Ke Alaula, Volume III, Number 6, 1 Kepakemapa 1868 — Page 21
KE ALAULA.
BUKE III. HONOLULU, SEPATEMABA, 1868 HELU 6
KA ENUHE KILIKA
Ua ike oukou i na lole a me na hainaka kilika. O keia mea lopi makalii loa a pahee hoi i ulanaia i lole kilika no loko mai no ia o ka opu o ka enuhe kilika. Ke ike ia kakou ma ke kii maluna ae nei, he mau hua makalii e waiho ana malalo maluna o kekahi lau. Oia na hua i hanau ia e ka pulelehua. A hala kekahi mau pule a pa iho ka la maluna o na hua kiko mai lakou he mau enuhe liilii loa. Kolo ae na enuhe a kau maluna o na lau o ka laau kilika, oia no ka ilima haole i hanai ia'ku no lakou. Ai nui keia mau peelua i ka lau kilika, a i ka ha o ka pule ua nui loa ae, a elua paha iniha ka loa o ka peelua. A pau na la iwakalua kumamaono, hana kena peelua i hale kilika nona. Hoopuka aku oia ma kona waha he lopi makalii loa, e like me ka punawelewele a ka lanalana aka he oi nae ka paa. Ulana iho oia i keia mea he kilika a puni kona kino me he poka lopi uuku la, a noho oia maloko a lilo oia i mu e moe malie ana maloko o keia popo kilika.
Aia ma ke kii ke ike ia kakou i ka popo kilika i hoopaa ia ma kekahi piko i ke kumu o kahi laau e ku ana.
Moe malie no keia mu maloko o ka popo kilika a hala na la he umikumamalima, alaila nali iho la oia a loaa he puka a hemo mai oia he pulelehua me na eheu nani e lele ai ma kahi ana e makemake ai.
He kii keia i hoikeia maluna no kahi ano peelua kilika no Inia mai. He okoa ke ano o na peelua kilika i malama ia ma Koloa Kauai i na makahiki mamua loa aku nei. He uuku ko nei pulelehua aole i like me keia i hoike ia ma ke kii nei.
O ka nui o na ano peelua a kakou i ike ai ma na lau nahele hoi no lakou iloko o ka lepo a lilo i mu a mai loko o ka lepo puka mai he pulelehua a he okai paha.
Me he la ua make a hoi i ka lepo e waiho ai i kona kino kupapau. Mahope hoi a hala na la he nui, ala hou mai ua kino make nei me ke ano hou a ano okoa loa. He okoa loa ke kino o ka peelua i hoi ilalo i ka lepo e moe ai, a he okoa loa ka pulelehua i puka mai loko o ka lepo me ke kino nona, a me na eheu e lele ai iluna i ka lewa.
Pela auanei ko kakou mau kino lepo nei ke hoi ilalo i ka lua kupapau e moe ai. A hala na la he nui, e puka hou mai no ke kino okoa, he kino uhane; aia i ke ala nui ana i ka la mahope.
KO LINA KUKUNA MALAMALAMA.
Owai hoi kou inoa? Pela wau i ninau ai i ke kaikamahine a kuu makamaka, kahi a'u i noho ai.
"Ko Lina kukuna malamalama au, wahi a keia kaikamahine oluolu, o Luisa.
"Ano e no hoi ua wahi inoa la wahi a'u. No ke aha la ko lakou kapa ana pela ia oe?"
Nana mai la oia pane mai la;
"O Lina ke kaikuahike o kuu makuakane; he makapo aole oia i ike i kekahi mea aole hiki ia ia ke nana aku i na pua nani o ke kula, aole i na ao iluna, aole hoi i na manu e lele ana iluna. E hiki no ia ia ke lohe i ke kani maikai ana mai o na manu, aole nae ike i ko lakou mau hulu nani o kela ano keia ano. He oluolu no oia iloko o ka mehana o ka la, aole nae hiki ia ia ke nana i kana hana e nani ai na kula mahope mai o ka ua. Aka i kona noho mehameha ana, kahea mai oia ia'u a noho au ma kona aoao, a hahai aku ia ia i na pauku maikai a'u i ao ai ma ke Kula Sabati a me na himeni pu kekahi a'u i ao ai. Nolaila kapa mai oia ia'u kona Kukuna malamalama. Aole anei he maikai ia?"
"Ae maikai maoli no. He wahi misionari oe?"
"Aole au he misionari wahi ana. Ua maopopo no ia'u ke ano o na misionari. Ke hele nei lakou e hai aku i ka euanelio i ka poe pegana, a e ao aku ia lakou no Iesu. No ke aha la oe i kapa mai ai ia'u he misionari?"
No ka mea, ke hooikaika nei na misionari e hoopomaikai aku ia hai, a he hooikaika nei oe e hoopomaikai aku ia Lina, aole anei pela?"
"Aole au ao aku ia ia no Iesu, no ka mea, ua maopopo no ia ia ia, a ke a ke ao mai nei oia ia'u ma o Iesu la;" oki ae la oia, a mahope olelo mai la, "Aole no au he misionari; o ko "Lina Kukuna malamalama wale no au." L. L. N.
O ka hana, ua hoohalike ia me ka hua o ka laau, o ka olelo waha, he lau wale no ia.