Hawaii Holomua, Volume III, Number 2, 7 January 1892 — KA MAKA O KA LANI! [ARTICLE]

KA MANA O KA LANI!

Oia no ka mana mai ka po mai:O ka Lani a me ka Po; oia no na wahi i manaoia malaila i noho ai, a mailaila mai i hoea mai ai ka mana o na Moi ma na moolelo kuahaua o Hawaii. Mai lunalilo mai, a mai kahi kiekie loa mai, a mai ka Lani mai i olelo pinepine ia ai, i hoea mai ai na mana Moi ma ko lakou noho hoomalu ana i na pono lahui a me ka pono hoomana akua. Mai mua loa mai, mai kinohi mai, a mai ka manawa kahiko loa mai, a mai ka Po mai, ka olelo ma ka moolelo no na wahi i hoea mai ai, i hiki mai ai, i hookauhua ma i

ai na ohana Moi o Hawaii. Ua pilipu ia mau huaolelo i na mookuauhau Alii a pau Ioa o keia Pae Aina. O na Alii a pau, ua Kahuna na kanaka, ua noho no lakou ma na kulana malalo iho, a me na anuu pili Ohana, Alii, Kahuna, Kanaka, e malama like ana i ka ihiihi, ke kapukapu, ke eehia ma ka ike ana, ka olelo ana, ka hele ana a me na hana ana imua o ka Moi; no keia kumu, he mea pono i kela a me keia mea i hiki aku i ke alo o ka Moi; e malama i ka hanohano o kona kipa ana aku, ke akahele o ka hoopuka olelo ana, ka makee i ka hoopuka i na huaolelo oiaio wale no; e like ka oiaio o kau mea e kamailio ai imua o ka Moi e like me ka oiaio imua o ke Akua o ka Lani; ke Alii maluna o na 'Lii a ka Haku hoi maluna o na Haku a pau o keia ao. Mai hoopuka i na olelo oiaio ole, na hana epa wale ana, no ka mea, aia no maloko o ko ka Moi naau ka mea kuni, e sila ana i kou ano, kau hana a me kou moolelo no kou ola ana imua o kou Moi. O na Luna Aupuni a pau loa malalo o ka Moi, na kanaka a pau loa, e pono e loaa ia lakou he kulana oiaio o ke aloha Moi; a e kokua aku laia, ma na hana ku i ka manao ana aku i Kona Kiekie maluna o na kanaka a pau, a oia hookahi ka Moi, e ola ana, a e hoomalu ana no ka Lahui. O ke aloha Aupuni Moi oiaio, aole e loaa ma na keena o kona puuwai he wahi e noho ai na ano aupuni e ae a pau kona ola ana; e haa ana kona uhane no ka ihiihi o kona Moi a me ka anoai e ike mau aku i ka maluhia, ka pomaikai a me ke onipaa ana oka mana hooponopono Aupuni Moi. Maluna o ko kakou mau puko'a liilii iwaena o ka moana akea o ka Pakipika, ua hookumu ia he mau kulana mana Moi mai ka Lani mai a mai ka Po mai, mai luna a i lalo, mai ke kiekie a i ka hohonu o ka po o Hawaii nei. Ke kukala mau nei na kuahiwi ua kualono, na kahawai i ko ke Akua hookumu kahiko ana ma ko Hawaii Pae Aina, i ke kahua o ko kakou mana Aupuni Moi. He hoku liilii keia iloko o ka lewa akea o ka Lani, aka, ua helu ia kona kaumaha, kona kulana Aupuni Moi me na hoku hele Aupuni e ae i ike ia ko lakou kulana holomua ma keia ao holookoa. Ke nana mai nei na Aupuni a pau loa o ke ao nei i keia Aupuni Moi uuku loa; a ke anoi mai la i kona poai ana i ka La, me kona Aliiaimoku Moiwahine LILIUOKALANI.