Ke Alaula, Volume II, Number 8, 1 November 1867 — Page 30

30 KE ALAULA.

kou holoholona i malama loa ai. Ai no hoi o Kauka Kaina i ka ilio a me na iole i loaa ia lakou maluna o ka moku. Loaa ia lakou ma na ae kai na ilio-holo-i-ka-uaua a me na elepani-kai. He makau na kamaaina Ekimo i keia holoholona nui, aka make no ia lakoa i kekahi manawa. I ka hoi ana mai o Kauka Kaina i Piledelepia, hoopuka oia he buke moolelo o na mea ana i ike ai ma ia aina anu, a ua piha ia buke i na kii nani loa. Eia mai ke kii o ka elepani-kai.

MAI MAKAU.
NEVER BE AFRAID.

( GOLDEN CENSER.)
1. Mai makau e olelo ae no Iesu,
No ka mea e ola'i
Mai makau e ae e lilo nona,
Nana i aloha mai.
CHO.—Mai makau oukou,
Mai makou oukou,
Ole, ole, ole,
Iesu no ke Ola aloha,
A, nolaila, mai makau.
2. Mai makau e hana pu no Iesu
Ma ko ia la kihapai,
Hana me ke oli a aloha,
Nana no e uku mai.
CHO.—Mai makau oukou, &c.
3. Mai makau e hali pu no Iesu
I na ino o ke ao,
Ahonui ae ke hoaoia,
Ahonui no Iesu.
CHO.--Mai makau oukou, &c.
4. Mai makau e paio pu no Iesu
I ko ke ao, i ko ka po,
Nana e kokua, a hoomalu,
A hoolanakila no.
CHO.—Mai makau oukou, &c.
5. Mai makau e make pu no Iesu,
Oia no ke Ola mau:
Nana no oukou e kai malie
I ka lani ao mau no.
CHO.—Mai makau oukou,
Mai makau oukou,
Ole, ole, ole,
Iesu no ke Ola aloha,
A, nolaila, mai makau.
WAIKOLOA.

PEHEA LA E LILO AI AU I HAUMANA NAAUAO?

                Noho iho la o Iosepa e hoopaa I kona baawina ma ki Helukakau, Ua maopopo no iaia he haawina paakiki. Kakau oia i na hua helu o ka mele mua ma kona papa pohaku, alaila, kaha iho la i kii moku.
                Aole paha ia ka hoopaa ana ea? Nolaila, holoi o Iosepa i ke kii moku, a heluhelu hou i ka ninau me ka i ana, "Aole maopopo ka hana mua." Komo kona lima ma ka pakeke, lalau i kona pahi a me kekahi apana o ka wilou, a hoomaka e hana i mea hokiokio. Pela anei e paa ai ka haawina?
                Ma keia hana, aole maopopo iki ke ano o ka hana e waiho ana imua ona. A pela paha ka manao o Iosepa, no ka mea, mamua o ka paa ana o ka mea hokiokio, ua hoihoi la iloko o kona eke, a ua lalau hou i ka peni, me ka nana hou i ka ninau. Wauwau o Iosepa i kona poo me ka olelo iho, "Oolea loa keia, aole e hiki ana ia'u, aole hoi e loaa ana ia'u; makehewa ka hana."
                Aka, penei la e maopopo ai i ke keiki mamua o ka hoao ana, ka hiki a me ka ole?
                Ia manawa, lele mai kekahi nalo uuku a kuu ma ka lima o Iosepa, nana pono oia i kona hoomaemae ana i kona kino, me ke kahi ana i ke poo, a lele ae, a i kona lele ana, alualu o Iosepa iaia.
                Aole paha ia ke ano o ka hoopaa ana i ka haawina ea? Manao anei oe ua hiki ke hoopaa i kekahi haawina, ma ka huinahelu paha, ma ka mea e ae paha ke hana pela? aka, pela no ka hana a kekahi mau keiki. Lalau ko lakou manao ma na mea e a pau, aole paa iki ma ka pauku. Pehea ko lakou noho ana ma ka papa? Ua haule loa o Iosepa i hope, i ka welau loa, kakaikahi ka pii iki ae.
                I kekahi la, hoi oia i kona home, me ke kanalua loa, a penei kana olelo ana, "E kuu makuahine, ua hoopilikia wale ka Huina Helu ia'u, aole au i ike i ka waiwai o ka helukakau, ua pohihihi no ia ia'u i neia manawa e like me ka la mua o ka hoomaka ana ia buke. Aole anei e hiki ia'u ke haalele, aole hoopaa hou malaila."
                I mai kona makua, "Nui ka ike, ka naauao o ka Huina Helu, a ua makaukau ia e hai aku ia oe i na mea a pau iloko o kona waihona ike, ma kuu ae ana i kekahi mea."
                Olelo hou o Iosepa, "Aia no au malalo loa o kuu papa, a e mau ana ko'u noho ana malaila." "
                Pela no paha," wahi a kona makua, "no ka mea, aia no ia oe ke koho ana e lilo i mea nau e makemake ai, a e ko no ia."
                Pane mai ua keiki nei, me he mea la ua loaa kekahi manao hou, "Hiki anei ia'u ke hana ia'u iho? ke koho i kuu wahi e ku ai, ka naue ana imua paha, ka emi ana ihope paha?"
                "Ae, aia no ia oe ka lilo ana i haumana naauao a akamai, a i haumana naaupo a hupo loa paha."
                "Pehea la e lilo ai au i haumana naauao?" wahi a Iosepa.
                Ma ka ae ana i ka mea hookahi, oia ka hoolohe pono, me ka noonoo nui, aole he kumu e ae, he uku e ae, he ala e ae e loaa'i ka ike me ka naauao. Ma ia mea hookahi e lilo ai ke keiki i keiki ano pono, ano naauao, i koa makaukau, a i generala maikai, a ma ia mea e hiki ai ke lanakila maluna o na haawina paakiki a pau. F. M.

