Ke Alaula, Volume II, Number 9, 1 December 1867 — Page 36

36 KE ALAULA.

KA HOPENA O KA HOOIKAIKA ANA I KA HANA.

                Aia ma na mokuaina hikina akau o Amerika Huipuia, e noho ana kekahi wahi wahine kane-make, o Kolena kona inoa, me kana wahi keiki kane opio, o Kale kona inoa. Ua hele na wahi wahine nei a puainea, no ka hana nui i kela la keia la, i loaa ka mea e ola'i laua.
                I kekahi ahiahi, e noho ana oia me kana wahi kamakahi, ma ka puka o ko laua wahi hale, puana aku la o Kale he wahi huaolelo nahenahe i kona makuahine, "E kuu mama, ua makemake au e hana i loaa kahi dala." Kahaha iho la kona makuahine, a pane mai la, "No ke aha?" Pane mai la kela me na maka i piha i na waimaka, "No ko'u makemake ole e make koke oe i ka hana mau ana i na hana kaumaha." I aku la o Kolena me ka maka i piha i ka menemene, a me ke aloha, "E kuu kama, e kali oe a kanakamakua." "Aole e hiki ia'u ke kali a hiki ia manawa." A hele aku la kela e hana i kana hana mau, uwi waiubipi, hanai manu, halihali wai no laua.

Imi hana o ua o Kale.

                A no ka nui o kona aloha i kona wahi luaui makuahine, a me kona makemake a lealea maoli no i hana, e kawili mau ana kona naau ma ia mea hookahi, "Pehea la e loaa ai ia'u ke dala?" A no ka hiki ole iaia ke kinai iho, a uumi ia manaolana ona; eu ae la ia mahope o ka pau ana o ko laua paina ahiahi, a niau aku la e hele i ka hale o kekahi kanaka waiwai, i kapaia o Lipine, aia kela maluna o ka noho paipai, e heluhelu nupepa ana, ku iho la keia ma ka puka, wehe ae la i kahi papale ona, a kikeke aku la; huli mai la kela a ninau mai la, "Heaha kau?" pane aku la keia, "E Mr. Lipine, aole anei ou makemake e hoolimalima i wahi keike kane hana nou?" A no ko ia la manao he mea poho wale no ka hoolimalima i na keiki liilii e like me ia, pane mai la ia, me ke kau no o na maka i ka nupepa, "Aole."

Loaa ka hana ia Kale--o ka mahiai.

                No ia mea, huli ae la ua wahi Kale nei a hoi luuluu aku la i ke one o Hanakahi. Ma ke alanui e pili ana i ka hale o Pilipo, kekahi elemakule mahiai, a ninau aku la iaia, "E Pilipo mahiai, heaha kou mea i kiola'i i keia mau lala ohelopapa?" Puiwa ae la kela, a pane mai la, "No ka lawa no hoi paha a koe, a oia no hoi ka mea e hua nui ai ka ohelo." Ohi iho la ua o Kale i ua mau lala ohelopapa nei, "a ku ka pua, hana ka haawe," hoi ana, no ka mea ua olelo mai ua hapauea nei, "He ulu no ia ke kanuia."

Kanalua ka manao o kona makuahine.

                A hiki ia i ko laua home, ninau aku la kona makuahine me ka hoomaauea, "I lawe mai nei oe i keia mea i mea aha?" "I mea kanu, a loaa mai ka hua kuai, a loaa mai ke dala; no ka mea, pela mai nei o Pilipo ia'u." Ala ae la ia i ka wanaao, a kanu iho la i kana mala ohelopapa, me ka lulu mau i ka lehu iwaena o kana mala. Hele mai la kona makuahine, a pane hou mai la ma ke ano hoopohala, "Makehewa ka luhi, aole e ulu ana." Pane aku la o Kale i kona makuahine, "E ai ana kaua i ka hua o keia mau ohelo i kela makahiki aku."

Ka loaa ma kela hana.

                I ka wa e hua ana ka ohelo, a e pala nui ana, holokaa ae la o Lipine hanohano i ke ahiahi, i

ka wa malu o ka la, e makaikai i ua mala ohelo nei a ua o Kale, no ka mea, ua lohe ia i ka akena a ka poe i ike i ua mala ohelo nei a Kale. Ia ia i ike aku ai, anoi iho la kona naau e lilo kona hua a pau iaia, nolaila, hoolalelale koke ae la ia i kona mau lio kauo kaa, a holo aku la i kahi o Kolena, ka makuahine o ua Kale nei, a i aku la iaia, "Ina makemake oe e kuai i ka ohelo, e haawi no au he hapaha ko ke kini ohelo." A i aku la ia, "Aole na'u ia mala ohelo, na Kale no." A hele aku la ia e kuai me Kale. A kuai iho la o Kale he 60 kini ohelo ia makahiki, a loaa iho la iaia he $15 ia makahiki. A ia makahiki aku ua loaa iaia na dala he kanahiku. No ka mea, ua waiho kela i na dala mua i ka Baneko. Oia ka hua a kona lima ponoi.
                E na makua a me na keiki, e nana mai i keia makuahine, a me kana keiki, a e hoomanao iho i keia mau wahi olelo paipai.
                1. Ina e hoomaka ana na keiki e hana i kekahi hana maikai, mai olelo na makua, "He makehewa," aka, e hoolana pinepine i ko lakou mau manao.
                2. Mai hoopunahele i na keiki, e haawi i mau wahi hana kupono ia lakou, i maa i ka hana, a i ikaika ke kino.
                3. E na keiki, e imi wahi hana na oukou, i loaa'i keahi dala, no ka mea, o ke dala i loaa ma kau hana ponoi iho, he mea ia e hookuonoono ai, a oia ke dala i oi aku mamua o ke gula loaa wale. M. K.

