Ke Alaula, Volume III, Number 6, 1 September 1868 — Page 24
24 KE ALAULA.
E HAHAI IA IESU.
TRY TO LIVE LIKE JESUS.--Golden Censer.
No na leo elua.
1. No-ho ma na la a pau Me ko Ie-su an-no, O-lu-o-lu no, Ku-i-ka-hi pu; A na-na no e a-la-kai, A na-na e hoo-mai-kai mai, A o-li pu ka-kou, ka-kou, A o-li pu ka-kou.
2. E hoolohe, hoomaikai, 'Na makua aloha,
I loihi ae Na la e ola'i;
HUI.--A nana no e alakai, &c.
3. E mahalo maikai ae
I na kumu kula,
Kula no a mau,
Ao i naauao;
HUI--A nana no e alakai, &c.
4. Kiai mau a pule pu,
I ole e hoomauhala;
Kala wale ae I na enemi.
HUI.—A nana no e alakai, &c.
5. Ma na hana maikai no,
Ma na olelo pono,
E hoomaikai pu
I ka Haku mau;
HUI.--A nana no e alakai.
A nana e hoomaikai mai,
A oli pu kakou, kakou,
A oli pu kakou.
WAIKOLOA.
KULA POKII.
SABATI I.
IUDA ISEKARIOTA.--IOA. XII:6. MAT. XXVI:3, 4, 14-16.
1. Ehia la haumana a Iesu?
He umikumamalua.
2. Aloha anei lakou a pau iaia?
Aloha no lakou a pau iaia, koe wale no o Iuda, hookamani wale kela.
3. Ike anei o Iesu i kona ano?
Ua ike loa no Iesu i kona ano a pau.
4. Pehea na haumana e ae, ike anei lakou i ko Iuda ano?
Aole lakou i ike. Puni wale lakou iaia no kona ano oluolu mawaho.
5. Heaha la ko Iuda mea i makemake loa ai?
Puni dala oia, a aihue hoi.
6. Ka wai dala kana i aihue ai?
Ka na haumana. Waiho like lakou i ko lakou dala ma ke eke hookahi, a ia Iuda malama. a lawe liilii oia i na dala.
SABATI II.
1. Loaa anei i na haumana ka Iuda aihue ana?
Aole i loaa iki ia lakou; o Iesu wale no kai ike.
2. Heaha la ka Iuda mea e imi mau ai?
Imi mau oia i kahi e loaa hou ai ke dala.
3. Hele aku o Iuda i kekahi la i na'lii haakei me ka i aku, ina e uku mai oukou ia'u, e hoike aku au ia oukou i kona wahi e hele ai i ka po. Ae anei lakou?
Ae, ua ae no lakou.
4. Heaha ka uku a lakou i haawi ai ia ia?
He kanakolu apana dala.
5. Pehea ka manao o kela poe enemi o Iesu?
Olioli lakou.
6. Pehea o Iuda?
Hai malu aku oia i na haumana, a huna iho i kana mea ana i hana'i.
SABATI III.
KA AHAAINA HOPE.--LUKA XXII:7:14. IOANE XIII:1-17.
1. Pane aku la o Ie su i kana mau haumana, pehea?
E kokoke ana no au e make, aka e ahaaina mua no au me oukou ma Ierusalema.
2. Owai ka Iesu i hoouna ae ai e hoomakaukau no ka ahaaina?
O Petero a me Ioane.
3. He hale anei ko Iesu ma Ierusalema?
Aole ona hale; hele laua i kekahi makamaka o Iesu, a haawi mai kela, he keena maluna.
4. Pehea ka laua hana?
Hoomakaukau laua i ka ai, ka berena, a me ka waina.
5. I ka wa hea i hele aku ai lakou i ka ahaaina?
I ke ahiahi.
6. Owai ka haumana a Iesu i aloha loa ai?
O Ioane.
7. Pehea ko Ioane noho ana ma ka papaaina?
Noho mai oia ma ko Iesu aoao.
SABATI IV.
1. A liuliu iki ko lakou noho ana, heaha ka Iesu i hana ai?
Lawe oia he kawele, a he pa holoi, a holoi oia i ko lakou mau wawae.
2. Pehea ko Petero manao?
Manao oia, aole pono ia Iesu e holoi i kona mau wawae.
