Ke Alaula, Volume I, Number 5, 1 August 1866 — Page 20

20 KE ALAULA.

wai, a na lakou no e ako iho i na hua a me na pua paha a pau ka nani o ka mala, a o ka mahinaai paha. I na iole liilii no e ino ai ka loi laiki nui, a me ka mala kulina, ka mala ipu paha. Pela hoi, o na keiki, na na hewa liilii, na mea a kakou i manao ai he hewa uuku, na ia mau hewa no e kaili aku ai i ko kakou inoa maikai iwaena o kanaka a e pono ole ai kakou imua o ke Akua. Mai kuhihewa kakou ma na hewa nui wale no e poino ai a e make ai ke kanaka. Na na alopeke liilii no i ako ai i na hua; a o ka nele no ia. Na na hewa liilii no e alakai ai i ke keiki a nele loa oia i na pono a pau, a koe wale no o ka poino.
                Aka aole o na hua waina wale no ka ka alopeke i aihue ai. He mea mau iaia ka pii ma kahi e kau ana na moa i ka po a popoi no kela; make no ka moa, pau iaia i ka ai malu ia. Pela no hoi na hua moa, koe ole i keia holoholona maalea a kolohe no.
                Eli ka alopeke i lua, kahi e moe ai a e pee ai i ka wa i alualuia. Eli iho kela a poopoo loa, a nalowale loa ia ilalo e like me ka iole.
                Hele mai kekahi kanaka hanohano, he kakauolelo, io Iesu la, me ka olelo aku e hahai oia i ka Haku i na wahi a pau ana e hele ai. Ike paha o Iesu i ka manao nui o kela kanaka ma ka waiwai o keia ao, a nolaila pane aku oia iaia: "He lua ko na alopeke, he wahi noho ko na manu o ka lewa; aka, o ke Keiki a ke Kanaka, aohe ona wahi e hoomoe ai i kona poo." Mat. 8:20.

AIA A UHI MAI KA POULI.

                E hoopaakiki ana kekahi keiki liilii a e hoole ana i ka manao a kona makuahine. No ke aloha loa o kona makuahine iaia he hiki ole ke hoopai mai, aka ao waha aku iaia me ke alakai iaia e hoolohe. Hoopaakiki nae kahi keiki, a uwe huhu me ka leo nui, a nana ae na malihini e hele ae ana ma ke alanui me ka manao e hoino ia ana paha kahi keiki ma ia hale.
                No ka hiki ole o na hana e ae, nolaila hoao ka makuahine i kana laau hahau, a ma ia mea ua hoopauia ka hoopaakiki o kahi keiki hookiekie. A maalili iho kona huhu, kamailio oluolu mai kona makuahine me ia no kona hewa, a ninau mai: "Ahea la e lilo ai oe i keiki maikai a hoolohe?" Pane mai o Hale me ka piha o kona mau maka i na kulu waimaka: "Aia a uhi mai ka pouli."
                He nui no na keiki i makau ole a malama ole i ke Akua i ke ao, aka aia a uhi mai ka pouli, hoomanao lakou iaia a makemake e hooluolu iaia. Oiai e paa ana na kukuna o ka la maluna o lakou a e malama mai ana na makua ia lakou, he makau ole, a he paani, he leo nui, he olioli, a i kekahi manawa he huhu, he aihue, he hoohiki ino, he koa loa ia manawa. Aia nae a uhi mai ka pouli a e waiho mehameha ke keiki ma kona wahi moe, alaila hoomanao iho lakou i ka lakou mau hewa, a makau iho la i ke Akua. Iho mai no ke Akua, ka Uhane, a kukakuka me lakou i ka wa malu o ka po a kauo aku ia i ko lakou mau naau io na la.
                He mea pono no ka hoomanao iaia "aia a uhi mai ka pouli," a e mihi aku imua ona no na hewa, ina i mihi mua ole ia i ke ao.
                O keia ola ana a ke Akua i haawi mai ia kakou, me he la hookahi no ia i haawiia mai ia kakou e hoomakaukau no ka po o ka make e kokoke mai ana. He nui no ka poe i lealea wale a hana wale i ka hewa i na hora a pau o keia ao, me ka i pinepine iho, e like me Hale, "aia a uhi mai ka pouli " alaila e mihi a hoolohe. Hoomaunauna wale lakou i na la lailai o ka noho opiopio ana a me ka noho ikaika ana, me ka i iho, "aia a hiki mai ka wa mai, a me ka wa elemakule, alaila e malama lakou i ke Akua." O ka hoomaewaewa no keia i ke Akua. Manao lakou e hiki mai na la malumalu—ka wa e pau ai ka lealea ana ma na mea o ke kino—alaila e hoomanao lakou i ke Akua. Aka, aole no e loaa ia lakou ia wa kupono. Napoo koke iho ka lakou la i ke awakea, a kaheaia lakou e halawai me ke Akua me ka makaukau ole.
                Ke kahea nei ka Haku i ka poe opiopio, me ke ao aku ia lakou e hoomanao oe i kou Mea nana i hana i na la o kou noho opiopio ana. E ao a e huli iaia, oiai e kau ana kou la lailai maluna ou, o uhi mai anei ka pouli ia oe, a loaa ole ka wa au e kali nei.

