Hawaii Holomua, Volume II, Number 14, 2 April 1892 — HE LEI MOMI UA HALA. [ARTICLE]

HE LEI MOMI UA HALA.

E ka Hawaii Holomua; Aloha oe: — Me ka lana o ka manao, e ae mai ana no oe a me kou kapena puuwai heahea a ahonui, e hookomo iho ma kahi kaawale o kou kino lahilahi i keia wahi puolo walohia, oia hoi kela mau hua e kau kehakeha ae la maluna. Ma ka hora 3:30 a. m. o ka Poakolu iho nei. Mar. 30 ua kii mai la na lima palanehe a menemene ole o ka make a kaili aku la i ke'aho hope loa o Miss Marie Leialoha Kahawaiolaa, ma kahi noho o Mrs. D.K. Naiapaakai ma Kauluwela. Ua hanauia oia ma Kohala, aina kaulana i ka haaheo, na Mr. a me Mrs. W. Kahawaiolaa. ma ka la 14 o Novemaba, 1885. Nolaila, o ka nui o kona mau la o ke ola ana ma keia ao mauleule, 6 makahiki, 4 malama a he 16 la. A—e ka makani Apaapaa o ka aina haaheo o Kohala. aole oe e honihoni hou ana i na papalina ui nohea o Leialoha. E ke Ae o Kapaau — ua pau kou holoholo pu ana me Leialoha. E ka ua iniki ili o Lapanui, aole oe e houhou hou ana i ka ili o Leialoha. Walohia wale. Me na makua a me ka ohana i hoonele ia i ke kama ole ko’u a pu ana. S. W. Kalama. Kauluwela, Honolulu, Mar, 30. ’92,