Ke Alaula, Volume II, Number 8, 1 November 1867 — Page 32

32 KE ALAULA.

 

KA LAKA.
(THE LARK.)

                He manu keia i ala i kahiaka nui loa a hoopuka i kona mau leo oli.
                                Ala keiki, ala mai,
                                E nana i ka la laelae,
                                E nana i na kulu hau
                                Iluna o na lau,
                                Koi ka bele e ala'e,
                                E kuu keiki makamae.

KA MISIONA RI MA AINAOMAOMAO.

                Hele aku kekahi kane ka me ka ke Akua olelo i na kanaka o Ainaomaomao. Komo aku i kekahi hale a hai aku, "Eia ka olelo a ke Akua—he makemake anei oukou?" Pane ae kekahi, "Heaha kau i hele mai ai ia nei? He mau akua no ka makou." Hele hou aku kela i kekahi hale, a ninau aku, "Ua ike anei oukou i ke Akua?" Pane ae kekahi o lakou, "Ae, ua ike no makou i ke Akua, a he mau akua hoi ka makou. Heaha kau i hele mai nei?" A pela hou aku i na hale, a kipaku hou ia mai no. A komo aku kela i ka hale o kekahi kanaka, a hoomaka i ka heluhelu i ka moolelo no Iesu. Heluhelu kela, a pau, pane mai ua kanaka la e heluhelu hou. Heluhelu hou aku no kela, a pane hou mai ua kanaka la e heluhelu hou. Heluhelu hou aku no kela, a pane mai ua kanaka la, "Ina oe e heluhelu a po keia la, a ao ka po, a po ka la apopo, aole no e ana wau; makemake loa wau e lohe i kau e heluhelu nei no Iesu ka Hoola."
                Aia la! ua komo ka Uhane o ke Akua iloko o kona naau, a o ka mea a na kanaka mua i hoowahawaha ai a molowa i ka lohe, he mea momona loa ia, a makemake loa ia e keia kanaka. Kupaianaha ka hana o ka Uhane Hemolele.

KA HELE ANA E MAKAIKAI IA HAWAII.

MAKAWAO, Sepatemaba 10, 1867.
                E KE ALAULA E—Aloha oe:--Ke manao nei au e hai aku ia oe i kekahi mau mea e pili ana me kuu holo ana ma Hawaii. I ka la 6 o Augate ee aku makou maluna o Kilauea e holo aku i Hawaii. He la oluolu no ia; holo no makou ia la a po.

Ku makou i Kealakekua.

                I ka hora eiwa o ia la ae pae no makou ma ka Lae o Kaawaloa. He nui na manao iloko o makou i ka ike hou ana ia wahi kaulana i ka wa kahiko. Ua komo makou iloko o ka hale o kekahi alii wahine, o Mrs. L. K. Pratt, kuu hoa kula mamua. Aloha pu no makou, ai alani a me ka ipu, a honi ae i ka makani o Kaawaloa, a ee makou a pau maluna o ka moku ahi.

A hiki makou i Kailua.

                Lele hou makou a halawai me Simona;—oia no kekahi haumana o Mr. E. Bailey.--He kumu kula oia malaila i keia wa. Ua hookipa maikai no laua ia makou. Ua i mai na mea ai poi, ua ono loa ka poi o ia wahi. Mamua o ko makou haalele ana ia laila, pule no o Simona me makou, alaila ee hou makou maluna o Kilauea.

No Kawaihae,

                I ke kakahiaka o ka Poaha ku ma Kawaihae. Pae hou ma ka aina, a komo iloko o ka hale o Mr. Conway, a hookipa kona wahine, oia no o Pualinui, ia makou. He wahine oluolu loa keia. He nui ka poe i hookipaia malaila me ka uku ole. Haalele makou ia Kawaihae, a holo aku la a pae ma Mahukona. Ma ia wahi olelo makou "goodbye" Kilauea.

Hookipaia ma Waimea.

                I ka la 16 holo no au i Waimea, a noho no hookahi pule me Rev. L. Laiana ma. Maanei, me he la ua loaa hou mai ia'u ka makani kolonahe o Makawao. He wahi maikai keia, a he olioli kuu naau i ka hoomanao ana i ka lokomaikai o na kamaaina o Waimea me Kohala. O ke Akua kekahi me lakou. Mahope holo au i Eleio e ike ia Mrs. J. L. Elemakule, oia no o Loeau. Ua olioli au i keia halawai ana, no ka mea ua huli mai kela iloko o ka pono. Ua hoikeike imua o'u i kona noho ana i keia manawa, me kona hoowahawaha i kana hana kahiko ana. Ua hoomaka no ia he kula haole me na keiki o ia wahi, a ke hooikaika nei na ia ma na hana a ka Haku. Haalele makou ia Eleio, a iho ilalo o Waipio.

