Hawaii Holomua, 2 May 1891 — KA HOLOMUA. [ARTICLE]

KA HOLOMUA.

Aia iloko o ka puuwai o kela a me keia kanaka hoopono he koii manao makemake no nei mea he holomua. Ua kanu mua ia keia anoano iloko o ka umauma o ke kanaka, ua hoewe mua ia iloko ona, a iloko o na la a pau o kona ola ana, ua berita mua ia oia maluna o ka makemake ana no nei mea he holomua. Me he mea la, ma ka wa i hana ia ai ke kino o ke kanaka e ka lima mana nana oia i hana, ua hoopili pu ia aku a ua lumai ia aku la iloko o kona kino keia haawina o ka makamae, oia hoi kona iini ana ma ka holomua a ua lilo ia i hapa no kona kino. He oiaio e kuko mau ana ke kanaka e nee mau aku oia imua, a e pii ae hoi mai kekahi anuu a kekahi anuu, a ke loaa iaia keia nee ana ua kapa iho la oia, aia oia ma ke alahele holomua. O keia kuko iloholomua, he moa pono ia ke hoomoamoa ia me ka maikai, oiai oia iho la no ka une e hoolalelale mau ia ai ke kanaka e haalele iho i kona kulana mua a hehi aku ma ke kulana hou i oi ae i ko ka mua. He oiaio nae, ma ke alahele a ke kanaka e hele aku ana no mua, ua hoopiha ia ua alahele la me na hihi-pe'a o kela a me keia ano e hoopuhili ia ai kona manaolana. Na mea hoi ia na lakou e hookuia mai i kona mau wawae a e oupe ai oia ma ua alahele ala, a o ka hope auanei he haule poho no kona manaolana a he komo holookoa aku hoi iloko o ka hopena poino. Ua kuhihewa ke kanaka mamuli o kona haalele ana iho i kona kulana mua a nee hele aku oia no kekahi kulana hou aku, eia oia ke nee nei ma ke alahele o ka holomua e hoopomaikai ia mai ai oia; aka, o ka hopena nae i ikeia ua komo poo aku la oia iloko o ka popilikia. Nolaila, mamua ae o ko ke kanaka manao ana e nee mai kekahi anuu a kekahi anuu, mai kekahi kulana a kekahi kulana, he moa pono iaia ke hoomaopopo mua i mau rula alakai nona iho, oiai ke ole e alakai ia kona nee ana e ia mau loina, e komo aku no auanei kona nee ana iloko o ke kulana e hoehaeha mau mai ai iaia i na la a pau o kona ola ana, a e loaa ai iaia he mihi ehaeha aka he mihi make nae. Ma ka makou hoomaopopo ana, mawaena o na rula he lehulehu a makou i ike ai ua kupono ke palama i keia kumumanao hohonu, he ekolu mau mea nui i lilo i mau loina e pono ai ke kanaka ma kona nee ana mai kekahi kulana a kekahi kulana, oia hoi, ka nee ana ma ke alahele o ka holomua: (1) Ke kahua e hoomaka ai ka nee ana; (2) Ka nee ana ma ke ala pololei; (3) Ka nee pololei ana imua no ka pahu hopu i makemakeia. Oia hoi, i ko ke kanaka manao ana e hele oia ma ke alahele o ka holomua, e kakiwi mua oia iaia iho me keia mau mea ano nui ekolu, a makou i hoomaopopo ae la. Aia ke kuko iloko o ke kanaka e nee oia imua ma ke alahele o ka holomua, aka, ina aole oia i ike lea i ke ano e hooko aku ai i keia kuko i hapai ia e kona houpo, a pono hele aku oia me ka pupuahulu a me ka noonoo pono ole, aole i ike i kahi ana i hele aku ai, aole hoi i ka pahu hopu e hoea maalahi aku ai

oia, alaila, o ka hopena e ili mai ana maluna ona, he popilikia no ia. He mea pono i kela kanaka ke ike aia oia ke nee la ma ke alahele pololei, a oia nee ana hoi ua hookumuia maluna o ke kahua maopopo lea o ka makaukau ke hooko i ka hele ana me ka hemahema ole. O ke kahua, oia kahi mua loa a ka mea hana hale e haawi ai i kona hoomakaukau ana me ka noeau nui, a ke paa ia mea me ke kina'una'u ole, e hiki ana i na paia o ka hale ke pii ae me ka holomua maikai. Aka, ina e hemahema ke kahua, piha i na kina'una'u a me ka maikai ole, he mea maopopo i ka paa ana o ka hale holookoa e hiki mai ana kona wa e luku ia ai a lilo i mea ole, mamuli o ka ikeia ana o kona hopena kupono ole. Oia hoi, i pono ai ka hooponopono ana i kela hale nani i kukuluia maluna o ke kahua maikai ole a hemahema hoi, he mea pono ke ulupaia ka hale holookoa a hoea i kona kahua i ku ai, oiai o kahi ia o kona kina nui i lilo ai i hale hoowahawahaia. A ina hoi i maikai ke kahua i ku ai o ka hale, a o kona wahi hemahema wale no aia ia ma kekahi o kona mau paia, alaila, e hiki ana keia hemahema ke hooponoponoia me ke kii ole ana i ka mole paa o ka hale. Ua like no a like keia me ka hana a ke kanaka i kuko ai a i makemake ai e hoonee aku ma ke alahele o ka holomua. Ina e maikai ole ke kahua i kukulu ai oia i kana hana, a maluna o ia kahua hemahema e hoonee ai oia i kana hana, e hiki mai ana ka wa e ike ai oia i kona kuhihewa nui, a e huli mai ai ia haawina maikai ole a hoehaeha mai iaia, oiai kona mau la e ola ana; no ka mea, aole e hiki ana iaia ke hooponopono hou i kana hana ke ole oia e ulupa i na mea a pau i hana mua ai, a hoomaka hou oia mai ke kumu mai. O keia iho la ka hopena o ka nee ana maluna o ke kahua maikai ole a hemahema hoi. Aia a maopopo ke kahua e ku ai ka hana, alaila, he mea pono i ke kanaka ke noonoo i ke ano pololei o kana hoonee ana aku i kana hana. E ike lea oia i ke alahele maopopo ana e hele aku ai, a maluna o ia alahele e hoonee aku ai oia i ka hana ana i makemake ai e lawelawe. Ma keia alahele hoi ana e hele aku ai, e kiai ana oia me ka makaala loa no ke ano o kana nee ana, aole hoi oia e pono e hoohemahema . [illegible] ka nee ana o kana hana, me he mea la he waapa e ko ia ana e na wiliau a ka wai, me ka paia lewa wale ia ana i o a ianei me ka hopena maopopo ole. O keia kulana, he nee ana no ia ma ke alahele pololei ole a i hoomaopopo mua ole ia hoi e ke kanaka nana ka hana i hoohele ia aku ai. A nolaila, o ka hana ana pela, he hopena manaolana poho no ke hoea mai ana maluna o ka hana a ke kanaka. O ka ike maopopo ana o ke kanaka i ka hopena o kahi ana e pae aku ai, oiai kona nee ana mai kekahi wahi a kekahi wahi, he mea ia e loaa ai ka makaukau iaia e hoonee i kana hana ma ke alahele o ka holomua. Nolaila, i ka hoohui ana i keia mau mea ekolu a akoakoa i kahi hookahi a lilo hoi i mau kumu alakai no ka ke kanaka hana e hoonee ai imua, o ia auanei ka mea e loaa ai i ke kanaka ka holomua oiaio.