Hawaii Holomua, Volume III, Number 3, 14 Ianuali 1892 — MAKE MAINOINO. [ARTICLE]

MAKE MAINOINO.

Ma ke ku ana mai o ke Kinau i ka Poakolu nei, i loaa mai ai ia makou ka lono e pili ana i kekahi ulia pauahi i ike ia ma ka Mahiko o Paauhau, Hawaii, ma ke kakahiaka o ka Poalima i hala. Ma ke kakahiaka i hai ia ae nei, e hana ana o Mrs. K. Arthur, ka wahine a ka luna malama hoki maloko o ka halekuke ma kekahi aoao o ka hale, a haalele aku la i na keiki liilii elua e hiamoe ana, a o ka makahiapo e paani ana, a ua manao wale ia ua loaa iaia kekahi mau laau kukae-pele malalo o ka bela. Mamua o ka ike ia ana o ke ahi, aia na mea e ae a pau o loko o ka rumi moe i kela manawa malalo o ka mana o keahi. Ua hoea mai na kokua, aole nae he mea i aa e komo iloko o ka ula o ke ahi, koe wale no ka makuahine, e hii ana i kekahi keiki mahope o kekahi. Ua hoao koke ia na lapaau ana, aka nae o kekahi o ua mau keiki la, iloko o umikumamalua hora mahope iho, ua haalele mai la oia i keia ola ana, a o ka lua hoi ua kamauiki a hiki i ka po o ka Poaono, alaila ukali like aku la mahope oia meheu. He mau kaikamahine laua elua a malalo wale no hoi o na makahiki 3. Ke kamau la no ke ola o ka makuahine, me na palapu a ke ahi maluna o kona kino. Aka nae oia mau alina he lei hanohano ia ma kona ai. E mahalo ia ka makuahine makau ole a aloha keiki e like me ia.