Hawaii Holomua, 2 Mei 1891 — NA AINA MAMAO. [ARTICLE]

NA AINA MAMAO.

Ua ku mai ka moku lawe leta Auseteralia ma ke kakahiaka Poalua nei, mai Kapalakiko mai, a ua loaa mai na lono nuhou kuwaho, a ke lawe mai nei makou i na mea ano nui e like me ia mahope ae nei: AMERIKA. E kaahele ana ka Peresidena Harisona o Amerika Huipuia i na Mokuaina ma ka Pakipika, a ua olelo ia, ua komopoo o Kaleponi ma ka hoomakaukau ana e haawi aku iaia i na hoohiwahiwa kamahao lua ole. Nui ke pihoihoi a me na hauwalaau o ko Amerika a me ko Europa i na mea e pili ana i ka powa ia ana o kekahi poe kanaka Italia oiai e paa ana lakou maloko o ka halepaahao ma Nu Olina, Amerika. Ua koi mai ka Moi o Italia i ke aupuni o Amerika e hopu ia a e hookolokolo koke ia na alakai o kela hana powa, a e uku ia ka poe ohana o na ltalia i pepehi ia. Ua pane aku ke Kuhina Nui o Amerika e ae ana i ka uku ana i na oha- na, me na hoakaka nae aole e hiki ke hopu wale ia no kela a me keia a hoopaa wale ia aia wale no a lawa ka manawa kupono no ka nieniele a me ka hoomaopopo ana. Mamuli o keia ua pupuahulu iho la ka manao uluku o ka Moi o Italia, a ua kauoha mai la i ke Kuhina Noho o kona aupuni e noho ana ma Wasinetona e hoi koke aku. O keia ka hana i maoaoia he uhai ana i ke kuikahi noho launa mawaena o na aupuni a elua, a mamuli o ia mea, ua ulu ae na hiohiona okuku kuee mawaena o laua, a ua hopohopo ia o kukala mai o ltalia ike kaua. Ua nui loa ka huhu o ka Moi o Italia no keia mau hana, wahi a ka lono i loaa mai, ua hiki ole ke hoonana ia oia. O kekahi mea nui i hopohopo ia, oia no ka loaa ana ae o kekahi mau lono no ka upu ia e kekahi poe hui malu o ltalia e powa i ke ola o na kupa Amerika ma ke ano he panai no na ola ona kanaka Italia i powa ia ma Nu Olina.

I ka wa a ka mokuahi i haalele aku ai ia Kapalakiko, ke mau ala no na kuka olelo ana mawaena o keia mau aupuni a i elua no keia kumuhana, a ua lohe wale ia nae, ua ano hookuemi hope aku la o Italia i kana mau hoaano. EUROPA. Ua ulono ia ae, ua hoopiha loa ia ka Emepera Wiliama o Kelemania me ka inaina, no ka huli ana iho nei o kona kaikuahine, ke Duke Wahine o Sparta, i ka hoomana Helene, ka mea hoi a ua Emepera la e manao nei ua ulu mai ia mea mamuli o na kokoina a na mana Rusia ma o ka Moiwahine Olga la. Ua nana aku ka Emepera i keia hana a kona kaikuahine ma ke ano he hana hoowahawaha pilikino iaia, no ka mea, mamuli o kana kauoha i hookomo ia ai na hoakaka iloko o ka palapala ae mare me ke Duke o Sparta, e ae ana i kona kaikuahine e noho mau aku ma ke ano he lala no ka hoomana Lutera. Ua olelo ia, ina aoIe oia i manaoio e paa ana kona kaikuahine i ka hoomana o kona ohana, ina aole loa oia e ae aku ana i ka mare me ke Duke Sparta. Ua loaa ae he telegarapa ma Ladana, mai Pertoria ae a me Burban, ka Repubalika o Amerika Hema, e hoike ana i ka nui o na hana hookaumaha a me na hana ino a na luna aupuni Pukiki e noho ana ma kahi i kapa ia o MashonaIand, he okana aina hoi i kaa malalo o ka mana o Potugala. Ua lawe lima nui ae lakou i kekahi mau wahi, a ua ike ia he mau hana hoopilikia ia i ka okana aina o Manica, ko Enelani kuleana. Ma ka huakai kaahele a Konela Willoughby, ma ko Enelani aoao, no ka imi a me ka hoomaopopo ana i ko Enelani mau palena kuleana malaila, ua hopu ia iho la kona mau moku a ua hoopaa ia kona mau kanaka ma ka halepaahao malalo o na kauoha a na luna aupuni Pukiki; a ua kipu ia no hoi na mokuahi lawe ukana a me na lako o ua Kenela nei. Ua kauoha ia e huki i ka hae Beritania ilalo a e kau ia ka hae o Potugala a ua hooko ia ia mea, a ua nui na hana hookaumaha me ka lima ikaika i lawelawe ia e ua poe la. Mamuli o keia hana, ua puoho ae la ka inaina o ka Liona, a ua hoomaka koke oia e okakala, me ka waiho ana aku i kana mau ninau imua o ke aupuni o Potugala i na kumu o keia mau hana, me ke kauoha pu aku e hoakaka piha mai. Ua olelo ia aneane hiki ole i ua Liona la ke uumi iho i kona inaina oiai, wahi a na nupepa o Ladana, he mau hana ku keia a Potugala i ka poloai ana mai i na waha pukuniahi o Enelani e luai aku i ka lakou mau ukana maloko o kona mau palena. Ua hoike pu ia ae no hoi, mamuli o keia mau lono i loaa aku ma Ladana, ua hele koke aku la ke Kuhina Nui Haku Salisibure a halawai pu me ka Alihikaua Nui o na pualikoa, a o ka laua mau kukakuka ana, no na mea no ia e pili ana i na hiohiona kaua mawaena o Beritania a me Potugala. Ua manao ia ina e loaa ae ana na lono oiaio pili aupuni, e hooia ana i keia mau lono ua huna io ia pela alaila, e kali ole ana o Beritania Nui i ka hoao ana e hoopai aku i ka mea hewa. No ka mea, wahi a ka nupepa alakai o Ladana, ua aikena a manaka o Enelani i ke kauleo mau aku ia PotugaIa, me ke a'o aku iaia e hoopau i kana mau hana ino a pakaha wale ma na mea e pili ana ia Aferika, aka, aole i hoolohe mai, a nolaila, ua hooholo ia ke ulu hou ae na kumu a me na hana o ia ano, aole e kali a e hoomalielie hou aku ana o Enelani, aka, o ka hoike wale aku no aole ia he kamalii e paani a e hehiku wale ia ai no. Nolaila, ke holopono ole na hoomalielie ana ina e oiaio kela mau hana a na lana aupuni o Potugala ma Aferika, a me he la he oiaio no, alaila, e lawe ia mai ana io kakou nei ka lono iloko o keia mau la aku no ke ala ana o ka Liona e halawai pu me na mamo a na Don o ka makaihe o na la kahiko. Ua hoopau wale ia ka manao e holo aku o Peresidena Carnot o Farani i Rusia, no ka hopohopo ia o ilo ia i kumu e hoomahuahua ia ai ai na hauwawa a me na pihoihoi no ka ulu ae o kekahi kaua huliamahi ma Europa. Ua hoopiha ia ko Havana poe me ka weliweli a me ka manaonao i ka loaa ana aku o kekahi kanaka ua pepehi iho la i kona kaikaina uuka a make, a okioki pauku iho la i kona kino, a hoomaka iho la e ai. I ka loaa ana aku, ua paa na lima, ke ake, ka puuwai a me na onohi maka i ka ai ia e ua kanaka nei.