Ke Alaula, Volume III, Number 7, 1 October 1868 — Page 25

KE ALAULA.
BUKE III. HONOLULU, OKATOBA, 1868. HELU 7.

HE KIAKOLU NUI.

                He mea nani maoli ka moku nui me kona mau pea a pau e kau ana, e holo haaheo ana maluna o ka ili o ke kai me he mea ole la i ka nana'ku.
                I ka ike mua ana o na Hikina o Amerika i kekahi moku mai Europa aku, manao lakou he elele ia i hoouna ia ia lakou mai ka Uhane Nui mai.
                Me keia ke ano o na moku nui lawe ohua mawaena o na awa o Europa a me Amerika. Ke ano no hoi ia o na Moku Kalepa nui e kaapuni mau nei i ka honua, e lawe ana i ka ukana a me na ohua. He iwakalua kumamakolu ka nui o na pea o keia moku e kau ana. Ua ike makou ma ke kiakolu nui e holo ana i ka moana, he kanakolu pea e kau ana ua poho i ka makani.
                He kanakolu paha ka nui o na kanaka ke hui ia na'lii moku a me na kahu moku e pono ai ka moku nui e like me keia. Ua hiki ia ia e lawe i na ohua ewala haneri. Ina hoi he kulina a palaoa paha ka mea e hooili ai, ua komo no ma ka opu o keia moku hookahi na kaa bipi he umikumamaono haneri i piha i na barela palaoa.
                He nui na moku i ili a nahaha i kela makahiki keia makahiki, a nui loa ka waiwai i poho malaila.
                Aia ma ka Baibala he moolelo no ka ili ana o kekahi moku i piha i ka palaoa a me na ohua he elua haneri a me kanahiku kumamaono.
                He poe paahao kekahi maluna o ia moku, e lawe ia ana i Roma, ilaila e hookolokoloia'i, a he papa koa e kiai ana ia lakou. O kekahi o keia poe paahao, he Misionari Keristiano, i hopu ia a hoopaa ia e ka poe i hoino i ka olelo a ke Akua. He poe hoomanakii wale no lakou a pau, koe keia mea hookahi wale no. I ka holo ana o lakou, loaa he makani nui a ino loa, a manao na kahu moku aole wahi e pakele ai lakou.
                Hookahi nae mea maluna o ka moku i pihoihoi ole, nana i olelo ia lakou a pau, "mai pauaho oukou, aole hookahi o kakou e make ana: e hoopakele ko'u Akua ia kakou a pau. O ka misionari no keia. Na kana mau olelo no i hoolana i ko lakou manao. Manao paha lakou he Akua mana ko keia kanaka, a hoolohe no na koa a me na kahu moku i kana olelo. Elua pule i puhi ia lakou io a ia nei e ka makani ino, a i hooluli ia e na ale hanupanupa o ke kai. A ike lakou he aina, hooholo lakou i ka moku iuka ma kekahi kaikuono, a ili ka moku a nahaha.
                Au kekahi poe iuka; a o kekahi ma na apana papa nahaha o ka moku, pela i pae oia ai lakou a pau iuka; aole hookahi i make.
                He wahi moku aina uuku keia, kahi a lakou i ili ai, a he poe pegana na kanaka, aka, hana lokomaikai mai no lakou, a ho-a lakou he ahi e hoomehana ai na ohua i pulu i ke kai a i ka ua.
                Ua uku pono ia lakou no, ia mau hana lokomaikai. Hai mai ka misionari ia lakou i ke ola ma o Iesu ka Haku. O ka mua no ia o ko lakou lohe ana i ka olelo no Iesu Kristo. Hoike mai hoi kela kauwa a ka Haku i kekahi mau hana mana a kupanaha, e hoike ana i ka oiaio o kana mau olelo. Kahaha nui na kanaka o ia aina i ka lohe ana. E loaa aku ia oukou ka moolelo o ka holo ana o ia moku ma ka Mokuna 27 o Oihana.

E HILINAI MALUNA O IESU.

                E kokoke ana kekahi kaikamahine e pilikia i ka make. He ehaeha kona mai ana. Mamua iki ae ua mama kona mau wawae, he eleu hoi a olioli iwaena o kona mau hoa, ano nae ua pilikia i ka nui o ka eha; ua kau mai ka lima kaumaha o ka make, a ua kokoke ia e hele i kela ao.
                Ninau aku la kona makuakane ia ia: "He kaumaha anei kuu wahi pokii no ke kokoke ana mai o ka make?"
                "Aole, e kuu papa aloha, wahi ana me ka aka iki," ke paa nei kuu lima i ko Iesu lima, aole no hoi oia i haalele mai ia'u."
                Mahope hele mai la ke kahuna pule a ninau aku ia, "Aole anei oe makau, e kuu pokii?"
                Pane koke mai la ia, "Aole o'u makau, oiai ke kii mai nei Iesu ia'u."
                "Aole anei oe luhi i ka hoomanawanui ana i keia eha?"
                Pane mai la ia, "Ke hilinai nei au ia Iesu; aole au i manao i ka eha."
                Pela i hele ai kekahi o ko Iesu mau Keikihipa e noho pu me ke Kahuhipa maikai iluna, ka mea nana e hii nei i na keiki hipa ma kona poli. Penei, ua makaukau anei oukou e na pokii e?

                O ka mea e manao ana e lilo i luna e kau kanawai aku maluna o hai, e ao mua oia i ka hoolohe.