Ke Alaula, Volume III, Number 3, 1 Iune 1868 — Page 10

10 KE ALAULA.

HE IOLE KAHIKI HUELO NUI.
(A SQUIRREL.)

                He holoholona liilii keia, e like ana paha ka nui o ke kino me ka lapika. He pekepeke loa ka huelo o ka lapika, aka he nui a he huluhulu loa ka huelo o keia iole kahiki. Noho keia holoholona maluna o na lala laau iloko o ka ululaau, a maloko o na laau puha hana iho i punana nona. O kekahi hoi o lakou eli iho i lua no lakou maloko o ka lepo. O ka lakou ai0 o na hua iwi oolea e like me ke kukui. Naha koke no na hua paakiki i kona mau niho; Iloko o ke kaa houluulu keia wahi iole i na hua ma kona punana i mea e ai aku ai iloko o ka hooilo. Hai mai kekahi kanaka he moolelo nona iho, penei: I ka loaa ana o'u mau makahiki eono, i kuu hele ana i ke kula i kekahi la, ike aku au i ka holo ana o kekahi iole huelo nui e holo ana a iho i kona wahi lua poopoo ma kapa o ke alanui. I iho la au, e make oe ia'u. He wahi muliwai e kahe ana ma kapa alanui. Hookahe aku la au i ka wai iloko o ka waha o ka lua o ka iole, i mea e make ai oia i ka wai. Lohe aku la au i ka oni ana o kahi iole iloko o kona lua, a manao wau o ka loaa aku no koe ia'u. Ka pane mai no ia o kekahi leo mahope o'u, e i ana, "E kuu keiki, heaha la kau maloko o keia lua?" Pane aku wau, "He iole ka'u, eia iloko o keia lua, a e hoomake ana au iaia i ka wai." Pane mai kela elemakule nona na makahiki he kanaono, "E Ioanetana, i kuu wa kamalii, he kanalima a keu na makahiki i hala aku nei, loaa au i kekahi elemakule e hookahe ana i ka wai iloko o ka lua o kekahi iole. Pane mai kela ia'u, He keiki liilii oe, a he kanaka nui au. Ina paha e loaa aku oe ia'u iloko o kekahi lua haiki, a hookahe aku au i ka wai maluna ou e make ai oe, aole anei oe e manao mai ia'u he kanaka lokoino ? Ua hana ke Akua i kela wahi holoholona uuku hana ino ole, a he hewa kakou ke pepehi kumu ole aku kakou ia lakou. Aole no au i pepehi kumu ole i kekahi holoholona liilii mea e lealea wale ai au mai kela la mai a hikiwale i keia manawa.' He kanaha; hoi makahiki i hala mai ka wa i kamailio mai ai kela elemakule ia'u, a iloko o ia mau makahiki aole no wau i pepehi kumu ole i kekahi holoholona liilii."
                Oukou hoi, e na keiki e heluhelu nei i keia, e hoomanao oukou i ka wa e ike ai i na manu liilii a me na holoholona maikai a pau, mai hoeha aku a pepehi wale ia lakou i mea e lealea ai. Aole no o Iesu i pepehi kumu ole aku i na manu a me na holoholona i kona wa kamalii. "Pomaikai ka poe i aloha aku; no ka mea, e alohaia mai lakou."

AOLE I IMI O IESU I KONA LEALEA IHO.

                Pehea oukou, e na pokii heluhelu ALAULA, ua like anei oukou me Iesu ma ia mea? Ua makemake maoli anei oukou e hoohalike me Iesu ? Ua himeni pinepine kakou i ua wahi mele la, "I like au me Iesu;" aka, ke hooikaika nei anei oukou e noho like me Iesu, e hana like me ia, a e hauoli maoli ma ka pono e like me kana hauoli ana? " Ina pela, o ka pomaikai maoli no ia i ka noho ana ma keia ao, a o ka nani maoli a kamahao loa i ke ao pau ole. Aole no paha i like loa ko lakou mau hana, ma na mea a pau, me ko Iesu; aka, he pono ia kakou ke hoohalike iaia ma keia mea, "o ka imi ana i ko hai pomaikai,' i like me ia ma ka uhane.
                Penei: ina ua pilikia kou makuakane, e Ioane e, a ua oleloia oe i kakahiaka o ka Poaono, "Ou hele ikaika a lawe mai i mau oha, a kahu i wahi ai no kakou; ua nawaliwali au." Malie paha ua manao mua oe e hele i ka holo lio. Aka ina ua like kou aho me ka Iesu ano, e hauoli oe iloko o ua hana la, ke kokua ana i kou makuakane.
                A ina paha oe; e Mele e; i kou noho ana i ka hale e kokua i kou makuahine i ka humuhumu na lole o kou mau kaikaina, ina ua hauoli oe me ka hoihoi i ke kokua pono i kou makuakane me kou makuahine, no ka mea oia ka mea pono a Kristo, malaila no oe e hahai ai ia Kristo.
                A o oe hoi, e Luika e, ina ua hoomanawanui oe me ke akahai i ka hoino ana mai o kou mau hoa-hele i ke kula, a pule i ke Akua e hoomaikai a lakou, na ano like no kou hana me ko Iesu i kona pule ana i ke Akua no na mea hoomainoino iaia.
                Pela no oukou a pau, e o'u mau pokii aloha, ina e waiho oukou i ko oukou lealea iho, ko oukou mea i makemake nui ai, i mea e kokua ai ia hai, a i mea hoi e hoonani ai i ko kakou Makua ma ka lani, ua hahai no kakou ia Iesu ma ia mea.
                Malaila no ko kakou pomaikai maoli, oia hoi ma ka imi ana i ka pomaikai no na mea pilikia, ka lealea, ka inu ana, ka holo lio ana e pomaikai maoli ai kakou. He opala ia. Iloko o Iesu ka pomaikai mae ole ; iloko ona ka malu a me ka hauoli mau loa. L. L. N.

