Home Rula Repubalika, Volume I, Number 1, 2 Nowemapa 1901 — E ka Lahui Hawaii e! [ARTICLE]

E ka Lahui Hawaii e!

Kuu Hoa @ [hoi] o ka Inea. E kala mai iaʻu no koʻu kiei ana aku ma kou ipuka hale, no ka mea, i hiki ia aku no @[kahi] o na 'lii he manao. Eia la he hana— he pale, he oki, he hoomoe, a he kipapa i alanui nou e Hawaii-nui-a-Keawe, kaukolo mai o Maui-o-Kama, i hookahi ka pae'na la e Molokai nui a Hina, pulamaia mai ou pokii mokupuni, a nau e ka Moku o Kakuhihewa e alakai, a he pae wale mai no hoi ka Kauai-o-Manokalanipo. E ala like mai a e hana i ka hana o i kau ka la ; e ku a maloeloe, a e kaei i na puhaka ; huli mai ke alo, a e papa olelo me ka malihini. Mai hoohewahewa mai ; owau okoa iho la no nei mai luna a lalo, o ka io o kou io a me ka iwi hoi o kou iwi mai ke koko hookahi mai, a i hoouhiia me ka ili hookahi. I hookahi ka manao a i hookahi ka hana. Kupaa me ka paupauaho ole a hiki i ka lanakila ana. Mai hoolilo i na anuu liilii o kou io ponoi i kumu nou e kakoo ai i ka enemi, no ka mea, ua oi loa aku ka pomaikai e loaa mai kahi apana palaoa mai kou hoaloha mai mamua o ka pau loa o ka omoomo holookoa i ka enemi. E makaala loa no ka enemi e hele mai ana maloko o ke koloka o ka hoaloha, no ka mea, e hiki ana i ka aahu ke hoololiloliia, aka, aohe wa e loli ai o kona kino. "O na manu o ka lulu like, lele like no lakou." Mai kua i ka laau maikai no ka maloo ana o kekahi o kona mau lala. A pela hoi, mai haalele i kou aoao kalaiaina—ka aoao kalaiaina hoi o kou io ponoi— no kou manao ana ua nawaliwali kekahi o kona mau lala. Nolaila, ia makou e hoolauna aku nei ia makou iho me ke kunou haahaa imua o ka lehulehu holookoa mai ka la puka ma Haehae a hiki i kona hooipo ana me Kuhaimoana, ke haawi pu au nei makou i ko makou lima akau o ka hoapaio hoopono i ko makou mau mua ma ke kahua kakele o ka makakila, a me ko makou aloha pilipaa hoi i ko makou mua mai ka puupuu hookahi mai, "Ke Kuokoa Home Rula." Nolaila, ke kauleo aku nei makou i ka Lahui Hawaii aloha Hawaii "E ike ia kakou hoakanaka, o kipa hewa ke aloha i ka ilio," a "mai paa i ka leo, he ole ka hea mai e,— maloko hale aku au ma ka mehana, Eia ka puu o waho nei la he anu."