Home Rula Repubalika, Volume I, Number 16, 15 Malaki 1902 — Page 6

6  HOME RULA REPUBALIKA, POAONO, MARAKI 15, 1902.

 

Ka Nupepa
Home Rula Repubalika
NUPEPA PUKA PULE.
KEENA, POKA HALE, ALANUI NUUANU

No Hookahi Mahina,.... $ .40
No Ekolu Mahina,.... $1.20
No Eono Mahina,.... $2.25
No Hookahi Makahiki,.... $4.00
KUIKE KA RULA.

MRS. R. W. WILCOX, Lunahooponopono
Ona me Puuku

HONOLULU, MARAKI 15, 1902

KA LONO MAI KA KAKOU ELELE I ALOHA NUI IA, HON. ROBERT W. WILCOX.

                Ua maikai loa ko'u ola kino i keia wa a ua hiki ia'u ke ai i ka i'a a me na mea ai kaumaha e ae, a i keia mahina au e hele ai e hana i ka hana a ka Lahui.
                E haawi i ko'u aloha i ka Lahui Hawaii.

NUI KA EPA.

                Nui no hoi ka wahahee o keia poe e lawe hele nei i ka inoa Hanohano o ka Elele Wilikoki, ma ka olelo ana penei:
                "Mai hooikaika mai oukou ia'u no ke kulana Kiaaina, oiai ua hoole maoli ia mai au, aole e loaa ana ia'u ia kulana. Nolaila, e hooikaika iho oukou i kanaka okoa ma ia wahi a hoouna mai i ka inoa."
                Ke pane aku nei makou, he wahahee loa keia mau olelo, aole loa pela.
                Aole ka Elele i hooleia ma na ano a pau e ka Peresidena, aole no hoi ka Elele i kakau mai pela. Hilahila ole maoli no ka poe hakuepa wale!

E NA MAKAMAKA HAWAII.

                Ua loaa ia kakou i keia wa he nupepa ma ko kakou aoao a ke manaolana nei au e lilo keia pepa i kahua no ko kakou mau manao akea.
                Ua ike no kakou i ka hana a kekahi mau nupepa, he kue loa i ko kakou mau manao.
                Nolaila, ma keia pepa e hiki ai ia kakou ke olelo wiwo ole, a ke kaena hoi no ko kakou mau pono ma ko kakou aoao, a e ikeia auanei na aoao a ka pono io i hookahua ai.
                E na makamaka e—mai puni waie i na olelo lalau a na nupepa ole loa, oiai, aole ike, he hawa'e kai nui.
                Nolaila e apo like kakou i keia pepa a loaa ko kakou elele e hoouna aku ai ma na kihi eha o ko kakou Teritori me na poka pahu o na kalai manao ana.

E LOKAHI E KA LAHUI.

                Ma ka hoohui ana e loaa ai he ikaika.
                He hiki wale no ia oe ke uhai i ka apana laau i like ka manoanoa me kou manamana lima; aka, ina e nakinakiia kekahi mau apana laau oia ano a paa, aole loa e hiki ke uhakiia.
                O ka Lahui i hoohui lokahi like ia, ina no he uuku ko lakou heluna, ua ikeia ko lakou ikaika mau, a ua hiki ke hana i na mea nui.
                Ua loaa ia oukou ka mana ma ko oukou mau lima, a ua loaa no hoi ia oukou kekahi mau mea maikai i oi aku mamua o na mea a pau, a oia hoi ka balota.
                Nolaila, ke kahea leo nui aku nei makou imua o oukou a mailoko ponoi mai o ko makou puuwai—
"E hui lokahi like,
E ala—e na keiki a Umi!
E ku—e na mamo a Wakea!"
                Oiai, mailoko mai oukou o ke koko o kekahi Lahui nui, a e lilo no oukou i Lahui ikaika ina oukou e kupaa a hui lokahi like.

HOOPILIMEAAI.

                O keia kekahi hana ino loa a ke kanaka e hana ai, a o ke kanaka oia ano, ua oi aku ke ino mamua o ke kekake. Ua hoowahawaha ke kanaka i kona lunaikehala ponoi iho, a me kona noonoo ponoi, a ua pili wale aku mahope o ko hai manao.
                He mea nui keia na ka noonoo e ike iho ai a e hiki ai ke ninau iho, "ua hoopilimeaai anei au?" Owai ka poe o keia ano? Hilahila paha ke hai mai!

