Hawaii Holomua, Volume III, Number 206, 21 April 1893 — HE KANIKAU NO IMIA KAPAKAULA. [ARTICLE]

HE KANIKAU NO IMIA KAPAKAULA.

[Hoomau ia mai kela pule mai.] Kuu kane i ka waipuna o Kaaipu Oia wai hui anu helu minute Oia wai makahehi a na 'Lii He alii no ko aloha ke hiki mai A hiki mai no ko aloha e uwe no au Auwe kuu kane kuu kane hoi - e Kuu kane i ka ua nui o ka aina He Lililehua ko Palolo He Kaeleloli ko Makiki He Kuahine hoi ko Manoa Puluelo ka ili o kuu aloha Ia mau omaka lelehuna ua a ke Kiu Kuu kane i ka piina loa o ka Punahou Hoomaha aku kaua i ka luna i Puuomanoa He manoanoa ke aloha hana e ia loko Auwe kuu kane kuu kane hoi - e Kuu kane i na ale kuehu o Pailolo Oia mau lelehuna ale kopipi i ka ili o kuu aloha Pulu pu no maua ia mau hunakai Kuu kane i ka lai o Lahaina Oia wahi a kaua i noho malihini ai Me na mulipokii o kana Aloha ka lai o Lanikeha Me ka ua Paupili noe nee i ke kula Kuu kane i ke kula wela nopu o Makila Oia wahi a maua e alo ai me kuu aloha Aloha ka uluniu o Mala kuhao i ka lai Ke malama nei no au i ko aloha A hiki mai no ko aloha e uwe no au Auwe kuu kane kuu kane hoi - e Kuu kane mai na kai Ewalu o Aina Mai na ale kuehu o Papawai Pulu pu no maua me kuu aloha ia hunakai Kuu kane i na ale kualoloa o Alenuihaha Oia ale hanupanupa hone i ka ihu o ka moku Kau aku ka manao no ke kai Hawanawana Oia kai olelo nehe i ke one Huli aku kaua nana ia Pili me Kalahikiola O ka pa ahe olu mai a ke Apaapaa He makani haaheo i ano ko laila kupa Kuu kane i ka wailele o Hiilawe Oia wai kamahao i ka maka o ka malihini Kuu kane i ka lai o Hilo one Me kahi wai olu hui o Punahoa Kuu kane i ka ua Kanilehua He lehua no ko aloha na'u e kui nei A hiki mai no ko aloha e uwe no au Auwe kuu kane kuu kane hoi - e Kuu kane i ka la hiki mai ma Kumukahi Me ka makani olu nahe he Puulena He makani hali ana ia no ke one hanau o kuu aloha Kuu kane mai na kahawai hilii o Hilo Paliku Hoomaha aku kaua i ka malu hale O na makua o kaua Oia malu hale leo ole a kaua i noho ai A ka lai kaua i Kapena Huli aku kaua nana O ka waiho mai a Leleiwi i ke kai Au ae kaua o ka waiho mai a ka halii i ka mole olu Oia wahi a kaua e luakaha ai Kuu kane i ka wai olu o Manuhele Oia wai a kuu aloha e luu poo ai Aloha ko leo i ka pane ana mai E mama e hoi kaua E ike i ka uluwehi o ke kaona Kuu kane i ke kai o Punaluu Oia kai oehaa a ka malihini Kuu kane i na kehau anu o Maihi pupue pu no maua me kuu aloha ia hui anu Kuu kane o ka mokuahi Kilauea Nana kaua i lawe haaheo i na kai Ewalu o ka aina A hiki hou kaua i ka lai uluwehi o ke kaona Kuu kane i ke awa lai o Kou Me he pua Kou ala ko aloha a'u e lei nei A hiki mai no ko aloha e uwe no au Auwe kuu kane kuu kane hoi - e Mrs. K. Kapakaula.