Ke Alaula, Volume I, Number 4, 1 July 1866 — Page 14

14 KE ALAULA.

KA HOIKE KULA NUI O WAIALUA.

                Hoikeia keia kula i ka la 19 o Iune. He haneri paha a keu na makua mea keiki ma keia kula i hiki aku a ike pu i ka hana a me ka makaukau o ka lakou mau kaikamahine i keia la, a ua piha loa no ka luakini o Waialua i na makamaka. Ua hoikeia na haumana ma ka'Moolelo Baibala, ka Helu Naau, Huina Helu, Palapala Aina, na ano Holoholona, ke Kakau Lima, a me ka Hoike Akua. Ma ka hoike ana ua akaka ka makaukau a me ka mikioi o kekahi mau haumana.
                O na mele ka mea i mahalo nui ia e na malihini hoolohe mai, me he pupu kani-oe la a me ke kahuli leo lea o ka nahele na leo oluolu o na kaikamahine o Hawaii.
                Ua hoi aku ka lehulehu makamaka me ke kau i ke Akua e hoopomaikai mau mai.
                O kekahi mau Lio he ano oluolu loa mai i ke kahu. He hoolohe a makemake mai, a hahai mai no. Ina he keiki liilii ko kauia maluna, he hele akahele, me he mea la e malama ana i ke ola o ke kahu opiopio.
                O ke ano Lio oluolu he hikiwawe no ka hoolakalaka ana, a ina i laka pono iho, he luhi ole ke kahu i ka hopu ana a me ka hooholo ana, ka hoohana ana a me ka hounaunu ana. O na Lio o ia Lio iaia.
                Ua ike no kakou ma Hawaii nei he haahaa loa ke kumukuni o ka Lio ino a huhu. E loaa no ia oe ia ano Lio no na dala elua, ekolu a elima paha. No ka hoowahawahaia, nolaila ua hooemiia kona kumukuai. Aka o na Lio maikai, na Lio ano oluolu a hoolohe, na Lio i ao ia i kela hana keia hana, he pii loa no ke kumukuai o lakou, mai ke kanalima dala ke kumukuai a pii aku i ka elua haneri dala.
                Pela no hoi ka makemakeia o ke kanaka. E like me ke ano o ke kanaka, pela no kona kumu e hoolimalimaia'i. Ina he kanaka naaupo a hemahema, a hana kapulu paha, e emi loa no ke kumu hoolimalima no ia kanaka. Ina hoi e loaa ia oe he kanaka makaukau, makaala a naauao, e pii no ka uku hoolimalima no ia kanaka. Aole hoi ma ke dala wale no i ikeia ka maikai o ke kanaka ma kana hana. O ka mahaloia mai, a me ka haawiia mai ke aloha o ka lehulehu, oia kekahi uku nui o ke kanaka pono ma keia ao. Oia uku e loaa aha i na kanaka pono a me na mea a pau i hooikaika e hoopomaikai ia hai.
                He Lio laka a maikai loa no keia i hoikeia ma keia kii. Ua kau aku ke keiki i kona Ilio maluna o ka noho, a ua oluolu keia Lio laka i ka noho ana o keia wahi Ilio me he Keko la maluna ona. Lealea hoi kahi Ilio. Ma ka noho oluolu pu ana o kekahi mau holoholona o keia ano, ua lilo lakou i kumuao no na keiki.