MAKE O E. C. MAKAPOLENA.

                Maluna o ka mokuahi Nipon Maru i hoea mai ai i ka auina la Poakahi nei i loaa mai ai ka lono kaumaha i keia kulanakauhale no ka haalele ana mai o Ede Makapolena i keia ole ana maloko o na paia o ka Hotele Auditorium ma Kikako, ma ka hora 2 o ka auina la Lapule, Feb. 16, mahope iho hoi o ke kaa ma'i ana no hookahi wale no pule.
                E hele ana o Makapolena ma kekahi huakai hauoli me kana wahine i mare ai he mau la pokole wale no mamua iho, aka, aole nae i loihi ko laua noho ana iloko o ke apo gula o ka mare ua moku koke ae la. Ua mare o Makapolena me kana wahine opio o 22 makahiki, Miss Florence Ballinger o Kapalakiko i ka la 6 o Feberuari, nolaila, ua piha ia laua na la he umi wale no a pauaho koke mai la oia i keia ola ana. Ua hoea aku o Fred Makapolena i Kikako a hoihoi mai la i ke kino make o kona hoahanau a me ka wahine kanemake no Kapalakiko. Ua hoihoi ia mai nei ke kino make no Honolulu nei ma ka mokuahi Alameda, a ua ukali pu mai kana wahine a me kona hoahanau Fred Makapolena me ia.
                Ua hanauia o Makapolena ma Oahu nei he 49 makahiki i hala ae nei, a o kana wahine mua loa keia i mare ai. Ua hoopiha ia ka ohana a me na hoaloha o Makapolena me ka ehaeha no keia nuhou kaumaha i loaa mai ma ka Nippon Maru, a ke liuliu ia mai nei kona home no ka hookipa ana mai i kona kino puanuanu. Aloha e! Aloha no.

                O Puakauwahi ka inoa o kekahi kanaka, he ipo oia na kekahi wahine ui. E noho ana ua wahine ui nei me kekahi wahine okoa iho a olelo ae la ua wahine ui nei: "Hohono uwahi lua hoi o Puakauwahi i nehinei, keu ka paku'i!" Eia nae ua kanaka nei mawaho o ka hale, a o ka hilahila no ia i ka lohe ana, a o ka hoi koke no ia.

J. M. Maunakea

Loio, Luna Hooiaio
Keena Helu 20 me 21
Hale o ka Ona Miliona
Huina o na Alanui Papu
a me Kalepa
Honolulu, T. H.

J. W. A. Redhouse

MEA HANA UWAKI HOLO MOKU
Na Uwaki Pakeke ame Kauhale.
206 ALANUI KALEPA,
Honolulu, H. I.

Hui Kuai Pipi
METROPOLITAN, LTC.

108 Alanui Moi
G. J. WALLER (Wala) Luna Hoohana
Kuai Nui a Kuai Liilii
Hoolako i na Halekuai Pipi
A me na Moku

HUI CITY MILL
[KAUPALENAIA.]

Hale Kahi Laau ame Wili Raiki
Na pono a me na Lako Kukulu Hale
E KUKULUIA NO NA HALE MA KA AELIKE E UKU LIILII MA KA MAHINA.
He Haahaa na Kumukuai
A he oluolu i na Hawaii
KEENA HANA:—Kihi o na Alanui Moiwahine ame Kekaulike
5-tf  Pahu Hale Leta 951

B. F. EHLERS & CO.
(PAINAPA MA.)

Kuai Hiehie Hoemi Nui!
O na
LOLE WAHINE a me NA PAKU PUKA ANIANI.
E hoomaka ana ma ka Poakahi,
Novemaba La 25.
NO HOOKAHI PULE WALE NO.
Lole Keokeo.... 20 I-a, $1.00
Nahenahe Alapine.... 30 I-a, $1.00
Kalakoa Amerika.... 25 I-a, $1.00
Kinamu.... 25 I-a, $1.00
A me na waiwai e ae he nui ma na kumukuai emi loa.
B. F. EHLERS & CO.
Alanui Papu