Ke Alaula, Volume III, Number 1, 1 April 1868 — Page 8
KE ALAULA. 8
uhane, a komo aku kakou i ko awa lai o ka lani. O ka ke Akua olelo ke panana, a o ko Iesu aloha ka makeneka ume.
NUKA IWEKONA, KE KEIKI MAKE NO KA PONO.
I ka la 9 o Augate o kekahi makahiki i hala ae nei, e noho ana keia wahi keiki ma Kikago, kekahi o na kulanakauhale o ka mahele aina o Ilinoi, ma Amerika Huipuia. I kekahi la kena kona mau makua iaia e kii i ka lakou mau pipi waiu ma ke kula, e hoa mai i ko lakou wahi, no ka mea, he mea mau i na makua i pau o ia mau aina ka hoouna ana i ka lakou mau keiki e kii na pipi ma ke kula a hoihoi mai ma ko lakou mau pa e ui ai i ka waiu. I ka hele ana o na keiki, pii lakou maluna o na puu ma na kula uliuli, a ma na awawa lipolipo o ua mau aina la, e huli ana i na pipi; aole nae i hele pu o Nuka Iwekona me ka lehulehu o na keiki - hele hookahi no kela; a hiki ma kekahi muliwai, e paapu ana kekahi poe keiki kolohe ilaila ma kapa o ka muliwai; a ike lakou iaia, hahai mai lakou mahope ona; me ka olelo mai iaia, "E Nuka, e kii oe i mau opala iloko o ka mala opala a Elekana."
Hoole aku kela. Olelo hou mai lakou, "E aihue oe."
Pane hou aku kela, "Aole, aole loa au e aihue."
Alaila olelo hou mai lakou, "Ina aole oe e ae mai, ulumai ia oe e makou iloko o ka wai." Olelo hou mai lakou iaia, "E kii hoi e aihue."
Hoole aku no kela, no ka mea, ua ike no kela i ka olelo a ke Akua, e papa ana, "mai aihue oe;" nolaila ua makau kela i ka aihue; aka nae, he poe keiki makau ole no lakou i ke Akua, a no ka makau ole o keia poe keiki i ka aihue, nolaila ua hana ino aku lakou ia Nuka Iwekona, me ka ulumai iaia iloko o ka wai. A hapai hou ae iaia iluna ninau lakou, "E ae anei oe i ko makou manao?"
Hoole aku, no kela; me ke kupaa o ka manao i ka pono. Pela lakou i ulumai mau ai iaia iloko o ka wai a make oia, me ka ike ole mai o kona mau makua iaia, a me ke kahunapule, a me kana kumu kula Sabati, no ka mea, he kaawale loa kona wahi mai kahi ona i make ai.
Ma ia manawa koke no, e ku koke mai ana he wahi keiki Geremania, a oia ka mea i ike i ka pepehi ana o ua pae keiki kolohe nei ia Nuka Iwekona, a nana i lawe aku ka lono, a lohe kona mau makua. A ma ia po iho huli kona mau makua, a me ke kahunapule, me kana kumu kula Sabati iaia; a ao ua po nei, loaa iho la ia o waiho ana iloko o ka wai. Hopu iho la kona mau makua, a kaikai ae la iaia iluna me ka uwe, nui a me ke kaumaha o ka manao no ka lakou wahi kamalei aloha, i hala aku i kela aina pomaikai a lakou hoi i ike ole ai. O kona manawa ia e make minamina ai.
No Norewai mai keia wahi keiki, a ua hele mai oia me kona mau makua a noho ma Kikago, hiki a make aku la. Me he mea la ua manao paha oia e lilo i kahunapule, ke lilo ae oia i kanaka makua, no ka mea, he nui loa kona makemake ka Baibala, a me na mea a pau e pono ai kauhane; a ua nui ka minamina o kona mau makua iaia, a me kona mau kumu, a me kona mau makamaka, no ka nui o kana mau hana maikai i hana ai oiai e ola ana ia, me kona manao ole e lilo ana kana mau hana i mea e kaulana ai oia. He keiki hele mau no oia i ke kula Sabati.
I ka lohe ana ae o kela kulanakauhale, keia kulanakauhale, i ka hana maikai a Nuka Iwekona, a me kona kupaa ana ma ka pono a hiki i kona la i make ai, nui loa ko lakou aloha nona, me ka olelo iho, "Ina pela ka makou mau keiki, pomaikai loa makou." O na makuahine mea keiki kai olelo pela ma ia wahi aku, ia wahi aku, o Amerika Huipuia, no ka mea, ua kui aku kona kaulana a puni ka aina nui i holookoa o Amerika Huipuia. O na kanaka waiwai o Amerika Huipuia, ua haawi manawale aku lakou, he iwakalua dala ka kekahi; a he kanalima ka kekahi, a he haneri ka kekahi, e kuai i kia hoomanao no ua keiki nei; nolaila, ua make aku la oia e like me ka make ana o ka poe kaulana i make hoomaauia no ka pono, a e like hoi me ka olelo ma ka Baibala: "Pomaikai ka poe make ke make iloko o ka Haku."
KA MANU KIKO LAAU.
