Ke Alaula, Volume III, Number 3, 1 June 1868 — Page 9

KE ALAULA.
BUKE III. HONOLULU, IUNE, 1868.

KA MAHINAAI O EDENA.

                O kahi nani kamahao loa o Edena, ka mahinaai a ke Akua i hana ai. Ua maikai ke ea; moani mai ke ala o na pua, nani; e kahe ana na muliwai iloko o na ululaau; kani mai na manu leo lea; ua hele na lala o na laau a luheluhe ilalo i ke kaumaha i na hua ai momona. Na ke Akua keia mahinaai i kanu, a haawi aku ia Adamu ka malama; a noho pomaikai iho o Adamu laua o Ewa, me ka piha i ke aloha kekahi i kekahi, a me ke aloha i ke Akua, a me ka hoomaikai aku iaia. I kekahi manawa hiki mai ke Akua a kamailio pu me lakou, a olioli loa laua i ka lohe ana i kona leo. Ae mai ke Akua i kona mau hoa-aina e ai i na hua o na laau a pau, koe hookahi laau e ku ana iwaena. Papa mai oia ia laua mai hoopa aku i ka hua o ia laau. Manao no paha laua e hoolohe ia kanawai. Aka, mahope hiki ae malaila o Satana, ka enemi nui o ka pono, a loaa hookahi aku o Ewa, a hoowalewale aku iaia e ai. Olelo ae o Ewa, "Aole i aeia maua e ai i ka hua o keia laau, no ka mea ua olelo ke Akua, i ka la e ai ai maua e make no." Pane mai o Satana, "He wahahee! Aole no olua e make. " O ka ai ana i ka hua o keia laau, he mea ia e naauao ai olua."
                Ua alakai o Satana ia Ewa me ka paipai ana i ka manao maloko ona, ua oolea loa ko ke Akua papa ana. Ua like kana hana me kona e hana nei i keia wa, a me ka hana o na hoa-launa kolohe e noho nei, e olelo nei i na keiki, "He oolea loa na kauoha a ko oukou mau makua." "He nui launa ole na rula o ke kula a ko oukou mau kumu i kau mai nei maluna o oukou; ua hooluhi maoli ia oukou." He paakiki na kanawai o ke Akua, he pono ke hooalu iki iho." E hoopunipuni maoli mai no lakou ia oukou, e na keiki, me ka olelo iho, aole he pilikia ma ka uhai ana i na kanawai, e like me ka Satana olelo ia Ewa.
                Ina e hiki mai ka hoowalewale i o oukou la, he pono e noonoo koke iho, a nonoi koke aku i ke Akua "e hoopokole mai ia oukou mai ka ino." Aka aole o Ewa i hana pela. Ku no ia a hoolohe aku i ka Satana mau olelo hoomalimali. Hookokoke aku oia i ka laau kapu, nana nui aku i ka hua, a ike oia he maikai i ka nana'ku, lalau kona lima, a hookama i ka waha a ai iho, a haawi aku i kana kane ia Adamu, a ai pu no ia. Pela i komo mai ai ka hewa, ka ino, ka pilikia, ka eha, ka uwe, ke kanikau a me ka make i ke ao nei - no ko laua hoolohe ole i ke kauoha o ke Akua.
                Ma ia hope iho kaumaha, luuluu a hilahila laua. Makau i ko laua Makua lokomaikai ma ka lani. A lohe iho laua i kona leo haalulu laua, a holo a pee iloko o ka ululaau. E lohe mai oukou, e na keiki: o ka hilahila, ka makau a me ke kaumaha, o na hua maopopo loa no ia o ka hewa. Ma ka mokuna ekolu o Kinohi e ike iho ai oukou i ke kipakuia ana o laua mai Edena aku. Manao kuhihewa kekahi poe, no ka maluhia o ko lakou noho ana, a me ka hoopuniia mai i na pomaikai, nolaila aole e haule aku iloko o ka hewa. Aka aole no pela. Ua haule aku o Adamu laua o Ewa mai Edena aku. O ke kiai makaala mau me ka nana aku i ke Akua, oia wale no ka mea e pakele ai ke kanaka.
                E nana aku kakou i ke kii nani o Edena i paiia ae la maluna. Ke ike la kakou i ka niu, ka pama, ka maia, a me kela ano keia ano laau e ulu mai ana. He wahi oneanea hoi keia mawaena o ka mahinaai o Edena. Ke ku mai nei he elepani, he lio, he kipele, he kanekeru. Ke moe ai nei elua kamelo, he kika, he liona a he mau hipa. He moe pu ka liona me ka hipa. Aole he hana ino ke kekahi i kekahi ma ia mahinaai a ka Haku. E lele ana maluna loa he manu nui. Aia hoi e ku mai ana elua manu a-i loloa, he nene nui paha. Ma kela kapa mai o ka muliwai ke ike aku la kakou i na kanaka a ke Akua i hana'i, o Adamu laua o Ewa e ku mai ana. He kapa ole ka laua i ka wa hewa ole. I ka nana aku ma ke kii; he ili keokeo laua. Aole nae he maopopo loa keia mea. He keokeo paha, he ulaula paha ko laua ili. He ano e, ano e ko laua mau mamo - he keokeo kekahi, he ulaula kekahi, he eleele kekahi.

KUAI POHO.

                Hoopuka kekahi kumu kula Sabati i keia manao i kana mau haumana: O ka mea i kuai mai i ka oiaio, ua kuai makepono loa oia. A ninau aku kela i kana mau haumana ina ua ike lakou i kekahi mea i kuai pono. Panee ae kekahi keiki, "Ua ike no wau. Poho o Ekau i kona kuai lilo ana aku i ka pono o ka hanau mua no ka ai hookahi ana i ka mea ono a kona kaikaina." Olelo ae kekahi, "Poho o Iuda i kona kuai ana i ka Haku no na apana dala he kanakolu." Pane mai ke kolu, "Ua poho ke kanaka i kuai lilo mai ko ke ao nei a pau, a lilo aku kona uhane."

                Ua oi ka pomaikai o ke aoia ana o ke keiki, o ka makuahine haipule mamua o ke aoia ana ma na wawae o Gameliela. Owai ke kanaka kaulana i aoia ma na wawae o Gameliela?