O KA HAPANUI NO KE AKUA.

                "E mama e, o ka hapa hea la o kuu mau dala e pono ai ia'u ke hoolilo i ke Akua?" wahi kekahi keikikane uuku i kona manao ana e hoomaka pono aku i ka makahiki hou. "O ka hapa hea la," wahi a kona makuahine. "Ehia au mau dala?" Wehe ae o Komo i kona wahi na dala, a haule mai he wahi dala gula hookahi a kona kupunawahine i haawi mai ai iaia, a he wahi hapaumi kime; elima ia mau keneke, a ike wahi apana uuku iho he ekolu keneka. "Aia ka'u dala ulaula - o ka hapalua o ia lilo no ke Akua," wahi a Komo; "aia hoi elima keneka a me ekolu keneka, huiia ewalu keneka o ka hapalua o ka walu eha ia. Aole. E hoolilo wau i ka hapanui no ke Akua. E lilo iaia ka hapalua o ke dala, a me na keneka elima, a koe iho no'u ka hapalua dala a me na keneka ekolu ." Ehia la o na haipule a me na keiki o Hawaii nei e hana nei e like me ka Komo i hana ai, a hoolilo i ka hapanui no ke Akua?

NO KEKAHI KAIKAMAHINE KULI.

                Ua hoomaopopo anei oe i kou pomaikai i ka loaa ana ia oe ka lohe o ka pepeiao a me ke kamailio o ka waha? He haawina maikai keia i loaa ole aku i na keiki a pau.
                He wahi kaikamahine i hanauia mai he kuli. Aole no e loaa iki aku ia poe ke kamailio, no ka mea ua nele ka lohe o ka pepeiao, ka mea e alakai i ka pu ana o ka elelo i na huaolelo. Aole lohe keia kaikamahine i ka leo pule o kona makuahine, aole hoi i kona leo mele e hoomalielie ana i kona uwe i ka wa liilii. Aole kela i lohe i ke kani ana o ka aka o kona mau hoahanau e paani ana, aole hoi i ka leo lea o na manu, e kani ana o ke kahawai, ka hooluli ana o ka makani i na lau o na laau. Aka, aole no i kaumaha ka manao o keia kaikamahine, ua oluolu no ia.
                A loaa iaia na makahiki he umi-kumamalua, ua hoonohoia aku oia ma ka hale kula no na kuli. Holo imua no ia ma ka huli palapala ana. He kuhikuhi lima ke kamailio o ia poe, me ke kakau no hoi i ko lakou mau manao. Hooholo loa keia kaikamahine ma ke kakau ana i kona mau manao.
                Aka loaa i keia wahi kaikamahine ke kunu, a ua ike na makamaka aole ia e ola ana. Hai aku kona kumu iaia, e make ana ia. Aole kela i makau iki. Eia ka pane ana mai, "Olioli loa iho la au." No ka piha loa o kona naau i ke aloha i kona Hoola. O kona makemake e waihoia mai ka Baibala ma kona aoao, a o ka heluhelu pinepine kana hana. Manao kela ina e komo aku ia i Ierusalema Hou, ike oia i kona Haku, alaila o kona mau pepeiao i lohe ole maanei, e lohe auanei lakou i ka hookani ana o ko ka lani mau puali i ka leo o Mose a me ke Keikihipa, a e hiki hoi iaia ke hui me lakou ma ka memele ana.
                He nui no na poe keiki kuli ma na aina a pau. Ma Hawaii nei no kekahi. Ua ike iho makou i kekahi o ia mau keiki maanei. O ke kuhikuhi lima ka lakou kamailio me na hoahanau. He makaala loa ko lakou mau maka, no ka mea o ke alanui ponoi hookahi no ia e loaa ai ia lakou ka ike.
                Pehea oukou, e na keiki - aole anei e minamina oukou no ia mau keiki i nele i ka lohe ana i na leo a pau loa e hoohauoli nei i ko oukou mau puuwai ? Ina e loaa ia oukou ka manao hoohalahala a me ka ohumu paha i ke Akua no ka haawina ana i haawi mai ai ia oukou, alaila e hoomanao i na keiki kuli, a e hoomaikai aku i ke Akua no ka loaa ana o na pepeiao loheia me na maka ike.

AOLE ANEI HE SABATI MA KE KUA O KA HALE?

                E panapana hua ana kekahi keiki uuku ma ke alanui ma ke alo hale. Kahea aku kona makuahine iaia, "E kuu keiki, aole anei oe i ike he pono ole ia oe ke panapana hua malaila? E hoi oe ma ka pa ma ke kua o ka hale ke makemake oe e panapana hua, no ka mea he la Sabati keia." Ae aku kahi keiki, "Ae, aka aole anei he Sabati ma ke kua o ka hale?"

                Ua loihi na makahiki o kuu ola ana, a i kuu nana loihi ana, ua akaka loa ia'u no ke Akua no i hooponopono i na mea a pau e pili ana i kanaka,—Beniamina Faranekelina."