Hana kekahi mau ano manu i ko lakou mau punana iloko o na kumu laau. Imi ka manu laau puha a palupalu paha o ka io, alaila kiko aku me kona nuku oolea a a poopoo loa iloko, a ilaila hana oia he punana nona hoohaule i kona mau hua, a hoomoe aku a hoohanau mai i na keiki. Nani no ka malu a me ka pumehana o ko lakou wahi punana.
Imi aku no hoi keia manu i kona ai iloko o na laau, oia na mu ai laau. Ike oia i ka laau komoia ka nui ; a ina e pii iho ka mu maloko o ka laau, haalele ka manu kiko laau i ka puka kuhi i komo ai ka mu, a maluna ae kiko iho kela a poopoo iloko, a loaa aku no ka mu e pii ana iloko o ka laau. Hoo aku kela i kona elelo ooi iloko o ka laau, a ina e loaa iho ka mu, huki mai ka manu iaia iloko o kona waha a ai iho.
He mea kupanaha ka ike a me ke akamai a ke Akua i haawi ai i keia manu e hana i kona punana a e imi i kana ai iloko o na laau. O kona nuku oolea wale no kana mea e hana aku ai a puka ka laau.
O ka makemake o kekahi mau keiki kolohe, o ka loaa o na punana manu liilii a kaili aku i ka lakou mau keiki a me ka lakou mau hua paha. Pela e hoopilikia wale aku ai lakou i na manu hoolealea wale ia lakou iho.
Mai hana ino kakou na mea a ke Akua hana ai, aka e menemene a aloha aku i na mea ola hanu a pau - na manu a me na holoholona.
KA OLELO HOOHOLO A KEKAHI JURE KEIKI.
Oiai e ao ana o Kauka Nataniela Perenetiki i kekahi kula nui ma Roxbury, he kumu aloha nui ia; aka ua hoao nui ia kona ahonui no ka pinepine o ka uhaiia ana o na kanawai o ke kula e na haumana. I kekahi manawa, me ke ano huhu, ua olelo hooweliweli ia penei: "O ka mea i ikeia e hawanawana ana, e hoopaiia no, i eono hahau ana me ka rula;" ua hoonohoia hoi kekahi mau kiu. Mamuli kahea aku kekahi o na kiu, "E hawanawana ana o Ioane!"
Ua kaheaia o ua o Ioane la, a ninauia ina pela io no. A o ua Ioane nei, he keiki i aloha nui ia e ke kumu a me na hoa hele i ke kula.
"Ae," wahi a Ioane, "Aole au i hoomanao i kuu hana; no ka mea, ua paa kuu manao i ka imi ana i kekahi ninau, helu, a ua noi aku au i ke keiki e kokoke ana ia'u o haawi mai i kekahi heli kakau, i ike au i kekahi rula no ka hana i ua ninau la."
Minamina iho la ke kauka no ka hikiwawe o kona huhu, aka ua olelo aku ia ia Ioane, aole e hiki ke ao aku iaia e hawanawana me ka hoopai ole ia; a olelo iho la, " Ua makemake loa au e waiho aku i keia hoopai ana, aka aole hiki ke ole e uhakiia kuu olelo. E waiho nae wau imua o kekahi mau keiki ekolu au e koho ai, na lakou e koho, ina paha he pono ia'i ke hoopai ia oe, ina paha aole." Ae koke aku la o ua o Ioane la, a koho iho la ia Mahoe, ia Komo, a me Kahuli. Kauoha aku la ke kauka ia lakou e hai mai i ko lakou manao ina ia mea; a mahope o ke kuka like ana penei ka olelo hooholo:
"Aole he pono ke uhakiia ke kanawai a ko lakou kumu i hana ai. He pono ke hahauia o Ioane i eono hahau ana me ka rula; aole nae maluna ona, aka e hahauia kekahi mau panai; a o makou, kona mau mea uwao, nau no e hahau mai, i elua hahau ana pakahi ia makou ekolu."
I ko Ioane lohe ana i keia olelo hooholo a lakou, hookokoke aku la ia i ke kauka, a kikoo ae la kona lima, me ka olelo, "E ke kumu, eia ko'u lima: mai hahau ia lakou; e hahau mai ia'u.
Holoi iho la ua kauka la i kona mau waimaka me kona hainaka, a kauoha aku la i na keiki e hoi i ko lakou mau noho, me ka olelo, e noonoo no ia a hiki i kona la e make ai; aole nae i hookoia ua olelo hooholo la.
Pehea, e na keiki Hawaii, he aloha anei ko oukou kekahi i kekahi, e like me ua mau keiki la i oleloia maluna ? E'a ka Iesu "kauoha hou;" E aloha aku oukou kekahi i kekahi. L. L. N.
KA UKU MAKAHIKI O PAULO, KA APOSOTOLO.
Oia hoi ka pololi, makewai, hookeai, ka pilikia i ke kapa ole, ke kokoke ana i ka pilikia e make ai ka hoomauia, ka hahauia ana, a me ka make. Ua like no ia me ka uku o kekahi mau luna hai-olelo i keia wa; ia Paulo nae ka oi.
PENEI E LOIHI AI KE OLA ANA.
E hoomaikai oe i kou makuakane, a me kou makuahine, i loihi ai kou mau la maluna o ka aina a Iehoba a kou Akua i haawi mai ai ia oe.