Ke Alaula, Volume I, Number 12, 1 March 1867 — Page 48

48 KE ALAULA.

OLELO HOOLAHA.

                I keia helu, pau ka makahiki mua o ke ALAULA, a ke hoike aku nei makou i ko makou aloha me ka mahalo i na mea a pau i kokua mai ia makou ma keia hana, ma ke kakau manao ana, a ma ka noho luna ana.
                Ua hoolaha makou ma ka helu 11 i na inoa o na makamaka i kokua lokomaikai mai ma ka hoolaha ana i keia pepa iwaena o ka lehulehu..
                Ina e ku mai o "Hoku Ao" iloko o keia malama, e loaa ana ia makou he papa keleawe poo hou no keia pepa, i mea e hoonani hou ae i kona mau helehelena.
                Ke lana nei ko makou manao e mau mai no ka lokomaikai o na makamaka o ka makahiki i hala, a e nui hou ae ka laweia ana o ke ALAULA i ka lua o ka makahiki o kona ola ana.
                O ka uku, e like ana no me ko ka makahiki mua, me ka hookaa mua mai no.
                E kauoha mai na luna i ka nui o na pepa a makou e hooili aku ai i keia makahiki hou aku.
O. H. KULIKA.

NO KEKAHI KEIKI HIPA.

                Hai mai kekahi kumu kula Sabati i keia moolelo iho, penei: I ka loaa ana ia'u na makahiki elua a me ka hapalua, hoouna aku kuu makuahine haipule ia'u i ke kula Sabati. O ka olelo ao a kuu papa kula, oia keia: 'E hooikaika no wau.' I ka loaa ana ia'u na makahiki eiwa, hoouna'ku kuu makuakane ia'u i kekahi la noa, e kii i ka pu-a hipa, a e hookomo mai i ka pa hipa. Ho-a mai wau ia lakou a loaa kekahi muliwai uuku, a ilaila makau loa lakou i ka wai, a holo liilii aku ma kela aoao keia aono, no ka makau i ka wai. Hooikaika nui no wau, aole nae hiki iki na hipa, a mai manaka wau. Aka, hoomanao aku wau i ka olelo ao a kuu papa kula—- E hooikaika no wau; nolaila, hoao hou aku wau. Hopu aku wau i kekahi keiki hipa, a kaikai aku iaia iloko o ka wai, a kau i kela kapa o ka muliwai, o ka hahai mai no ia o ka makuahine o ua keiki hipa nei. Aole emo, pau ka pu-a hipa i kela aoao."
                Aole no e hiki ia kakou ke hoemu aku a ho-a aku i na kanaka a komo lakou iloko o ke aupuni o ko lani; aka, ina no e hoopau aku kakou i na keiki hipa liilii, a e halihali ia lakou ma ko kakou poli o ke aloha, aole emo a hahai mai no na makua i ke alakai ana a na keiki. E na alakai, "e maalea oukou e like me ka nahesa, e noho malie hoi e like me na manu nunu."
                Ke olelo nei ka Haku o Iesu nona iho: "Owau no ke Kahuhipa maikai; o ke kahuhipa maikai oia ke haawi i kona ola iho no na hipa."—Ioane 10:11. Ke olelo mai nei no hoi o Isaia no ka Haku: "E hanai no oia i kana ohana me he kahuhipa la, e hooiliili no hoi i na keiki hipa i kona lima a lawe hoi ia lakou ma kona poli."—Mok. 40:11.

NA KUMU LAAU.