No Waipio.

                Nani maoli ia wahi. Hiki makou ilalo, komo iloko o ka hale o ka Lunakanawai, o Halemanu. He hale laau kona. Maloko o ia hale ua makaukau no oia me kona ohana i na keena moe, keena ai, keena hookipa, a maloko o ia mau keena na papaaina, na noho, na moe; he lako loa no. Ua halii no ka papaaina, a ua kau nui na pa ki, a he ki a he kope, me na mea ai he nui. O kona wahine ke kuke, a oia no ke kuene. Pau ko makou ai ana, ua makaikai aku makou i ka luakini maikai. Halawai no makou me na kanaka o ia awawa o Waipio, lulu lima, kamailio pu, a kakahiaka o ia la aku hoi no makou i Waimea, e ohu ana i na lei aiai--lei ilima, lei hala Polapola, lei o ke Koolau mai--maluna o ko makou mau ai. Ke waiho nei ko makou aloha me na makamaka a pau o na wahi a makou i hele ai e makaikai.
Owau no me ka mahalo,
M. E. GREEN.

KULA POKII.

SABATI I.

1. Holo aku o Iosepa a me Maria ihea me ko laua keiki?
Holo lakou i Aigupika.
2. A make o Herode, pehea mai ka anela a ke Akua?
Kauoha oia ia Iosepa e hai aku i kona aina, no ka mea ua make o Herode.
3. Pehea ka Iosepa hana?
Kau aku oia ia Maria a me ke keiki maluna o ka hoki, a hoi lakou.
4. Heaha la ka hana a Iosepa?
He kamana.
5. Pehea o Iesu?
Noho oia me Iosepa e me Maria, a hoolohe ia laua.
6. Pehea ka manao o kanaka iaia?
Aloha kona mau makua, a me na kanaka a pau iaia.

SABATI II.

1. A nui ae o Iesu, heaha kana hana?
Ike oia, o ke ao aku i na kanaka no ke Akua oia kana hana.
2. Hele mua oia mahea?
Hele aku oia i kahi mehameha, i ka waonahele.
3. He hale anei malaila?
Aole; aole he hale, aole he kanaka, aole he ai.
4. Pehea ka noho ana ma ia wahi?
He pilikia loa; he anu i ka po, a he wela i ke ao.
5. Owai na holoholona malaila?
He liona, he bea, a me na iliohae.
6. Pehea lakou?
Uwo mai lakou; aka paulele o Iesu i kona makua.

SABATI III.

1. Heaha ka ai a Iesu ma ka waonahele?
Noho kela me ka ai ole i na la he kanaha.
2. Pehea la i make ole ai oia i ka pololi?
Malama ke Akua iaia.
3. Owai ka i hele mai a kamailio me ia?
O Satana.
4. He kanaka ia--he anela anei?
He diabolo o Satana.
5. Heaha kana i hele mai ai?
Hele mai oia e hoowalewale ia Iesu.
6. Heaha kana i olelo mua mai?
E hoolilo mai oe i keia mau pohaku i berena.
7. Ae anei o Iesu?
Aole; ua hoole kela i ka Satana.

SABATI I V.

1. Kaikai o Satana ia Iesu ihea?
I kahi puu oa o ka luakini ma kahi kiekie loa.
2. Heaha ka olelo a Satana?
E lele iho oe ilalo, no ka mea e malama kou Makua ia oe, i ole e eha.
3. Ae anei o Iesu i keia kauoha pono ole?
Aole; ike no kela he mea hewa ia i kona Makua.
4. Lawe hou o Satana iaia ihea?
Maluna o kekahi mauna kiekie, a hoike iaia i na aupani a me na mea nani o ke ao nei.
5. Heaha kana olelo?
O keia mau mea a pau ka'u e haawi ai ia oe ke kukuli a hoomana mai oe ia'u.
6. Pehea aku o Iesu?
E hele pela oe, e Satana; e hoomana au i ke Akua wale no.
7. Pehea iho la o Satana?
Haalele mai iaia, a hele mai na anela e lawelawe nana.

                Ke komo mau mai nei na moku okohola ma ke awa o Honolulu i keia manawa. He kanakolu-kumamalua ka nui o na okohola e ku nei, a ua piha pono no hoi lakou a pau i ka aila. Kai no paha ua pau na kohala i ka make, eia ka aole.

KE ALAULA.
He Nupepa Hoikeike Kii,
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.

                25 keneta ka uku no ka makahiki no ka pepe hookahi; 20 keneta pakahi ka uku no na pepa he iwakalua a oi aku paha ma ke ope hookahi, ME KA HOOKAA MUA IA MAI.
O. H. KULIKA, Luna Hoopuka.