KULA POKII.

SABATI I.

                1. A lilo o Iesu, i kanaka makua, heaha kana hana i hapai ai?
                O ke ao aku no kona Makua; he haiolelo.
                2. Mahea kona wahi i haiolelo ai?
                I kekahi manawa ma na luakini, a i kekahi manawa ma na papu; i kekahi manawa ua noho oia ma kekahi puu.
                3. Pehea hoi kekahi haiolelo ana a Iesu?
                Noho oia ma kekahi moku, a ua ku mai ka lehulehu ma kapa kahakai.
                4. Noho paa anei oia ma kahi hookahi?
                Aole; kaahele oia i ka aina, e hele ana ia wahi aku, ia wahi aku.
                5. Hele hookahi anei o Iesu i kona kaahele ana?
                Aole; he poe makamaka he umi-kumamalua i hele pu me ia i na manawa a pau.
                6. Kapaia keia poe heaha?
                He mau haumana, a o na lunaolelo hoi he umi-kumamalua.

SABATI II.

                1. Owai na inoa o na haumana a Iesu?
                O Petero, o Ioane, o Iakoba, a me Toma, oia kekahi o lakou.
                2. Heaha ka Petero oihana?
                He lawaia kana hana i ke ao, a i ka po no hoi i kekahi manawa.
                3. Heaha kana mau mea hana?
                He waa lawaia kana, a he upena.
                4. Owai kekahi mea waapa?
                O Iakoba me Ioane, a he mau kanaka lawaia hoi laua.
                5. E hele ae ana o Iesu, owai kana i ike ai?
                Ike oia ia Petero a me kona kaikaina, o Anederea, e lawaia ana me ka upena, a kahea aku ia laua e hele pu me ia.
                6. Owai hou kana i ike ai a i hea aku ai e hele pu?
                Ike oia ia Iakoba a me Ioane e hono ana i ka laua mau upena maluna o ka moku, a kahea aku.
                7. Pehea keia mau kanaka eha?
                Haalele lakou i na moku a me na upena, a hahai koke ia Iesu.

SABATI III.

                1. No keaha la i hea ai o Iesu i keia poe haumana e hele pu me ia?
                I hiki iaia ke ao aku ia lakou no ke Akua, kona Makua.
                2. I aoia hoi lakou e aha?
                E ao hou aku ai lakou ia hai.
                3. I kahi mehameha, heaha kana i ao aku ai ia lakou?
                I na mea hou no ke Akua i lohe ole ia mamua.
                4. Aloha anei lakou ia Iesu?
                Aloha no, aka ua oi ke aloha o Iesu ia lakou.
                5. Kapa aku lakou iaia pehea?
                Kapa aku lakou iaia he Kumu a he Haku.
                6. Pehea na mea i loaa mai iaia?
                Mahele pu oia ia mau mea me lakou.

SABATI IV.

                1. He hale anei ko Iesu e noho ai?
                Aole ona hale; he uuku loa hoi ke dala iaia.
                2. Pehea lakou i kekahi manawa?
                Luhi loa i ka hele wawae i kahi loihi.
                3. Ua hookipaia mai anei lakou ma na hale?
                Ae; ua hookipa mai no na makamaka a lakou.
                4. Pehea kekahi poe?
                Ua hoino mai a henehene mai ia Iesu.
                5. He mau kanaka hemolele anei na haumana?
                Aole; he poe hewa e like me kakou nei.
                6. Heaha kekahi hewa a na haumana i ikeia?
                Kue no lakou kekahi i kekahi i kekahi manawa, a ua hana ino aku ia hai.
                7. No keaha la i hoano e ia lakou i pono ai?
                Na ka Uhane no o Iesu.

A HOIHOI KA NAAU, HOLO KA HANA.

                Ua hele kekahi kanaka i ka holoholo me kekahi poe keiki liilii ma kahi loihi mai ko lakou home aku. I ka hoomaka ana e hoi, pilikia loa mai na keiki uuku no ka luhi loa o ko lakou mau wawae--maloeloe na ami, a uwe mai lakou i ka eha. Aole eha a koe; pehea la e hiki ai ia lakou ke hoi i kahi loihi? Pilikia ua kanaka la i kana ohana keiki liilii. Noonoo oia i ka mea e hiki ai. I iho kela i na keiki, "E lawe kakou i mau lio no kakou e hoi aku ai, i luhi ole kakou." Oki mai oia i mau laau me he aho hale la--nona iho kekahi, a no lakou pa-kahi a pau. Hanaia he mau kaula-waha no na lio laau a lakou. kau iho lakou maluna, mukiki iho na waha, a eeu loa na lio wawae liilii i ka holo. Lelele iluna a ilalo kekahi mau lio, a ka loa no i ka holo. Pela i hoi lealea aku ai keia poe hooholo lio laau a hiki aku i ko lakou wahi; aole no i luhi. He kaumaha ka hana i ka mea paupau-aho--he holo hoi ka hana i ka hoihoi o ka naau. "O ka naau olioli, he laau lapaau ia e hooluolu ana."—Sol. 17:22.

                Ina e hoohewa ole mai ko kakou naau ia kakou iho, alaila ua loaa ia kakou ka wiwo ole imua o ke Akua.