Ke Alaula, Volume I, Number 8, 1 November 1866 — Page 32

32 KE ALAULA.

FIRST FOOTSTEPS
IN THE
WAY OF KNOWLEDGE.

NO KEKAHI POKII.

                E na pokii i heluhelu paha, a i lohe paha i ka heluhelu ana o ke ALAULA:—E hai aku au ia oukou i kahi mau mea e pili ana i kekahi keiki uuku, e like paha ka nui me kekahi o oukou la. He keiki kane keia i loaa ole i ka lima o kona mau makahiki, nolaila aole ike pono oia i ka heluhelu buke; aka, mai kona wa liilii loa mai, makemake nui oia e lohe i ka heluhelu ana o na buke kupono no na keiki liilii.
                O kona mea e olioli nui ai, oia ka lohe ia ana o na moolelo mai loko mai o ka Baibala, a ua ike pono oia ka moolelo no Adamu laua me Ewa, no ka pepehi ana o Kaina ia Abela, no Noa me kona halelana, no Aberahama e mohai ana i kana keiki, ka hoolei ia ana o Iosepa iloko o ka lua, ka waiho ia o Mose iloko o ka waa maluna o ka muliwai, ke kahea ana o ke Akua ia Samuela, a pela aku a hiki ia Iesu, a me Petero, a me Paulo. Makemake oia e lohe pinepine i keia mau mea. Ma ke ahiahi o na la Sabati a pau, ua kii keia wahi keiki i ka Baibala nui, a haawi aku i kona makuahine alaila pii oia a noho ma kona uha, a noi aku iaia e heluhelu mai i ka moolelo o Mose, a o kekahi mea e ae paha, aka o Mose kona mea i makemake pinepine e lohe. Aole poina oia i kekahi la Sabati, aole makemake oia e moe a pau keia heluhelu ana.
                Ma na po a pau, a hookomoia kona kapa moe, noho pu oia me kona makuahine, a i aku iaia: "E mama, e kamailio iki kaua;" a i kekahi manawa noi aku iaia e himeni pu, "He aina pomaikai." "He aloha ka Iesu." a he mau mele o keia ano. A pau ke kamailio ana, kulou pu laua a pule keia wahi keiki i ke Akua. Ua ao aku kona makuahine iaia i kekahi pule pokole, e noi aku i ke Akua e hoolilo iaia i keiki maikai, a e malama iaia a me ka ohana a pau i ka po. Ina ua hana hewa keia keiki, ua hoolohe ole paha i kona mau makua, a he hewa e ae paha, a hiki i kona wa e pule ai, hookomo oia keia nonoi iloko o kana pule, penei: "E ke Akua, e hoolilo mai oe ia'u i keiki maikai, a he keiki hoolohe i ka'u mau makua." I kekahi wa ua hala kona makuakane ma kahi e, a ahiahi ae la, pule no ke keiki nona: "E hoihoi oluolu mai oe iaia i ka la apopo." Pela i kekahi manawa, ua makaukau oia e hele pu me kona mau makua i Honolulu i kahi la ae, a pule no oia penei: "E ke Akua, e malama mai oe ia makou i ko makou pii ana i na ahua, a me ka iho ana i na awawa, a hiki aku makou i Honolulu i ka la apopo."
                Pela, e na pokii, e nonoi pinepine aku keia keiki i na mea ana i makemake nui ai. A pau kana pule ana, pule kona makuahine me ia, a hoolohe pono ke keiki i kana pule, a ina ua haule i kekahi manawa kekahi mea ana i pule mau ai, ua maopopo iaia, a i ka pau o ka pule o kona makuahine, pane koke aku la ia; "E mama, ua poina oe e pule no kela mea." Aole oluolu oia, a kulou hou laua a pule hou ka makuahine.
                E na keiki liilii, pela anei oukou e pule ai i ke Akua i kela la a i keia la?
                Ua hala keia keiki aloha i ka lani. Ua halawai paha oia me Aberahama, me Mose, a me Samuela ma, a ke noho nei oia ma ka poli o Iesu. Ua pau kana pule ana ma keia ao, aka ua oluolu ka manao o kona mau makua i ka hoomanao ana i kona makemake loa i ka Baibala a me ka pule.
                E na makuahine o Hawaii, e ao aku oukou i ko oukou mau keiki aloha i ka pule i ke Akua i ko lakou wa liilii, a e hai aku ia lakou i na moolelo nani mai loko mai o ka Baibala, a e himeni pu me lakou i na mele maikai mai loko ae o ka Lira Kamalii. Pela e alakai oukou ia lakou ma ke ala o ke ola. Ehia la o oukou, e na makuahine, i maa i ka pule mau i kela ahiahi keia ahiahi me na keiki liilii a oukou?

