Hawaii Holomua, Volume III, Number 142, 19 January 1893 — HE MOOLELO EEHIA NO KE KANAKA-AUWANA O KE AU KAHIKO. [ARTICLE]

HE MOOLELO EEHIA NO KE KANAKA-AUWANA O KE AU KAHIKO.

MOKUNA VI. NO MAIIANA He kakaikahi loa na huaolelo i lohe ia mai ka Moiwahine mai oiai na hoa e ai ana. Aka nae, he mea hiki ole ke kapae ae i ka olelo ana, o ka hapanui o kona manawa ma ka papaaina ia Oseseni wale no kona mau maka. O ka hapalua like paha ia o ka maona o na mea a pau, aia hoi me ke kupanaha nui, hemo mai la na puka ma kekahi aoao o ua keena ahaaina la a hamama, a kuemi aku la na koa kiai i hope me ka maka’u nui, no ka mea, aia ma kekahi aoao o ua keena la e ku ana kekahi mau kanaka elua. He mau helehelena nanakea ko laua, a ano malohaha, me he mea la mai kekahi huakai kaahele loihi mai, he mau ihu kikiwi ko laua e like me ka pi’o o ka kuku o ka aeto, a o ko laua mau maka ua piha me ke koko, me he mau maka la no kekahi mau liona pololi. E aahu ana laua he mau lole kapa ili holoholona, he kaei ili ke aluhee ana ma ko laua puhaka, a me ka leo kakana o mai la ko laua mau lima imua me ka olelo ana i ka lehulehu e hoomalu ia lakou iho He mau elemakule laua elua ua hele a aahu ka ohu maluna o ke poo a me ka papa auwae o kekahi o laua, a o ka lua hoi aohe ona umiumi, ua like ka hinuhinu o kona auwae e like me ko na kahuna kahiko o Aigupita. I ka manawa a ua mau elemakule nei i kauoha ma ai no ka hoomalu ana, ua huikau ae la ke anaina no ka maka’u, a me ko lakou mau lima palulu ae la lakou i ko lakou mau maka, a koe hookahi ka Moiwahine Mariana a me ke Kanaka Auwuna. O ka Moi Parao kekahi e palulu ana i kona mau maka ia manawa, a me ka leo haahaa hawahawa malie iho la oia i keia mau huaolelo malalo iho nei maloko mai o kona umiumi.