Ke Alaula, Volume I, Number 7, 1 ʻOkakopa 1866 — Page 26

26 KE ALAULA.

HE PALAPALA NA E. M. LONA.
HELU ELUA.

                E O'U MAU POKII—ALOHA OUKOU:—Ma ke ALAULA o Augate ua hoomaka aku no wau e kamailio me oukou no ka pule a me ke ano o ka pule a kekahi mau keiki i pule ai. Aole no i pau kuu mau manao malaila.
                Ua lohe au no kekahi kaikamahine ma Amerika, o Pane ka inoa. Ua lilo kona makuakane i koa iloko o keia kaua iwaena o ko ka Akau a me ka Hema. Ao aku kona makuahine iaia e pule aku i ke Akua no ke ola o kona makuakane e noho ana ma ke kahua kaua. I kekahi la puka mai o Pane mai kona keena mehameha, me ka olelo iho, "Ua pule no wau." Ninau ae la kona makuahine, "Heaha la kau mea i pule ai?" I mai la o Pane, "Ua pule aku wau no papa." "A pehea la kau pule?" "Pule aku la au, 'E ka Haku, mai ae oe ia Iepa Davisa e ki pu mai ia papa.'"
                E kukuli ana kekahi keiki kane liilii ma ka aoao o kona makuahine, a e haku aku ana ka makuahine he pule ahiahi nona. Koi mai ua keiki la e ae ia iaia e pule mamuli o kona manao iho. Ua ae ia, a penei kana i pule ai: "E ka Haku, e hoomaikai mai oe ia Ioane liilii; e malama oe i ka hale i wela ole i keia po. E ka Haku, e hoomaikai mai oe ia papa a me mama. E hoopomaikai mai oe ia'u, a e kokua mai, i komo oluolu ka'u mau kamaa-buki i kakahiaka."
                Ua nonoi aku keia mau keiki elua i ka Haku no na mea a laua i makemake nui ai, aka ua nonoi anei laua i na mea i oi loa aku ai ka pono e loaa mai?
                E ao ana kekahi kumu wahine i kekahi papa pokii ma kekahi kula Sabati. Kamailio mai ia i kana mau haumana no ka pono o ka pule. I ka pau ana o ke kula, holo mai o Ane a ninau mai me ka hoihoi i ke kumu: "Ina e nonoi aku wau i ke Akua no kekahi mea, e loaa io mai anei i ua mea la ia'u?" Ae aku no ke kumu, "Ae, e loaa no."
                Ua maa lakou ma ia kula i ka haawi i na balota i na haumana i hele mau mai i ke kula, e like me ka mea i hanaia ma ke Kula Sabati o Kawaiahao. Ua haawiia hookahi balota omaomao i kela Sabati keia Sabati, a i ka loaa ana i ka haumana i na balota omaomao eha, alaila ua hoihoiia lakou eha i ke kumu, a haawiia mai hookahi balota ulaula, a pela hou aku ua mau Sabati eha. Pela e hana ai, a ina i hala na mahina eha i ke keiki me ka haule ole o kekahi Sabati, ua loaa iaia eha balota ulaula, alaila haawiia i ke keiki nona na balota ulaula eha he makana— he buke.
                I kekahi Sabati ae ike aku ke kumu i ke ano haaloulou o ka maka o ua o Ane, a i ka pau ana o ke kula, a hookuuia na keiki e ae, ninau aku ke kumu iaia, "He mai anei oe e Ane?" Hoole mai o Ane, "Aole, aka aole no he oiaio kau mea i olelo mai ai ia'u i kela Sabati—aole no e hoolohe ke Akua i ka'u pule. I keia pule ae e haawiia ana na buke i na keiki i loaa i na balota ulaula eha, a ua loaa ia'u ekolu balota ulaula a ekolu balota omaomao; aohe he lawa ka'u mau balota ulaula e loaa ai ia'u kekahi buke. Nolaila i kuu hoi ana aku i kela Sabati, holo koke aku no wau i ka hale, a wehe ae i kuu papale, a kukuli iho au ma ka aoao o kekahi noho laau, a waiho aku wau i kuu mau balota omaomao ekolu, a me na balota ulaula ekolu, maluna o ka noho. Alaila pule aku wau i ke Akua e hoolilo i hookahi o na balota omaomao i ulaula, aka i kuu nana iho ana, ua mau no ka omaomao o na mea ekolu, aole i kahuli ae kona ano. Alaila manao wau no ka ikaika ole paha o kuu pule ke kumu i haawi ole mai ke Akua i ka'u mea i noi ae ai. A pule hou iho no, me ka hoopuka aku imua o ka Haku i kela olelo ana, 'E noi a e loaa ia oukou,' aka ua makehewa wale ko'u pule—eia no na balota ekolu o kela ano, a ekolu o keia ano." Hoike ae kela i na balota eono ma kona wahi lima, a kulu iho na waimaka ma na papalina o kahi kaikamahine. Lalau koke aku no ke kumu i kekahi o na balota omaomao, a ho-o iho he balota ulaula ma kona lima. Ma ia hana ana ua ae ia ka nonoi o ua o Ane; aka he okoa ke ano o ka hooko ia ana, a he okoa ka mea a Ane i manao ai e hanaia nona.
                E na pokii, e hoomanao oukou i keia ano maikai o ka Ane pule. Ua manao oia e loaa io mai ana no kana mea ana i nonoi aku ai. Pela anei oukou i ka oukou wa e pule ai? Ua like anei ko oukou manao me ko Iakoba i kona pule ana, "Aole au e kuli aku ia oe a hoomaikai mai oe ia'u?" Aloha oukou e na pokii.
Na'u, na E. M. LONA.