O KA BEBE ME KA PAHI-UMIUMI.

                He wahi kaikamahine uuku o Ane, nona ka makahiki hookahi me ka hapa. I kekahi la Sabati ua lawe aku kona makuahine e hoomoe iaia ma ke keena maluna i ke awakea o ua la Sabati nei. Ke ano o keia wahi bebe liilii he wahi kaikamahine maikai, pua mai ka ula mai kona mau papalina mai, omaomao maikai mai kona mau onohi maka, uliuli maikai kona lauoho. I keia wahi Ane e hiamoe ana ma kona wahi moe liilii, ala oia a noho iluna. Ike aku oia i ka pahi-umiumi o kona makuakane e waiho mai ana maluna o ka pahu-ume; lalau aku ia me kona lima a paa iho, a hiamoe hou aku no. Komo mai o Keoki, kekahi hoahanau o kona makuahine; e noho ana no lakou ma ka lumi hookipa. Honi aku kela ia lakou a pau a ninau aku o Keoki i ka makuahine, "Auhea kahi bebe?"
                Olelo mai ka makuahine, "Aia ma ke keena maluna, e hiamoe ana."
                Olelo mai ua wahi Keoki nei, "Makemake au e ike i ke keiki, a e honi aku iaia."
                Hoole mai ka makuahine, "Aole; mai pii aku oe e hoala, mahope uwe." Hoole mai kela, aole ia e hoala i ke keiki; e pii malie loa aku au me ka hoohaalulu ole."
                Hoole ikaika ka makuahine, aole nae i hoolohe o Keoki. Pii aku no ia me ka mama,—ekolu no kikoo ana kau iluna. Wehe malie aku oia i ka puka a nana aku i ke keiki; ua paumaele loa i ke koko, ua pulu loa kona kapa a me kona pela, kahe loa ilalo i ka moena. He mea weliweli ka ike ana aku o Keoki ua paumaele ke keiki i ke koko.
                Kii aku kela i ke keiki; e paa ana no ka pahi-umiumi ma ka lima o ke keik , ua moku ka lima, ua nui ke kahe ana o ke koko, kokoke e pau loa; ua keokeo kona mau papalima, kokoke e make. Hoalaia mai ke keiki mai kona wahi moe mai, ua nawaliwali. Holoi kela i kona lima a pau ke koko,—hookomo i kapa hou a hoopaa iho i ka moku o kona lima me ka mea pipili, a hoohoni aku o Keoki i kekahi omole waiala, a iho aku laua ilalo ma ka lumi hookipa. Aole hiki ia Keoki ke olelo aku i kona mau makua no kona weliweli i ka lima o ke keiki. Ike mai kona mau makua i ke keiki ua ano e kona mau helehelena, kaumaha ko laua manao no keia mea i loohia mai maluna o ka laua wahi opuu rose. Lohe koke laua no ka mea i loohia mai maluna o ke keiki, hoonani aku lakou i ke Akua no ka malamaia o ke ola o ka laua wahi milimili, ina ua make. Na ke Akua i hoopakele i ke ola o ke keiki; nana no hoi i alakai i kela makua e makaikai aku i ke keik e hiamoe ana. Ina aole keia makua, ina no ua make. Pela no, ke malama mau nei no ke Akua i na manu liilii a pau o ke kula; aole haule kekahi mea liilii hookahi imua o kona mau maka, ua pau loa i ka malamaia e ia.
                Nolaila, e na makua mea keiki, a i loohia kekahi o ka oukou mau keiki i ke ano pilikia e like me keia, mai hoino wale aku oukou i ke Akua no ka hoopilikiaia mai o ka oukou mau keiki, aka e hoonani aku i ke Akua, e like me ka hana ana a keia mau makua i ka laua wahi pua rose. Ua hoonani koke laua i ke Akua no ka malamaia o ka laua wahi manu liilii. Nolaila, aole keia he mea no kakou a pau e kanalua ai; ua malama ke Akua ia kakou mai ka mea nui a ka mea makalii loa; aole e hoonele ke Akua i ka malama ana ia lakou.

HE MAU KII HOU.

                Mamuli o ko makou kena ana, ua hoouna mai o Rev. E. W. Kalaka i kekahi mau kii maikai a nani no hoi no ka pepa nei o kakou. Maluna mai o ka mokuahi Idaho keia mau kii, a e puka ana kekahi o lakou ma ke ALAULA o Dekemaba. He mau kii nui wale no ka i hoounaia mai--na kii e makemake loa nei na keiki e ike.