Ke Alaula, Volume III, Number 5, 1 August 1868 — Page 17

KE ALAULA.
BUKE III. HONOLULU, AUGATE, 1868. HELU 5.

NA KEIKI O KUAAINA.

                No keaha la i makemakeia na keiki o kuaaina e na laku hoolimalima mamua o na keiki o ke kulanakauhale nui? Eia: no ka maa o na keiki o kuaaina i ka lawelawe hana. Ua hiki ia lakou ke kaka wahie, ke hana me na bipi kauo, ka ui waiu, ka hopu lio, ka waele i na kihapai, a me na hana he nui wale i loaa ole aku i na keiki o ke kaona. Ua maa lakou i ka hele i ke kula a imi i na manu, e alualu paha i na puaa, e hanai kao, e alakai paha i ka pua hipa. Nolaila, ua oi aku ka makaukau o ke keiki kuaaina i na hana mamua o ke keiki i noho paa i ke kulanakauhale nui. Ua oi aku ka ikaika o kona mau io a me na olona o kona kino holookoa ma ka hooholo pinepine a me ka paani me na hoa.
                Eia hou: aole i ao nui ia na keiki o ke kuaaina, i malama pono ia e na makua naauao, i na hana kolohe o na keiki o ke kaona. Aole i loaa ia lakou ka palaualelo wale, ka puhi baka, ka hoohiki ino, ka pili-waiwai, ka inu mea ona, ka aihue a me ka hakaka, na hana maa i kekahi hapa nui o na keiki o na kulanakauhale nui,
                Ma na kuaaina ua hapa paha ka launa ana me kanaka, a ua oi ka launa ana a me ka ike ana i na hana a ke Akua. O na kula uliuli, o na kihapai momona, o na ululaau lipolipo, o na kuahiwi mehameha, o na muliwai e kakahe malie ana, o na wailele e kakani ana, o na holoholona kauwa maikai a ke Akua i haawi mai no ke kanaka, o keia mau mea a pau ka ke keiki kuaaina i launa nui pu ai; a na ia mau mea, ma ke ao maikai ana o na makua, e alakai i kona naau ma ka pono.
                He nui na kanaka naauao, a hanohano a kuonoono, e noho nei me ka hoomaikai mau i ke Akua no kona hoonoho ana ia lakou ma na kuaaina i ka wa opiopio, aole ma na kulanakauhale. I ka loaa ana o ko lakou haawina ma ke kuaaina i ka hana, a ua paa loa ia lakou na rula o ka noho pono ana ke kumu hoi ia o ko lakou pomaikai ana i ka wa i oo. Nolaila, mai kuko aku oukou, e na keiki noho kuaaina, i ka noho ana ma ke kaona. He nui na pono a me na hihia i loaa i na keiki o ke kaona i ua pomaikai oukou i ko oukou haawina e noho ma ke kuaaina. O na makua hoi, mai holo koke aku oukou i ke kaona e noho ai me na keiki. Ua oi ka pomaikai o ka oukou ohana keiki ma ke kuaaina.

NA KOKUA EKOLU.

                "Me he la he pono ole i ke Akua ke hoopai mai i na keiki hana hewa, no ka mea he hiki ole ia lakou ke hoole i ka hewa;" pela ka pane ana o Kimo i kona makuahine.
                Pane mai kela, "Kahaha he hiki ole anei ia lakou ke hoole aku i na hoowalewale?"
                "Ae, pela kuu manao," wahi a Kimo.
                "Malia paha," wahi a kona makuahine, "no ko lakou imi ole i na kokua a ke Akua i haawi wale mai."
                "Na kokua a ke Akua i haawi wale mai ai! Heaha ia mau kokua? wahi a Kimo.
                "Ekolu mau kokua. Ua haawi mai kela he buke e kuhikuhi i ke ala. Ma ia palapala ua hai maopopoia mai ke ala o ka pono a me ke ala o ka hewa, a me kahi e hiki aku ai ia mau ala elua; o kekahi e puka aku ana i ka lani, a o kekahi hoi e iho ana ilalo i ka po. Ina e nana kekahi iloko o ia buke aole ona hu hewa ma ke ala. He maopopo loa kahi e hele ai."
                "O ka Baibala paha ia buke?" wahi a Kimo.
                Ae mai kela, "Ae, oia no. I mea hoi e pohihihi ole ai kakou ma ka heluhelu ana ma ia buke, ua haawi mai kela he kokua hou iho no, oia ka Uhane Hemolele - nana o hookaakaa i na maka, a e alakai ia kakou ma ka oiaio a pau. Aole a e alakai ia kakou ma ka oiaio a pau. Aole keia he alakai e hele ana a ma kahi e haalele mai ai: aka, e alakai no kela a hiki loa i ka hopena, i hu hewa ole kakou ma ke ala hewa."
                Ninau ae o Kimo, "Pehea la e loaa aku ai ia kakou ka Uhane Hemolele? Eia no ma kuu lima ka Baibala, aka o ka Uhane, pehea la o  loaa mai ai ia mea?"
                Pane mai kona makuahine, "Aia no ma ka noi aku e loaa mai ai. E noi, a e loaa mai.' Ua olelo hoi ka loaa mai ai ia mea?"  Pane mai kona makuahine, "Aia no ma ka noi aku e loaa mai ai. E noi, a e loaa mai.' Ua olelo hoi ka Baibala, 'E kokua ana ka Uhane i ko kakou nawaliwali.' No ko ke Akua ike i ko kakou haule pinepine a me ke ano nawaliwali, nolaila kona haawi ana i ka Uhane Hemolele e hooikaika ia kakou."
                "He kupaianaha no," wahi a Kimo.
                "Eia hou hoi," wahi a ka makuahine. "Ua hoonoho mai kela he wahi leo iloko ou, a i ka wa e hoomaka aku ai oe i ka hele hewa, alaila pane mai kela leo, 'Mai hana oe pela!' a i ka wa e hana pono ai oe, alaila pane mai ua leo la me ke aloha a me ka hoomaikai, 'Pono no, e kuu keiki."
                "Ae, ua ao mai ka'u kumu ia'u no ia leo; o