i ka Haku i wahie hoi kekahi.
                Ia la ae, i ko Ioane hoi ana mai, mai ke kula i ke awakea, ike koke aku oia he paila wahie ma ka ipuka o ko lakou hale. Ninau aku oia, a hai mai kona makuahine, ua hoouna ia mai keia wahie e ka poe hui e manawalea aku i ka poe ilihune. Aole o Ioane i ike ia lakou, aka i kona manao paa, na ke Akua no i hoouna mai i ua wahie la. A ua oiaio no kona manao.

                O ka hana, ua hoohalike ia me ka hua o ka laau, o ka olelo waha, he lau wale no ia.

KE ALAULA.
He Nupepa Hoikeike Kii.
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.

                25 keneta ka uku no ka makahiki; no ka pepa hookahi; 20 keneta pakahi ka uku no na pepa he iwakalua a oi aku paha ma ke ope hookahi, ME KA HOOKAA MUA IA MAI.
O. H. KULIKA, Luna Hoopuka.