Ke Alaula, Volume I, Number 4, 1 July 1866 — Page 15

KE ALAULA. 15

NA AINA HAU.

                "Eia hou no he kii! He mau pohaku aha la keia iloko o ke kai ! Ua ku oioi loa kekahi, winiwini loa o luna, hiki ole paha i ke kanaka ke pii maluna a kau iho."
                Ke i mai nei o Papa. "Aole ia he pohaku, aole no he aina." "A heaha ka ? '' wahi a na kamalii. "Alia; noho iho kakou a hai aku au i ke ano o keia kii." Noho iho la na kamalii a wehewehe aku la o Papa penei:
                "O kela mea olapalapa winiwini, he hau ia la. O ke Kai Anu Akau kela kai, ma na Palapala Honua oukou e imi aku ai a loaa. He mau aina no e pili ana me ia kai, a o ka mea nui o laila he anu. Aole no a hookahi mea ulu ma kau wahi o laila no ke anu. A o ka wai he kahe mai, mai kuahiwi mai, a lilo i wai paa, oia hoi he hau. A kahe hou mai he wai, a lilo i hau, e like pu me ka hau e kuakea nei iluna o Mauna Kea ke ano. A kahe hou mai no, a ku ke ahu o ua mea nei he hau, a lilo no i puu nui winiwini. A wela mai ka la hehee aku kekahi wai, a o ka kahe ana aku oia ke oioi o luna. A wela loa iho ka la, hoholo aku no keia puu okoa, a iloko o ke kai kahi e lana mai ai, me heaha la ke nana aku. A oia keia a oukou e ike nei ma ke kii. E nana oukou, ua haahaa loa ilalo ke kia o ka moku, ua kiekie kela iluna."
                "A pehea ka moku ina komo mawaena o ua mau puu i hoolanaia io ia nei? Pepe paha, pau paha i ka nahaha?" wahi a kamalii. "Ae pilikia io no ka moku i kekahi manawa, a i kekahi manawa paa ka moku iloko o ka hau a hemo ole, a pau na kanaka i ka make. A o na makamaka ma ko lakou home he uwe ka lakou, me ka ninau, 'Aia la ihea ko kakou poe i hele aku nei?"

KE KAIKAMAHINE ME KA ROSARIO.

                I kekahi la i hala iho nei ua hele au ma ke alanui e pili ana ua ka Halepule Katolika Roma, a i kuu hele ana nana aku la au ma ka puka komo o ua halepule la. Ike aku la au he kaikamahine e noho ana ilalo, a ma kona lima he lei hua. E aha ana la ia ? Ina he kukuli kana ilalo, ina ua manao au e pule ana, aka ua hoomanao au i ke kauoha a ka Mea Hoola, penei: "Aka, i kau pule ana, e komo oe i kou keena mehameha, a papani oe i kou puka ; e pule aku i kou Makua, ina no ma kahi nalo, a o kou Makua e ike ana iloko o kahi nalo, oia ke uku mai ia oe ma ke akea."—Mar. 6:6. Nolaila, noonoo iho ia au aole paha he pule ia ana e hana nei; ina he pule, ina ua hele kela ma kahi malu, e like me ka Iesu kauoha.
                Aka, e malama ana paha ia i ka ke Akua ma kekahi ano e ae paha. E like paha me ke kaula wahine o Ana i oleloia ma Luka 2:37, i malama ai i ke Akua me ka hooke ai a me ka pule, i ka po a me ke ao. Eia nae ka hewa : aohe oleloia he hua lei kekahi a Ana i helu ai, aole no kekahi olelo hua lei ma ka Baibala.
                Ua lohe pinepine au i keia mea, o ka helu ana i ka hua lei i ka wa e pule ai, a o ke ano o ia mea, oia o ka helu ana i na pule i pau i ka pule ia. A pau hookahi pule ana i ka pule a ka Haku. hoholo kekahi hua ma ke kaula, a pau elua, hoonee hou aku i hua, a pela aku a i ka iwakalua, i mea e ikeia'i ka nui o na pule.
                Oia paha ka hana o keia kaikamahine. Eia nae na mea i ku ole i ka ano pule: o ka hele ole aku ma kahi mehameha e halawai pu ai me ka Makua ma ka lani, a o ke kukuli ole ma ke ano pule. A eia kekahi. Ua papa mai ka Haku penei: "I ka pule ana, ma kuawili wale aku oukou i ka olelo, e like pu me ka poe kanaka e ana e hooloheia mai ai lakou., Mai hoohalike me lakou; no ka mea ua ike no ko oukou Makua i na mea e pono ai oukou mamua o ka oukou noi ana aku iaia.—Mat. 6:7,8.
                Aole no i hiki ia'u ke hoole i ke aloha o kela kaikamahine ia Iesu, no ka mea e imi io ana no hai ole mamua o ke kauoha a Iesu. E nana pono kakou a pau, ka poe iaia na olelo a ka Haku, e hahai mamua o keia malamalama iwaena o ka pouli. No ka mea o kona olelo he ola ia ia kakou nei. A pela ka pule a ka Haku ; he pule puka wale ana aku, a i ka hoopuka kinikini ana ia mau olelo hoano, he mea ia e lilo ai i mea ano ole, oia hoi ka mea i kapaia he kuawili a Iesu i papa mai ai.

