Ke Alaula, Volume I, Number 8, 1 Nowemapa 1866 — Page 29

KE ALAULA.
BUKE I. HONOLULU, NOVEMABA, 1866. HELU 8.

                He nui na keiki kane i makemake e holo i kahiki. Lohe lakou i na olelo a ka poe holokahiki e kaao ana no na mea a lakou i ike ai maluna o na moku, ma ka ili o ke kai, a ma na aina e. Ia lohe ana, piha iho la ka naau keiki i ka iini e ike maka aku i na mea kupaianaha a ko lakou mau pepeiao i lohe ai. Kuko nui iho la ko lakou naau i ka auwana wale aku i na aina e, a i ka holo paha i ka moana e lawaia i na ia nui o ke kai. Uluhua ka naau i ka noho wale i ke kula, a me ka imi wale i ka naauao iloko o na buke. Hoowahawaha iho la ia hana, a ua lilo ke kula ana i mea kaumaha loa i ka manao o ke keiki i makemake i ka auwana a i ka holo aku maluna o na moku.
                Ina e haawi mai ka makuakane he wahi hana, he mahiai paha, he kahu ai paha, he malama holoholona paha, uluhua loa ka manao ia hana. I iho la, "he hooluhi wale ia au e ko'u makuakane." E ake ana e pakele aku mai ka hale hooluhi a holo aku ma ka moana. Aole hoi ia e noonoo i na pilikia he nui wale i ili mai maluna o ka poe luina. Aole ia i hoomanao i ka luhi o ke ku waki ana i ka po, i ka pii ana maluna o na kia a me na i-a e pu-a i na pea i ka wa makani, a e wehe i na pea i ka wa malie. He mea ole iaia ka luhi o ka hoehoe waapa ana a loihi, i ka hounauna wale ia e na'lii moku i kela hana keia hana, i kela manawa keia manawa. Aole kela i manao no ke anu o ka hau ma na aina anu a ka moku e holo aku ai; aole hoi i ka wela ino o ka la ma ka poai wela kahi e holo aku ai paha ka moku. Aole hoi i makau i ka paio ana me na ia nui o ka moana--makau ole i ka peku ia mai e ka hiu o ka ia nui o leviatana a nahaha ka waapa.
                Hoomaopopo ole kahi keiki i keia mau pilikia a pau no kona ike ole ia mau mea. O ka moku kana mea i ike ai, me kona mau kia kiekie, me kona mau pea keokeo, me kona mau likini eleele, me kona hae e welo ana i ka makani. He nani kona mau ano a pau. I ka pa ana o ka makani maikai wehe ia na pea, a poho aku i ka makani, hoopaa ia ka hoe iluna. Kahea mai ke kapena e wehe ia mai na kaula e hoopaa ai i ka moku i ka uwapo, ka holo aku no ia o ka moku, me he manu la ka nani, me he mea eheu la ka mama, a nalo koke aku ma kahi o ka napoo ana a ka la. Makemake iho la ka naau keiki e holo aku a ike i na aina a me na kai.
                Ma ke kii a kakou maluna ae nei, ke ike la kakou i kekahi luina opio e noho kiihelei ana maluna o ka i-a nui o kekahi moku, e nana aku ana i ka moana, i ka aina paha, i ka moku paha, ma kahi loihi aku. Aia no ka paa nui malalo iho ona. Eia ia ma ke poo o ke kia nui o lalo, kahi i hui ai na likini nui. Ke puhiia la kona lauoho e ka makani, ke paa la ia i kona papale ma kona lima, o lilo aku.
                Niniu ole ke poo o na luina i ka pii i kahi kiekie i ka wa e luli ana ka moku i o a ia nei. E aho no ka hoi ka pii i ka niu. He paa malie ia ma kahi hookahi—na ka makani wale no e hooluliluli iki ae. I ka pii ana o na luina maluna o na kia oluna o na kia o ka moku, kau i ka lewa. Hio aku ka moku i ka makahi, a nana iho oe ilalo, o ke kai wale iho no malalo iho ou, aia ka moku ma kahi e.
                I keia mau la ke ku nui mai nei na moku okoholamai ka akau mai. Ke komo mai nei lakou i na awa o Hawaii nei. He nui na keiki Hawaii a kakou i holo aku nei maluna o na moku, a i ike i na pilikia o ka moana, i ka noke i ka paio me na ale o ka moana a me na ia weliweli o ka moana. Aloha wale lakou! "Ua ike no keia poe i na hana a Iehova, a me kana mau mea kupanaha ma ka hohonu."

HOI MAI KA MOIWAHINE.

                E hoomanaoia'na ka la 22 o Okatoba e na kamalii o Honolulu, a me na wahi e aku o Hawaii nei. Ma ia la ua hoi mai, ma ka mokuahi nui a nani o Vanabila, ko kakou Moi Wahine Emma, mai kona hele malihini ana ma na aina o Europa a me Amerika! Ua ike aku nei kela ia Enelani a me ko laila Moi Wahine o Vitoria, ua ike ia Farani, ua noho loihi ma kela aina a kakou i lohe ai, o Italia, ua kaapuni hele ma Geremania, a eia iho nei kona hookipa alohaia'na ma ke Aupuni nui i kokoke mai ia kakou nei, o Amerika. A ua kena mai nei na mea hanohano o Amerika i ka Adimarala e holo mai i Hawaii nei me kona moku i makemake nui ia, e hoihoi i ka Moi Wahine i kona home, iwaena o kona lahui ponoi o kakou nei.
                Ua mahaloia ko kakou Moi Wahine ma na aina ana i hele ai, a ua kapaia he wahine pono. O ka oi paha ia o ka nani, oia o ka ano lokomaikai, a o ka imi ana i ka pono a hai. Ke lana nei ko makou manao e imi ana keia Pua Alii o kakou i ka pono oiaio o kona lahui ma keia hope aku.
                O keia nani, o ka nani o ka noho pono ana, aole keia he nani pili alii wale no e na kaikamahine o na mokupuni i anianiia e na makani kolonahe o ka Moana Pakifika. He loaa no keia nani ia oukou, ea! E noonoo oukou ma ia mea. Na ka Makua ma ka Lani e hoaahu mai i keia nani.