Ke Alaula, Volume II, Number 10, 1 Ianuali 1868 — Page 40

40 KE ALAULA.

O ELI A ME SAMUELA.

                Mamua aku o ka noho ana o Davida maluna o ka noho alii o ka Iseraela, ua hooponopono a alaka na kaula a me na lunakanawai i ka lahui kanaka o Iseraela. E noho kahuna nui ana o Eli, kekahi kaula o ke Akua, ma kahi o ka pahu berita ma Silo. Nonoi aku kekahi wahine a Elekana, o Hana kona inoa, i ke Akua i keiki, a hanau mai oia kana wahi keiki hanau kahi, a kapa aku i kona inoa o Samuela. O ke ano o keia inoa Samuela ma ka olelo Hebera, oia keia, i noiia.--1 Sam. 1:20. A nui iki ae ua keiki nei, a ukuhi kona makuahine iaia, lawe aku oia iaia ia Eli ma Silo e hoolilo iaia na ka Haku. Halihali pu aku oia i kona mohai aloha, ekolu bipi, a me kekahi palaoa, a me ka omole waina. A hiki aku ua makuahine nei me kana keiki milimili hookahi, olelo aku kela ia Eli, "O keia keiki ka'u i pule aku ai; a ua haawi mai o Iehova ia'u i ka'u noi a'u i noi aku ai iaia. No ia mea, ke haawi aku nei au iaia no Iehova. I na la a pau o kona ola ana, e haawiia oia no Iehova."--1 Sam. 1:27, 28.
                Ma ke kii i hoikeia'i maluna, ke ike la kakou ia Eli i aahuia me kona mau kapa kahuna,—he papale ano e ma ke poo, a o ka pale umauma ma kona umauma, kahi i hoonohoia na pohaku he kumamalua. Ke hoolilo aku nei o Hana i kana keiki, o Samuela, ia Eli ka malama, a ke kukuli aloha aku nei oia, e uwe aku ana i kana wahi keiki, me ka honi aku paha iaia. Aloha wale kahi makuahine i ke kaawale ana mai kana keiki aku. Ehaeha kona naau e like me na makuahine a kakou i hookuu aku i ka lakou mau keiki e noho ma na kula hanai, a holo aku i na aina e e kula ai. Ua like ia mau makuahine me Hana. He kula hanai maikai hoi ka Samuela i noho ai, oia hodi ka hale a Iehova.
                A hoi aku na makua i ko laua wahi noho no Eli, ke kahuna." "Hana iho la kona makuahine i wahi lole komo uuku nona, a lawe mai ia mea iaia i kela makahiki keia makahiki, iaia i hele mai ai me kana kane e kaumaha aku i ka mohai makahiki."
                He makuahine keia i imi ole i kona oluolu iho, aka ua imi i ka pono o kana keiki a me ka hoonaniia o Iehova, a he hopena pomaikai loa ka i loaa i ua keiki la.

BETELEHEMA.

                He mea maikai paha ke hiki i kekahi o kakou ke hele a makaikai i keia wahi o Betelehema, kahi i hanauia ai ke keiki Iesu. Aia o Betelehema maluna o kekahi puu, a he mau pali ma na aoao o ua puu la. Ua eliia ke alanui ma kekahi aoao e pii ai i ka ipuka o ke kulanakauhale; he pohe, e like me ke pohe a kakou e kakau nei ma ka papa eleele, oia ka pohaku ma kahi i eliia. Ua hele malaila kekahi kanaka makaikai malaila, a i kana hai ana mai, he olioli na alanui o ia kulanakauhale, a he pelapela no hoi. O ka laula o na alanui, elima wale no paha a eono paha kapuai. Ua moe ua kanaka makaikai nei ma ka hale o kekahi mau moneka Sepania e noho ana malaila. He maikai no ke keena kahi ana i moe ai, ua haliiia ka papa-hele i ka moena huluhulu, a he mau pela maikai e waiho ana ma ka papa, oia no kahi moe i hoomakaukauia nona. Alakai ae la na moneka iaia iluna o ka hale i ka liula e nana aku i ka aina e waiho mai ana. Ike ae la ia i na kula holoholona mawaho ae o ke kulanakauhale, kahi i malama ai na kahuhipa i ko lakou mau pu-a hipa, i ka po i hanauia ai o Iesu, i kela wa kahiko.
                He mea kupanaha hou ae hoi kekahi a na moneka i hoike ai iaia. Alakai aku la lakou iaia i ko lakou luakini, a iho ae la ma kekahi alanui alapii pohaku, a komo i kekahi keena uuku poepoe malalo o na luakini la. "Eia maanei," wahi a lakou, "kahi i hanauia ai o Iesu." He mapala keokeo ka papa-hele o lalo, a he mau kukui kala e a ana i malamalama ua keena la. Ma kekahi aoao, he pahu mapala, ua like ke ano me ka pahu hanai lio, ua hoomaikaiia o loko i ka lole kilika pahee ahinahina. "O ka pahu hanai holoholona keia," wahi a lakou, "kahi i waihoia ke keiki Iesu i ka wa i hanauia'i."
                Noonoo ae la ka mea makaikai: "Aole paha pela ke ano o ia pahu hanai holoholona. No ka poe mahope mai no paha i hana i keia pahu. He wahahee wale no na lakou nei."
                He kii kekahi o ua mau moneka nei, a ua kapaia ua kii la o Iesu. Ke hiki mai ka la Keritimasa, ia manawa aahu lakou i ua kii la i na kapa kupono i ke keiki hanau hou, a waiho ae iloko o ka pahu mapala, alaila kukuli ilalo, a hoomana lakou i ua kii la.
                Pela anei e hoomana ai, a e hoonani ai i ka Haku Iesu Kristo?--e like me keia mau moneka Katolika? C. L.