HELE MAI.—(COME)

[Sunday School Teacher.]
1. Ma ka pepeiao opio
Pa ka leo e,
Iesu ia e hea ana
I na pokii nei;
Hea kona leo olu,
Ku a hele mai,
Ma na lima aloha ona
Lakou e maha'i.

2. Aia po a neoneo,
E hoolohe, e,
"E ka mea walania
Hele mai i o'u nei;
Hilinai, a maluhia
Ma kuu poli nei."
Olu maikai kana olelo,
"Na'u e hoomaha'e."

3. Aia pau ko makou hala
I ke koko ou,
Kaikai ia makou iluna,
I kou hale mau;
A malaila e pa mai la
Ma ka pepeiao,
"Komo mai na keiki pono,
I ka home mau."  WAIKOLOA.

KA HAKU MAU.
[MELE:—"Auld lang syne."]

O Iesu no kuu Haku mau;
Pomaikai wale au.
Aole au e nele hou,
He lokomaikai mau!

O Iesu no kuu Alakai;
E hahai aku au
I kana hana akahai
Me kuu naau a pau.

O Iesu no kuu hoahanau,
Kuu kaikuaana no.
E olioli maoli au
Ma kana pono no.

A i kuu wa e make ai
E lanakila au;
Ma kona inoa e hoomaikai
A palekana mau!  E.

KA BALUNA.

                Heaha keia mea i hoikeia ma ke kii me he opu makani la e lele ana, a e pii ana iluna lilo, a e komo loa aku paha mawaena o na ao, a nalo aku mai na maka o ka poe e nana ana iluna? Ua kapaia keia mea he Baluna. Heaha la ka mea i pii wale aku ai keia Baluna iluna? Ua hanaia he eke kilika nui me he opu makani la, a ua hoopihaia ua eke la i ka ea mama—he like ole me ke ea maoli e hoopiha nei i na wahi a pau. Aia a piha ka opu o ka Baluna i keia ea mama, na ia opu no e huki iluna. Ua hoopaaia na kaula a puni, a malalo iho ua hoolewalewaia he ano hinai, a maloko o ia wahi e noho ai na kanaka e manao ana e pii iluna loa i kahi kiekie, i kahi a ka makani e lawe ai ia lakou.
                Aia a manao ka mea e hooponopono ana i ka Baluna e hoi mai ilalo i ka honua, wehe ae oia i kekahi puka makani ma ka opu makani, a puka aku ke ea mama, alaila na ke kaumaha o na kaula a me na kanaka e noho ana iloko e kauo iho i ka Baluna ilalo a ku i ka honua.
                Ma ka Baluna nui ua hiki i na kanaka eha a elima paha ke pii iluna a hiki i kahi kiekie loa. I ka makahiki 1858 ua pii aku kekahi kanaka ma kona Baluna ma Ilinoi, ma Amerika Huipuia. I kona iho ana mai, haule mai oia ma ka pa hale o kekahi kanaka mahiai. Lealea lakou i ka ike ana ia mea hou he Baluna, ma ko lakou wahi. Olelo ka mea nona ka Baluna i ke kanaka mahiai e kau i kona mau keiki ma ka Baluna. Kau aku no ia ia laua a pii iki aku no, alaila huki iho ka makuakane i ka Baluna ilalo me ke kaula e paa ana ma kona lima. Pela ka hana ana a lealea wale na keiki. Oi paani wale ana hiki mai ka makani, puhiia ka Baluna, moku ae la ke kaula, a lilo pu aku na keiki me ka Baluna iluna, a kaili loa ia aku. Mea e ka uwe a me ka pilikia o na makua. He kaikamahine kekahi, o Mareka ka inoa, nona na makahiki ewalu, a he wahi kaikunane nona, o Davida ka inoa, nona na makahiki ekolu.
                Uwe mai ke kaikamahine, "E kuu makuakane, e huki ia maua ilalo." Aole wahi e kokua aku ai, ua moku aku kahi kaula. Lohea wale ka leo o na keiki, a kaili loa ia aku ka Baluna e ka makani.
                Walania ka naau o na makua. Holo aku na makamaka ma o a maanei e kukala ana i keia poino nui, e imi ana i kahi a haule mai ai ka Baluna me na keiki. Uwe wale na makua ia po a ao.
                Noonoo iho la ke kaikamahine, a hoomaka i ka huki i na kaula. Loaa iho iaia ke kaula e hoopaa ana i ka puka e pani iho ai i ka opu makani. I kona huki ana ia kaula hemo ka puka, a kahe aku ka makani mama, o ka haule mai no ia o ka Baluna. Iwaena o ka po ka ka Baluna