O NANEKI OLIOLI.

                Ua noho kekahi wahine iloko o kekahi hale kahiko; i ka nana'ku, ua like ua hale la me he hale moa la. O keia wahine ua malama pono i kona kihapai liilii, a ua loaa iaia i kona ola ma ka hana kakini, a me ka hana hili lopi, a ua kapaia oia e na kamaaina o kela wahi o " Naneki Olioli." Aole ona dala, aole keiki, a aole makamaka, a ua hele a aneane makapo, a ua lolo, a lilo i kuapuu.
                Hea mai la kekahi kanaka e hele ana ma ke alanui, a ku mai ana mawaho o ka puka pa, "E himeni ana no hoi oe e Naneki." "Ae, ka'u wahi i ka'u himeni ana?" wahi a ka wahine, a aka iho la. Olelo ke kanaka, "Eia ka lakou manao— oli loa la." " He oiaio no, no ka mea ua like pu ka olioli ma kuu naau me ka loihi o ka la."
                Mea mai ke kanaka :" Ea ! e Naneki e, ke makemake nei au e loaa ia'u ke kumu o kou olioli mau ana, no ka mea ua noho oe maanei, o oe wale no, a ua hana oe me ka ikaika, a aole nui na mea hooluolu kino, ma kou wahi."
                Penei ka olelo o keia wahine : "Aole he mea e, o ke Akua wale no. No ka mea o na kanaka waiwai, ua lilo ka lakou manao i ka lakou hana, lilo i ua wahine, me na keiki, a pihoihoi hoi lakou i na pilikia e hiki mai ana mahope. A no ka waiho ana o na mea a pau iloko o ka lima o keia ao. A ua noonoo au penei: ina ua hiki i ke Akua ke malama i keia honua e kaa mau ana i kela la, i keia la, me na hoku e kau mai ana i kela po, i keia po, me na mea ulu i kela malama, mai ia'u, kahi wahine naaupo, A o ka'u mea no paha ia e oluolu loa ai ko'u noho ana."
                "Pehea oe ke hiki mai ka wa anu, pilikia paha?" "Aia a hiki mai ia manawa, na ka Haku no e malama mai. O ia mea no kekahi iloko o kona lima. A ina noho oukou me ka noonoo nui ole ana i na pilikia, pomaikai oukou."
                Olelo mai la ke kanaka : "O oe paha ke komo ana i ka lani; aka o ka nui o makou, ka poe waiwai, aole paha e komo ana."
                Pane mai la o Naneki: " Ke nana nei oe ma ka aoao pouli o ke ao—ko Satana hoowalewale ia; o ka'u hana ke kipaku aku iaia."
                Pau ka laua kamailio ana, hele aku la keia kanaka me ka manao. Akahi no a ikeia ka ilihune olioli loa o ka naau e like me keia wahine.

NA KULA SABATI O HONOLULU.

                He mea e olioli loa ai a e hauoli ai na naau o na makamaka o Ziona i ka ikeia o na koa pono o na Kula Sabati o Honolulu e ku ana malalo o ko lakou mau hae i ka la i hui ai na Kula Sabati o ke kaona ma ka luakini o Kawaiahao, oia ka la 16 o Iune. Eha kula i huiia ia la: ko Kaumakapili, ko Kawaiahao, ko Kaukeano a me ko Polelewa—elua kula haole, a elua kula Hawaii, me na kula apana, oia na lala o na na keiki kula i akoakoa mai ia la, me na makua a me na makamaka. O ke Komisina o Amerika kekahi i hoike mai i kona aloha a me kona hoihoi i na keiki ia la.
                Pau ka lohe ana i na olelo ao a me na olelo hoolana manao a na makua a me na makamaka, me ka hookani lea ana mai o na keiki i na leo kani o lakou, he mau mea ono a he wahi ai ka lakou. Hoi aku ke ahaina me ka lana no o ka manao no Hawaii opio.

KE KULA SABATI O WAILUKU.

                Ua haiia mai ka lono ia makou, ke pii nui ae nei ka mahuahua ana o na keiki Kula Sabati o Kahekuawa o Wailuku, malalo o ka hooponopono ana o Toma Kakina. O kahi no ia i hooakoakoaia'i na kahuna opiopio ma ke kula o na kaula. E ao pono lakou ma keia hana maikai, o ka lawaia no na ia liilii me ka upena makalii.