Ke Alaula, Volume I, Number 8, 1 November 1866 — Page 31

Page PDF (1.02 MB)

KE ALAULA. 31

 

ua pae mai kekahi o keia ano Bea nui i na aina akau loa o Amerika a me Siberia.
                E kahaha paha auanei na keiki me ka ninau, "Pehea la i ola ai keia holoholona ma ia wahi anu loa?'' Na ka lima no i hoomakaukau ia makou e noho ma kela aina mehana oluolu, nana no i hoomakaukau i ka Bea me kona hulu loloa, a me kona ili manoanoa, e noho ma na aina anu loa.
                He nui na ano Bea, aka o ke ano Bea no ka akau loa mai, he keokeo kona hulu. Ua like no ka nui o ke kino o keia holoholona me ka bipi. He manoanoa kona a-i; he liilii a oioi kona mau pepeiao, he oioi kona nuku. Elima manamana ma kela wawae keia wawae, a he mai-uu ma kela a me keia manamana e kokua ana iaia ma ka pii ana i na laau a me ke eli ana i na lua. He hiki iaia ke hopu i ka lio a hoopaa iaia ma kona mau .. wawae mua, alaila e hoala i kona kino iluna a hele aku ma na wawae hope elua, e like me ka hele ana o kekahi mau ilio liilii i ao ia e ku iluna, a hele ma na wawae elua me he kanaka la.
                O kekahi ai o keia holoholona oia na hua o na paina a me na laau hua e ae o ka nahelehele. Ai no hoi oia i ka io o na holoholona e loaa aku ana iaia. Ua makaukau no ia i ka luu aku iloko o ke kai a hopu i na ia. I kekahi manawa pae aku i uka na kohola a me na ia e ae, a oia kekahi ai o ka Bea noho anu. He ano okoa ka Bea i noho ma ka aina o Kanaana i ka wa kahiko.
                E noho pu ana o Elia me Elisai, a hele pu laua i Ieriko e ike i ke kula nui malaila. Ua elemakule loa o Elia, a i ka hoi ana mai o laua mai Ieriko mai, ua kailiia aku ke kumu, a koe iho ka haumana, oia o Elisai. Hoouna mai ke Akua he mau lio ahi a he kaa ahi, a ma ke kaa ahi i pii aku ai o Elia i ka lani. Ike aku o Elisai i ko Elia pii ana'ku, a kahea aku ia, "E kuu makua, e kuu makua," a nalo aku la kela. Lalau aku o Elisai i ka aahu o Elia, ka mea i haule iho mai ona mai i kona pii ana'ku, a hoi aku. E kiai mai ana ma kahi mamao aku na haumana he kanalima o ke kula nui o na kaula, e ike ina e haule mai ka mana o ko lakou kumu mua maluna iho o Elisai. A ike aku lakou ia Elisai i kona hoi ana mai, a ku ma kapa o ka muliwai o Ioredane. A ike lakou i ko Elisai lawe ana i ka aahu o Elisai ma kahi maloo a hiki i keia ua mahele ia na wai ma kela aoao keia aoao, a hele mai o Elisai ma kahi maloo a hiki i keia kapa o Ioredane. Hoomaopopo no lakou ua lilo o Elisai i kumu no lakou ma kahi o Elia. A halawai aloha aku lakou me ia, a hookipa iaia ma Ieriko a hala kekahi mau la.
                Ma Betela kekahi kula a na kaula a hele aku o Elisai e ike ia lakou. I kona hookokoke ana ia Betela puka mai kekahi poe keiki, e henehene a hoomaewaewa iaia. He ohule o Elisai, a ua lohe lakou no ka pii ana'ku o Elia i ka lani. Olelo mai na keiki kolohe, "E pii ae iluna, e ka ohule, e pii oe iluna, e ka ohule." Pela i hoino ai i keia kauwa a ke Akua. Haliu ae la ia a hoino ia lakou ma ka inoa o Iehova. Huhu o Iehova i kela poe keiki i hoino wale i kona kauwa, no ka mea ma ia hana ana ua hoino lakou iaia. Hoouna mai o Iehova elua Bea wahine mai loko mai o ka ululaau, a haehae i na kamalii he kanaha-kumamalua o lakou. Weliweli ka make ana o ia poe keiki i hoino i ke Akua.

O IESU KE ALOHA NEI.
[Chorus:—Sweetly Singing" Sabbath School Bell.]

1. Uuku au, ua hewa nae,
Nawai la e aloha mai?
O Iesu ke aloha nei
I kahi keiki makalii.
HUI:—Mele, mele, mele lea,
Mele ia la, mele, haleluia,
Mele oli, oli, oli nui,
Me na leo lani e hai ai.
2. Ua lokomaikai mai Iesu.
Ua kahe kona koko no'u
O Iesu ke aloha nei
I kahi keiki makalii,
HUI:—Mele, mele, mele lea.
Mele ia Ia, mele, haleluia,
Mele oli, oli, oli nui,
Me na leo lani e hai ai.
3. Lalau ka'u 'lelo, ka'u manao,
Aloha ia ke mihi au:
O Iesu ke aloha nei
I kahi keiki makalii.
HUI:—Mele, mele, mele lea.
Mele ia Ia, mele, haleluia,
Mele oli, oli, oli nui,
Me na leo lani e hai ai.
4. E Iesu e, e haawi mai
I naau hou, naau maikai,
Hoomau i kou aloha e
I kahi keiki makalii.
HUI:—Mele, mele, mele lea,
Mele ia Ia, mele, haleluia,
Mele oli, oli, oli nui,
Me na leo lani e hai ai.
WAIKOLOA.