KE KIAHA RAMA.

                Eia no nei wahi kanaka, he omole ma kahi lima, a he kiaha ma kahi lima. Aa no hoi ka maka e nana mai nei, a helelei lua ka lauoho. He kiaha rama paha ia ana e mea nei e inu. I kuhi paha he mea lealea ia ke inu iho; i ono paha ka puu ia mea wewela he rama.
                Minamina maoli au i ua kanaka nei. Aole no ia i kena i ke kiaha hookahi, na ia kiaha hookahi no nae e hoopupule iaia, a e ike auanei kakou i ke kamailio lalau mai a me ka heneheneia mai e kanaka. A i ka lua o na kiaha he holo hikaka mai koe i kahi akea, a hakaka paha; a i ke kolu he luai mai paha kana e haukae ai, a hiamoe me he puaa la. He pono anei ke lalau aku ia mea? Aole paha.

MALAMA I NA MEA LIILII.

                Ma kekahi nupepa kamalii i paiia ma Bosetona, ua ikeia ka inoa o kekahi keiki i malama i kana mau keneta a pau i haawiia iaia e a ma ia malama ana loaa ka hapaha e kuai ai i ua nupepa la. Ea, e na keiki o Hawaii nei, aole anei he pono ia oukou ke hana e like me ia keiki? He hikiwawe ka pau ana o na mea ono. Mau ka maikai a me ka nani o ka nupepa ALAULA.

KULA POKII.
SABATI I.

1. Pehea e hoolea ai kakou i ke Akua?
Ma ka mele ana.
2. Makemake ke Akua e lohe i ke aha?
I na mele maikai.
3. Owai kahi mea i hoolea i ke Akua ma ka mele ana?
O na manu liilii o ka lewa.
4. Ua ike anei lakou iaia?
Aole, aka, no ka olioli, mele ae lakou.
5. Nawai i hanai i na manu?
Na ke Akua.
6. Pehea na holoholona?
Na ke Akua no i hanai.

SABATI II.

1. Makemake ke Akua e lohe i ko wai leo?
I ka leo o na keiki e mele ana.
2. Heaha na mele ana i makemake ai?
Na mele maikai, na mele hoonani ia Iesu.
3. Pehea na mele lapuwale?
Pono ole iaia.
4. Owai na mea e ao mai i na keiki i na mele maikai?
O na makua a me na kumu.
5. He hana pono anei keia no na kula?
Ae, he kupono loa.
6. Pehea ka mele ana o na keiki i ka wa o Iesu?
Hosana lakou i ka Mamo a Davida.
7. Owai ka i kapaia ka Mamo a Davida?
O Iesu no.

SABATI III.

1. Owai o Davida?
Ke alii o ka Iseraela.
2. Mahea e heluhelu ai kakou no Davida?
Ma ka Baibala.
3. Pehea kona hoolea ana i ke Akua?
Ma na mele nani he nui wale.
4. Owai hoi kekahi o na kanaka o ka Baibala i haku i na mele?
O Mose a me Solomona.
5. O na kane wale no anei?
Aole, o na wahine no kekahi.
6. Owai kekahi o lakou?
O Miriama a me Debora.

SABATI IV.

1. O na keiki a me na kanaka o ka wa kahiko wale no anei ka i mele i ke Akua?
Aole, o ka poe pono a pau.
2. O ko ke ao nei poe wale no anei ka i hoolea i ke Akua?
Aole, o ko ka lani poe no kekahi.
3. O wai ka poe ma ka lani i haleluia aku i ka Haku?
O ka poe mai keia ao aku i hoolaia.
4. O lakou wale no anei?
Aole, o na anela no kekahi.
5. He nui anei ia poe?
Ae, he anaina nui loa, i hiki ole ke heluia.

"KE ALAULA."
He Nupepa Hoikeike Kii,
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.

                25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ke ope hookahi, ME KA HOOKAA MUA IA MAI.
O. H. KULIKA, Luna Hoopuka.