KE KAIKAMAHINE I POWAA

                E noho ana ke alii wahine hoomana Pope ma Sekokia i na kau i hala. Hooikaika oia e hooulu i ka hoomana o kona ekalesia a e hoohuli i na keiki mamuli o kona aoao. Kukulu oia he mau kula, a hoonoho aku i na kumu kula Pope e ao. Aole nae i makemake na makua a me na keiki i kela mau kula.
                No ka loaa ole iaia i na keiki mamuli o ka hana hooluolu, nolaila hoao oia i ka hana oolea. Kukulu oia he hale kula hanai kaikamahine ; he nui a he nani ka hale, a me ka pa e apo puni ana. Hoopuniia ka hale kula me kekahi pa hao kiekie loa i kukuluia me na hao, elima me ka hapa paha iniha ke akea mai kahi hao a kahi hao, i hiki ole i na kaikamahine ke holo aku mai ke kula aku. A paa ka hale a me ka pa, a ulu na pua nani a me na laau malumalu, a hoonohoia na kumu, ilaila kauoha aku la ke alii wahine i na maikai e hopu aku i na kaikamahine a hookomo mai ia lakou ma ua hale kula paahao la.
                E noho ana ma kekahi wahi he wahine kanemake ilihune me kana wahi kaikamahine hookahi, he milimili nana. Ao aku ka makuahine haipule i kana keiki i na mele maikai, a heluhelu pu laua i kela la i keia la i ka ke Akua olelo, a pule pu. O kona wahi hoaaloha, hoahele hoakamailio no keia i ke ao, a i ka po, moe no ma kona poli. O Mele kona inoa.
                I kekahi la nalowale keia wahi kaikamahine: Oi huli wale ka makuahine ma na wahi a pau, aole nae i loaa. Hele kela i na hale o kona mau hoalauna a pau, aole nae i loaa. Hai mai kona mau makamaka i ko lakou manao, ua kaili malu ia paha kana keiki e na makai a ke alii wahine. I ka lohe ana o ka makuahine i keia, hoomaka oia ka hele i ke kulanakauhale kahi i kukuluia keia kula hanai kaikamahine. Hele wawae aku ai i ke ala loa, a hala kekahi la, a hala hou, ae he la a hala hou ae he la, pela kona hele ana a hiki i kahi o ke kula paahao.
                I ka hiki ana ilaila, ua paa loa ka puka, aole i ae ia oia e komo a e huli i kana keiki. Hele ae oia mawaho, aole nae i hiki ke komo i ka pa, no ke kiekie o ka hao i kukuluia. Ike aku la ia i na kaikamahine he nui e paani ana maloko, a e lealea wale ana, aole nae lakou i hookokoke mai i ka pa, aole hoi oia i hoomaopopo o kana kaikamahine kekahi. Make iho la kona manao iloko ona. Pehea la e akaka ai iaia ka noho ana o kana kaikamahine maloko, a me ka ole? Manao iho e hoi nele aku paha auanei au me ka loaa ole o kuu keiki!
                Ia manawa ulu iaia ka manao e hapai i na leo mele mawaho ae o ka pa—malie paha o lohe kana keiki a holo mai a halawai me ia ma ka pa. Hookokoke aku ia ma ka pu, a himeni ae i na mele ana i mele pu ai me kana kaikamahine ma kona home. Himeni ae oia ma kau wahi a hoolohe ole mai na kaikamahine iaia ; nee aku ma kau wahi e mele hou ai, a pela ia i hele poai puni ai i ka pa o ka hale kula.
                E mele ana ua makuahine nei mawaho, a e paani ana he poe ka kamahine maloko o ka pa. Lohe ae la kekahi kaikamahine i ka leo a me na mele i kamaaina i kona pepeiao haalele oia i kona mau hoapaani, a holo aku ma ka pa ma kahi i hoea mai ai ka leo. Hooho hauoli loa ke kaikamahine, a uwe aloha aku i kona makuahine. Kulu iho la ko laua mau waimaka. I ae la ke kaikamahine : " I kuu lohe ana i kou leo e mele ana i na mele a kana i mele pu ai ma ko kaua manao wau aole mea e ae e mele ana ia mau mele, o oe wale no." Nonoi ae ia i kona makuahine e hoopakele iaia mai ia hale paahao aku. I ae la ia : "Aole i ao ia maanei na mele maikai a kaua i mele pu ai a o ka Baibala, ua hoonele loa ia mai ia makou, aole i ao iki ia ma keia kula. Nolaila, e kuu makuahine, ina e noho loa wau maanei, e lilo auanei wau i keiki pono ole."
                Alaila olelo ae ke keiki i kona makuahine: " E hooikaika oe, i puka wau ma ke kowa mawaena o keia mau hao. E hiki aku oe i kuu kino, a e oni aku wau—malie paha e puka wau." Kunihi ae la ke kaikamahine i kona kino a hoopuka aku i kona mau wawae, a huki aku ka makuahine.
                O ka hemo pono no ia o ke kino o Mele, kou ke poo. No ka nui o ke poo, hele a pilikia, a paa loa ke poo iwaena o na hao elua. Hooikaika laua, aole nae i hemo. I iho la ka makuahine : " E kuu keiki, ua pilikia loa kaua, aole oe e hemo ana, nolaila e pahu hou aku au i kou kino iloko, aole wahi e hemo ai oe." I iho la ke keiki: "Aole, e kuu makuahine, e hoomanawanui au i ka eha o kuu poo, a e huki ikaika aku oe i hemo wau ; aole no wau e makau i ka eha." O ka huki ikaika no ia o ka makuahine a hemo aku ke keiki, me ka poholehole o ka ili o ke poo. Kahe ae la ke koko ma kona mau papalina. Wahi iho la ka makua iaia iloko o kona kihei a lawe iaia, a holo aku i kekahi awawa e pee ai, a hoi loa aku laua i ko laua home. Ilaila no i noho pu ai laua a nui ae keia kaikamahine, a loaa kana kane, a hanau keiki. Na ka moopuna kualua a keia kaikamahine i hai mai ia'u i keia moolelo e pili ana i kona kupuna wahine e noho ai mai kahi i ao ole ia ka Baibala.            Pehea kakou, e na keiki o keia aina pomaikai ia mai loko o ka Baibala, a he hiki ke hoomanawanui i na pilikia kino, a me ka eha maoli, i mea e paa ai ia pomaikai? Aloha maoli a menemene ka naau i na keiki i hooneleia ka Baibala.
Na'u na E. P. CHURCH.

E HOOMANAO MAI.

                Ina he nu hou kekahi e pili ana i na Kula Sabati, he mea e hoolana ai i ka manao, a ina he mea e ae e hoohauoli ai i na keiki, e hoomanao mai oukou, e na makamaka, a e hoike mai, i hiki ia makou ke hoolaha aku i ke akea.

                Ua hewa paha kakou ma na kanawai a pau b na Kanawai he Umi. Ke i mai nei anei kekahi, "Aole paha au i pepehi kanaka ? " Ke i nei ka Baibala o ka mea i inaina i kona hoahanau he pepehi kanaka ia. Aole anei oe, i huhu pela?