KA NU.
(THE GNU.)

                Ua ikeia keia holoholona ma na aina hema o Aferika. Me he lio uuku la ka nui o kona kino. O kona poo a me ka a-i ua like iki me ko ka bufalo; o kona kino a me ka huelo ua like me ko ka lio; o kona mau wawae ua like me na ano dia; a o ka oloolo o kona a-i ua ano like me ko ka eleka. Malalo o kona auwae a me ka a-i ua loloa ka hulu, e lewalewa ana ilalo me he umiumi la.
                He holoholona hihiu loa no keia. Hele pu-a no lakou e like me ka hele ana o na bipi hihiu. O kona io ua oi aku ka ono i ko ka bipi i ka ai ana, wahi a ka poe i maa. Ua like ka Nu me ka bipi hihiu i ka huhu, ke hoopilikia ia—hahai mai no a o-e mai me kona mau kiwi. Ua like hoi me ka bufalo i ka huhu loa mai ke hoikeia'ku kekahi kapa ulaula; i ka ike ana, o kona hahai mai no ia a o-e mai. Aole i lohe ia ua hoolakalaka ia keia holoholona ma ka mahelehele.

                E heluhelu i kekahi mea maikai i kela la i keia la.

                I kinohi hana ke Akua i ka lani a me ka honua, ke kai a me ka aina maloo, ka la a me ka mahina, a me na hoku; na mea ulu ma ka honua, na ia o ke kai, na manu o ka lewa, a me na holoholona o ke kula. A pau ia mau mea i ka hana ia, alaila hana ke Akua i ke kanaka mai loko o ka lepo. Ma kona ano iho i hana ai ke Akua ia Adamu. I kona ike ana he mea pono ole ka noho mehameha ana o Adamu, hana iho la oia he kokoolua nona.
                Penei ka hana ia ana o Ewa: Hoohiamoe aku o Iehova, ke Akua, ia Adamu, a unuhi ae la he iwi aoao no loko mai ona, a hoopili iho la ia i ka io ma kona wahi. A o keia iwi aoao no loko ae o Adamu, oia ka ke Akua i hana ai i wahine. Kapa aku o Adamu i kana wahine o Ewa, no ka mea oia ka makuahine o na kanaka a pau. O ke ano o keia hua olelo o Adamu, oia keia, o lepo ulaula; a o ke ano o keia hua o Ewa, oia no o ola. I kapa aku paha o Adamu iaia pela, no ka mea no loko mai ona na kanaka a pau e ola aku ai ma ia hope mai ma ke ao nei.
                Kai mai o Iehova io Adamu la i na holoholona o ke kula a me na manu o ka lewa, a kapa aku la o Adamu i ko lakou mau inoa e like me kona makemake. Kanu iho la o Iehova he mahinaai ma ka hikina, o Edena ka inoa. Maloko o Edena i hooulu ai oia i na laau a pau i oluolu i ka maka ke nana'ku, a me na laau nona na hua ono hoi ke ai. He muliwai kekahi e kahe malie ana a e hooma-u ana ia mahinaai maikai. Manamana aku hoi ua muliwai la i eha mana.
                Ma keia mahinaai nani, ma keia wahi maluhia i hoonoho ai ke Akua i ko kakou mau kupuna mua loa, e mahi a e malama ia wahi.
                Ua oi aku paha ka nani a me ka maikai o ia wahi mamua o na wahi a pau i ikeia ma ka honua nei i keia wa. Ulu wehiwehi na laau, uliuli maikai ka mauu—hua nui mai na mea momona o kela ano keia ano.
                He noho maikai na holoholona ma ko lakou mau ano, aole he holoholona i hoopilikia mai i ke kanaka. Kani na leo lea o na manu hulu maikai ma na ululaau—a oluolu paha ka pepeiao o Adamu ma i ka lohe ana. Aole paha i pepehi a hoopilikia wale na holoholona kekahi i kekahi ma ia wahi laelae. I ka malama ana o ke kanaka ia mahinaai, aole no he hana oolea e luhi ai ke kino, e kahe ai ka hou o kona lae, a e eha ai kona mau lima, e maloeloe ai kona mau lala, a e hui ai kona poohiwi. He oluolu wale no ka hana o ia wahi, a he luhi ole. Ua noho kapa ole a olohelohe ko kakou mau kupuna ma ia wahi, no ka mea aole i hana laua i kekahi hana hewa e hilahila ai laua. Aole no i anu, aole hoi i wela laua—aole no hoi i luhi ma ia wahi pomaikai.