Hawaii Holomua, Volume III, Number 10, 4 March 1893 — HE MELE NO LILIUONAMOKU. [ARTICLE]

HE MELE NO LILIUONAMOKU.

— He mohai he aiana Nou e Kalani No ka Hiwa Kukahi noho i ke kapu E ike e ka la e kau nei I ka noho aupuni o Kalani Puuwai hopo ole o Hawaii He aloha lahui me ke aupuni Kulia imua a lanakila Na na Kahikolu Hemolele loa E kila a paa Ko aupuni Ka Hokuloa Kou kokua Ua ike e ka lani me ka honua Ua ike ko luna pii ko kai Ua ike Ou kupuna o ka po I ka makia o Ko aupuni Nohopono i ka pi’o o na pua Ko pi’o ohi pua ia e Kalani E lanakila Oe a mau loa A kau i ka ihi o ke Kalaunu Ke aloha o na lani kiekie Na kupuna mai kalewanuu mai O Kinauokalani Kou kupuna O Kahailiokalani kona ukali O na ahi no ia a Haumea Nana e kaapuni nei ka honua O ke kumu o ka mole mai lalo mai Nana e paa nei Ko aupuni Ua paa ko Paemoku e Kalani O Liliu ka Makua o ka lehulehu Ua piha olioli Ko Lahui Ko noho aupuni mai luna mai Hea aku makou o mai Oe Onipaa Ko aupuni e Kalani. He makana he aloha Nou e Kalani I O ke Kama ua kau i ka Ihikapu Ua holo ua ae na lani Ua lokahi like na anela Ke hosana mai nei i ka lewa E hoi o Liliu i ke Kalaunu 1 ka noho ihikapu mai luna mai Ilaila o Liliu onipaa iho Puka mai Ko leo me ke kamahao E ola kuu Lahui Oiwi A ola na Paemoku o Kalani Ehuehu mai ka ua mai ka lani Himeni Kalani kuakua Ke olioli nei ka honua Ua loaa i ka huaolelo O ka ike o ka mana o ke ola Pule aku makou e ola Oe Ola Oe, ola kaua, ola kakou O ka I, o ka Mahi a o ka Palena E mau e ka Ea o ka Aina i ka Pono E Uli e! E ola o Hawaii Me Liliu i ke Kalaunu. He pule he uwalo Nou e Kalani Kahea ia ae Ou kupuna O Pele o Hiiaka ko Hawaii Ke ahi a mau i Maunaloa Kanehekili ko Maui ia Ka pu nakolokolo i ka lani O ka Mohoalii ko Hanaloa Ke kupua nui o ka Moanakai Kaneapua ko Lanai Ke alii kapu ia o Hanauli Kahuilaokalani ko Molokai Ke ahikao lele i ke ahiahi Kaahupahau ko Oahu uei Ke aiwaiwa ia o Puuloa i Manokalanipo ko Kauai He akua he alii mai ka po mai Kuhaimoana ko Niihau A o Kupiopio ko Kula ia Na paku ia Ou Paemoku Maluhia Ko aupuni e Kalani Aohe kipi aohe eu Nana e pakaha Ko aupuni Lilo i mea ole na enemi Lanakila loa o Liliulani. Hakuia e MlSS NOHOPONOIKAPIKOONAPUA. Maluikeao, Mar. 1, 1893. Minamina makou i ka lohe ana mai i ka hana ino a ko na Wai Eha poe i kahi pepa kumakaia a Kawainui. O ka makou wale no e kauleo aku nei; mai hana pela, e uumi i ke kuakoko o ka inaina, aka, aia nae ia ia oukou. Ma kekahi la o ka pule i hala, ma ka Malu Ulu o Lele ua hoohua mai mai ka puhaka mai o Mrs. Kaula Shaw he mau keiki mahoe he hookahi keikikane a he hookahi kaikamahine. O ka makou wale no e kalokalo ae nei i na Lani i ka puaaneane.