KULA POKII.

SABATI I.
KO IESU HANA MANA MUA.

1. Heaha ka kekahi kanaka waiwai i hana ai?
Hana oia he ahaaina mare.
2. Owai kekahi poe ana i kahea ai?
O Iesu a me kana mau haumana.
3. O lakou wale no anei ka i kaheaia?
Aole; he nui no ka poe i kaheaia.
4. Owai hoi kekahi i hiki aku i ua ahaaina la?
O Maria, ka makuihine o Iesu.
5. Heaha kekahi mea inu ma kela ahaaina?
He waina.
6. Ua lawa anei ka waina i hoomakaukauia?
Aole; pau e no.

SABATI II.
KO IESU HANA MANA MUA.

1. Ike anei o Iesu i ka pau ana o ka waina?
Ae, ike no oia.
2. He hiki anei ia Iesu ke hana i waina hou?
Ae; nana no i hana i ke ao nei a me na mea a pau.
3. Heaha ka mea e ku ana malaila?
E ku ana eono ipu pohaku.
4. Pehea ka Iesu olelo ia lakou?
E hoopiha i na ipu pohaku i ka wai.
5. A piha iho, pehea ka Iesu olelo?
E hookahe mai, a lawe i ka luna ahaaina.
6. A hoao iho la ka luna o ka ahaaina, pehea kona manao?
Kahaha oia i ka maikai o keia waina a Iesu i hana ai.
7. No keaha la i hana aku o Iesu i keia hana mana mua?
I mea e hoike aku ai, oia no ke Keiki a ke Akua, a ua manaoio no kana mau haumana.

SABATI III.
HE MAU HANA MANA--OLA KA MAKAPO.

1. Mahope iho o ko Iesu hoolilo ana i ka wai i waina, hana hou anei oia i na hana mana?
Ae; he nui no na hana mana ana i hana ai.
2. Heaha kekahi?
Hoola i ka poe mai, hookaakaa i na maka o na makapo, hoola i ka poe kuli, a me na oopa.
3. I ko Iesu hiki ana i kau wahi pehea na kanaka?
Imi mai ka poe mai iaia, a pipili mai.
4. Kipaku anei o Iesu ia lakou no ka hoopilikia mai iaia?
Aole no; aka, ua hoolaia lakou a pau.
5. Pehea kona hoola ana i kekahi makapo?
Olelo o Iesu, "E ike oe," a ike koke iho la no ia.

SABATI IV.
HOOLAIA KE KULI, A ME KA MAI MOE LOA.

1. Pehea ko Iesu hoola ana i kekahi kanaka kuli?
Hookomo oia i kona mau manamana-lima iloko o kona mau pepeiao, a hoopa mai la i kona elelo.
2. Oia wale no anei?
Aole; nana ia iluna, a i mai, "e wehe ia."
3. A pehea iho la ke kuli?
Poha ae la kona mau pepeiao, a hoaluia ke kaula o kona elelo, a olelo maopopo mai la ia.
4. Pehea ka loihi o ka moe ana o kekahi kanaka mai i loaa ia Iesu?
He kanakolu-kumamawalu makahiki!
5. Pehea ka pane ana o Iesu iaia?
"Ea, ke makemake nei anei oe e ola?"
6. A ae mai ke kanaka, pehea hou ka Iesu olelo?
"E ku ae, e kaikai i kou moe a hele."
7. A hoao ke kanaka e ala, he hiki anei?
Ae; ala koke mai no ia a lawe i kona moe, a hele aku la.

                KA OGANA O KAWAIAHAO.—Ua paa iho nei ka ogana o ka luakini o Kawaiahao i ka hanaia, a ma ka la 25 o Dekemaba i hala, ua hookaniia ua pila la, a ua halulu launa ole kona leo. He pila maikai a nani no keia.

KE ALAULA.
He Nupepa Hoikeike Kii.
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.

                25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ke ope hookahi, ME KA HOOKAA MUA IA MAI.
O. H. KULIKA, Luna Hoopuka.