KULA POKII.
SABATI I.

1. Ina hea ka hoomaka ana mai o ko ke Akua noho ana ma ka lani?
Mai kinohi mai no ka noho ana o ke Akua, mai ka mau loa mai.
2. Ua mau anei ka noho ana mai o kanaka?
Aole; he eono paha tausani makahiki ka noho ana o kanaka ma ka honua nei.
3. Pehea ka la, mai ka mau loa mai anei ia?
Aole; mamua loa aku aole la, aole mahina, aole hoku.
4. He mau loa mai anei ka noho ana o na anela?
Aole mau; mamua aole he anela, a hana ke Akua ia lakou.
5. Ehia la anela i hana'i?
Aole, kakou i ike i ka nui.
6. Ua heluia anei lakou?
He nui wale lakou—pau ole i ka heluia.

SABATI II.

1. I ka ke Akua hana ana i na anela, pehea ko lakou ano?
He hemolele lakou.
2. Ua mau anei lakou ma ia ano maikai?
Ua haule iho kekahi o lakou iloko o ka hewa.
3. Heaha ko lakou hewa?
He hookiekie, a kipi ae lakou.
4. Ua ae anei ke Akua ia lakou e noho pu aku me ia ma ka lani?
Aole; ua kipaku aku oia ia lakou.
5. A mahea lakou e noho ai?
Ua hoopaa aku oia ia lakou me na kaulahao ma ka po.
6. Owai ka inoa o kekahi o keia mau anela i hewa?
O Satana.

SABATI III.

1. Owai la o Satana?
Oia ke alii o na anela ino.
2. Heaha kekahi inoa i kapaia oia?
O ke Diabolo.
3. E loaa anei iaia ka hoi ana i ka lani?
Aole loa no.
4. Mahea kona wahi i hele ai?
Hele pu mai no ia i ke ao nei me na diabolo e ae.
5. Ike maka aku anei kakou iaia?
Aole i ike maka ia, no ka mea he uhane ia.
6. Heaha kana hana maanei?
O ka holoholo i o a ia nei, e hoohuli ai i na kanaka mamuli o kona mau manao ino.

SABATI IV.

1. Heaha ka makemake o Satana?
E hoopilikia, e hooeha, a e hoohihia ia kakou, i hele kakou me ia e noho ai.
2. Heaha kekahi mau ano o Satana?
He lokoino, he huhu, he hookiekie, he aloha ole.
3. Heaha kekahi mea a ka diabolo i ike ai?
Ua ike ia, ina e like ke kanaka me ia, alaila e hoi no ke kanaka me ia e noho ai i ka wa e make ai ke kino.
4. He hiki anei i ke Akua ke hoopakele ia kakou mai ka mana o ke diabolo?
Ae, he hiki no; no ka mea ua oi loa aku ka ikaika o Iehova.
5. Owai ka mea e hoopuni ana ia kakou i na manawa a pau?
O ke Akua.
6. Ina pela, e makau wale anei kakou ia Satana?
Aole; e hoopakele no ke Akua ia kakou i na manawa a pau, ina e pule aku kakou iaia.

                Ua ike paha kekahi mau keiki a kakou i na manu eleele nui ma Honolulu nei i kapaia he koraka, i laweia mai e Kauka Hilibarani. Ua manao na Hinedu aia ka iloko o keia manu ka uhane o ko lakou mau kupuna, nolaila hanai maikai lakou i ua mau manu nei. No ka hoomaloka o kekahi, a no kona ao ia'na e na misionari, hoole kela aole make hanai i ua manu nei ma ke ano hoomana manu. "No ke aha hoi?" wahi a kekahi. Mea mai ana kela, "E kuhikuhi mai oe i koraka ua like kona ano me ke ano o ka'u makuakane i make iho nei, alaila e hanai au iaia." Aole no paha e komo ana ka uhane o kanaka iloko o ka holoholona.

KE ALAULA,
He Nupepa Hoikeike Kii,
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.

                25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ke ope hookahi, ME KA HOOKAA MUA IA MAI.
O. H. KULIKA, Luna Hoopuka.