3. I ko Petero hoole ana pehea aku o Iesu?
Ina aole au e holoi ia oe, aole ou kuleana pu me au.
4. Pehea iho la o Petero?
Makemake iho ia Iesu e holoi ia ia.
5. Holoi pu anei o Iesu i ko Iuda mau wawae?
Ae.
6. A pau, a noho iho o Iesu pehea kana pane ana?
Ina hoi owau ka Haku i holoi i ko oukou mau wawae, pela no oukou e hana aku ai kekahi i kekahi.
7. Heaha ke ano o keia olelo ao?
E aloha lakou kekahi i kekahi, a kokua aku.
KE KUNU KALEA.
He kau mai no keia no na keiki a kakou e na makua. O ke kunu kalea, he mai pilikia ole no ia no na keiki nunui iki ae, i loaa paha elua makahiki a oi aku. Elua paha mahina a i ke kolu, pau ae la no keia kunu. Aka i ka loaa ana i na wahi keiki liilii loa nona ka makahiki hookahi a malalo iho paha, o kekahi o lakou ke pilikia ke loaa iho i keia mai kunu. O ke kiai pono o na makuahine i ka lakou mau keiki, oia wale no ka pono, me ka hoouhi ia lakou i na kapa mehana i ke ao a me ka po.
Ina he kiki liilii keia, a i ke kunu ana luai mai ka ai, e hanai hou aku no i ka ai mahope koke iho o ke kunu nui ana, i ole wiwi iho ke kino a nawaliwali ke kunu ana, a paa mai ka puu i ka male. E makaala i ka hanai pinepine i na keiki liilii i mau ka puipui o ke kino, a hala ai ka wa o ke kau mai ana o keia kumu. Ina e kokoke ana i kahi o ke kauka, e kii aku i wahi laau kunu, he mea ia e oluolu iki ai ke kunu ana.
Ke poha mai ka ula o ke koko ma ka maka i ka ikaika o ke kumu ana, aole ia he mea e pioloke ai. E ola wale ae no ka ula o ka maka ke pau ke kunu.
Mai hookuu wale aku oukou e na makuahine i ka oukou mau keiki makamae e holo wale i ka ua, i ka wai, i ke anu, a i ka wela, i ka wa e kau mai ana keia kunu oolea maluna o lakou.
Loaa aku ia makou he lehulehu na keiki e auau ana ma ka muliwai, ma kapa alanui. Ike makou i kekahi keiki uuku nona na makahiki eha, e auau pua ana, ua hele a opili i ka auau loihi, e paani pu ana me ka lehulehu o na hoa. Nee ae ua keiki uuku nei i kapa, a hoomaka mai kona kunu kalea. Kunu iho keia a paupauaho, hoho ka leo, a kunu hou, a kunu hou. He aha la ka hope o ka hookuu wale ia o kahi keiki liilii o ia ano e auau ma ka muliwai a hala ka hora. O ka make paha ka hope. e ao kakou e na makua, e malama pono i na keiki. A e pule mau i ke Kahuna lapaau nui.
Aloha ino na makua i haalele ia mai e na keiki liilii a lakou. He nui no lakou e noho u nei. Me lakou ko makou aloha minamina loa.
NO KA NONANONA.--Solomona.
O ka poe anonanona, he poe ikaika ole lakou; hoomakaukau no nae i ke kau i ka lakou ai. E ka mea hiamoe, e hele oe i ka anonanona, e nana i kona aoao a e hoonaauao iho; Aole ona alii, aole haku, aole hoi lunakanawai; Hoahu no oia i kana ai i ke kau; i ka wa e ohi ai, hoiliili oia i kana mea ai. E ka mea hiamoe, pehea ka loihi o kou hiamoe ana? A hea la oe e ala mai ai mai kou hiamoe ana mai? He moe iki ae, he hiamoe iki ae, he pelu hou iki ae i ka lima a hiamoe: A e hiki mai kou ilihune me he kanaka hele la, a me kou nele e like me ke kanaka kaua.
KE ALAULA.
He Nupepa Hoikeike Kii.
Hoopuka mau ia ma Honolulu, i lea malama keia malama e ka PAPA HAWAII, no na Kamalii Hawaii.
25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ke ope hookahi ME KA HOOKAA MUA IA MAI.
O. H. KULIKA, Luna Hoopuka.