Ke Alaula, Volume III, Number 8, 1 November 1868 — Page 29

KE ALAULA.
BUKE III. HONOLULU, NOVEMABA, 1868. HELU 8.

HE WAAPA HOOLA.

                Aole keia he waapa huelepoki, aole he waa hali ukana, aole hoi he waa halihali wale i na ohua, aka he okoa iho no ka hanaia ana o keia waapa, i mea e piho ole ai ke holo ka wa ino loa a ke poiia i na ale.
                Ua hanaia me na pahu paa loa ma na aoao i piha mau i ke ea, a komo ole ka wai ; nolaila, ina e poiia i na ale a piha loa ka waapa, aole no e poho ilalo ; na keia mau opu makani ma na aoao e hoolana iaia iluna, a kaia ka wai, holo hou aku no.
                Ma na moku lawe nui i na ohua ua malamaia keia ano waapa, a i ka manawa e pilikia ai ka moku, na keia mau waa e alo i na ohua a pakele ke ola. Ma na awa ku nui o na moku ua malamaia keia ano waapa i mea e kii aku ai a hoopakele i ke ola o na ohua o na moku i ili a nahaha paha mawaho o ke awa, a ma ka nuku awa paha. Ina he wa ino loa a hiki ole i na waapa maoli ke holo i ke kai, he hiki no i keia waapa ke alo a hoola i na ohua.
                I ka makahiki 1789 ili kekahi kiakolu ma ka nuku o ke awa o Tinemauka, ma ka akau o Enelani. He ino loa ka makani a me ke kai ia manawa, a iwaena hoi o ka nalu kahi i ili ai keia moku. Ike aku ko uka poe i ka pii ana o na kahu moku mahina o na kia a me ka likini o ka moku e pakele i na ale, a hoopaa lakou malaila a opili i ke anu a make i ka pololi, a haule liilii aku iloko o ka nalu a pau lakou i ka make. Ua haawiia he makana nui i kekahi poe kahu moku e holo ma na waapa e kokua i ka poe i pilikia. Ua makau na mea a pau i ka holo, no ka ikeia aole waapa e ola ana iloko o ia nalu nui. Ma ia hope mai imiia ke kapili ana o ka waapa hoola ohua, a hanaia keia ano waapa me na opu makani maloko o na aoao. A he nui wale na mea waapa hoola.
                Ma ke awa ku moku hookahi o Tinemauka ua hoopakeleia na kanaka ekolu haneri ma ka waapa hoola hookahi iloko o na makahiki he iwakalua. Pela ma na awa ku moku nui a pau, he nui ka poe i aloia a pakele i ka make mainoino ma keia ano waapa.

HE MOOLELO NO ESETERA K. PILIPO O KE KULA OHANA A MISS L. BINAMU, O KAWAIAHAO.

                Ua hanau oia ma Keauhou, Kona Akau, Hawaii, ma ka la 16 o Feberuari 1859; a he hanau mua hoi na G. W. Pilipo, k., laua me E. Naiwalau, w., a o ka nui o kona mau la o ke ola ana, a make aku la ma kona hale no ma ka la 4 o Okatoba, 1868, he 9 makahiki, 7 malama. He aloha nui ia na kona makua a me na kini no hoi.
                Aole ia i komo i kekahi kula apana a hiki wale i kona hookomo mua ia ana ma ke kula a Miss Lilia Binamu. Me na makua no kona wahi ao uuku ia ana, aole nae i ao nui ia ma na hua palapala; aka, ua aoia aku ma ka hoonaauao ana ma kona naau i ka olelo a ke Akua, a me ka haipule pu ana.
                Mawaena o akahi a me elua makahiki o kona ola ana, a he wa ia ua hiki ke hele, aole nae i loaa ka olelo iaia; he mea mau nae ma na wa e malamaia ai a pule ohana o na kakahiaka a pau, he ekolu mau buke mau imua o ka ohana- o ka Baibala, o ka himeni a me ka Aiokala: aka, i kekahi mau manawa ua poina i na makua ka Aiokala; a ke nana mai la kela, a pau ka heluhelu Baibala ana, a lalauia ka himeni, alaila, oia iho la ko iala wa e hele huli ai i ka Aiokala, a loaa, lawe mai la imua o kona makuakane, a pela iho la e ike ai oia i kona palaka, a pela i ao mai ai keia kaikamahine i na palaka a kona mau makua. He pinepine kana hana ana me keia ano iloko o kona mau la ike ole i ka olelo.
                I kona mau la i ike lea ai i ka olelo, o ke aoia ma ka hoopaanaau i kahi mau pauku o ka Baibala; ua paanaau iaia ka pule a ka Haku a me