                Heaha la ia mea, he kumu laau? a heaha la kona mau ano? E nana iho kakou, e na keiki aloha, i ke ano o keia mea o ke kumu laau kiekie, a me ke ano o kona mau lala malumalu. Ua uhiia i na lau uliuli e puka ae ana ma na aoao a puni, a o na pua no kekahi, me na hua maikai he nui wale a na keiki he lehulehu e ai nei i kela la i keia la.
                A ua ike kakou he aa kekahi o ua mau laau la, e holo ana mai ke kumu aku a ilalo, e imi ana malalo o ka ili honua ka mea e ola'i ke kumu laau, e like hoi me ko kakou mau lima e imi nei i na mea e pono ai na kino o kakou. He mea kupaa loa no hoi ke kumu laau ma kahi hookahi. E ole nae ke aa, lilo no ia i mea kulanalana, a hio i o a ia nei, a i mea puhi wale ia e ka makani, a kaa loa aku a i ke kihi o ka honua. Aka ma ka lokomaikai a Iehova, ua hanaia ke kumu laau i mea kupaa loa ma kahi hookahi.
                Ua kukulu no hoi na manu o ka lewa i ko lakou mau home laelae ma na kumu laau kiekie, iwaena o na lau malumalu. Malaila lakou e mele ai i ko lakou mau mele maikai, a kakou e lohe nei i ko kakou auwana hele ana iwaena o na ululaau nani o Hawaii nei; a ma ka malu no hoi o ua mau kumu laau nei, kahi a kakou i ike ai i na lio e ku ana a me na bipi e moe ana i na hora awakea i ka wa e wela ai ka la.
                Ke ninau nei au ia oukou—Owai ka mea nana i hana i na kumu laau uliuli a kakou i ike ai i kela la i keia la? A ke pane mai nei oukou, Na ke Akua. Ae, pela io no. Aole anei i hiki ia kakou ke hana? Aole; eia nae, ua hiki ia kakou ke kanu a e malama i na kumu laau.
                E lawe kekahi keiki i ka anoano alani, a o kekahi hua e ae paha, a e kanu iho ma ka lepo. A ma ia mau la ae, e puka ana no mai lalo aku o ka honua, a e nui ae no a lilo i kumu laau maikai.
                O na keiki liilii he mau hua lakou. O ko lakou imi ana i ka naauao, ua like ia me ke kanu ana i ka hua, a nui ae lilo lakou i poe naauao e like me ka laau nui a maikai—ke lokomaikai nae ko kakou Makua aloha ma ka Lani. E huli oukou iaia, i lilo ai i mau laau e hua ana i ka hua maikai ma ka honua nei a ma ka Lani. E aloha auanei oukou. M. I.

KULA POKII.
SABATI I.

1. A pau na mea e ae i ka hanaia, heaha ka ke Akua mea i hana ai?
Hana oia i ke kanaka.
2. No loko o ke aha i hana ai ke Akua i ke kanaka?
No loko ae o ka lepo.
3. Pehea ka hanaia ana?
Hana mua oia he kino, alaila hana iho la he uhane iloko ona.
4. Pehea la ke ano o Adamu i kinohi?
He hemolele loa, e like me ke Akua.
5. Hoonoho ke Akua ia Adamu mahea?
Ma kekahi mahinaai.
6. Owai ka inoa o ia mahinaai?
O Edena.

SABATI II.

1. Heaha na mea a ke Akua i hoike ai ia Adamu?
O na holoholona a pau a me na manu.
2. Pehea aku o Adamu?
Kapa aku oia i mau inoa no lakou.
3. Hoonoho aku ke Akua ia Adamu i alii maluna o keaha?
Maluna o na ia, na manu, a me na holoholona.
4. Pehea na mea ulu ma ka honua?
Haawi mai ke Akua i na hua a pau o Edena i mea ai na Adamu.
5. Heaha ka hana a ke Akua i haawi ai ia Adamu?
E malama i ka mahinaai.
6. I aha?
I ole molowa o Adamu.

SABATI III.

1. Lokomaikai loa ke Akua ia Adamu, hookahi nae mea ana i nele ai—heaha ia?
Nele oia i ke kokoolua ole.
2. Hana iho la ke Akua i keaha?
He wahine.
3. No loko o ke aha la i hana ai oia i ka wahine?
No loko o ka iwi aoao o Adamu.
4. Pehea ka lawe ia ana o ka iwi aoao?
Hoohiamoe ke Akua ia Adamu a lawe mai i ka iwi aoao.
5. Pehea ka manao o Adamu i ka wahine?
Aloha loa.
6. Owai ka inoa o keia wahine mua?
O Ewa.

SABATI IV.

1. Ehia la, pau na mea a pau i ka hanaia e ke Akua?
Eono la.
2. Pehea na mea a pau a ke Akua i hana ai?
He kina ole, he maikai loa.
3. A ike na anela i na mea a pau i hanaia, pehea lakou?
Hoolea lakou i ke Akua.
4. Pehea ke Keiki a ke Akua?
Aloha oia ia Adamu laua o Ewa.
5. Pehea i ike ai kakou i ka moolelo o ka hanaia ana o ke ao nei?
Ua haiia mai ma ka ke Akua olelo.
6. E helu mai i na mea a ke Akua i hana ai.
1, ka malamalama; 2, ke ea; 3, na ao; 4, ka moana; 5, ka aina maloo; 6, na mea ulu; 7, ka la, mahina, hoku; 8 na mea ola.

                Ua loaa ia makou he leta, mai ia Rev. H. J. Pahio Haui o Onomea, e hoike ana i ka lokomaikai o na haole, na Pake a me na hoahanau i ko lakou kokua ana i ke ola o ko lakou kahu ekalesia, ma ka la 13 o Ianuari i hala iho nei; a o ka huina o na dala a pau i loaa he $183.25.

KE ALAULA,
He Nupepa Hoikeike Kii,
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.

                25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ke ope hookahi, ME KA HOOKAA MUA IA MAI.
O. H. KULIKA, Luna Hoopuka.